Éxodo 29

Cürakunata churananpaq tantiyasishqan

Levítico 8.1-36

1<<Aarón y surinkuna sirvimaq cürakuna kayänanpaq churashpayki akranki sänu turïtuta y ishkay sänu carnikunata. 2Saynöpis ruranki alinnin jarinapita levadüraynaq tantata, aceitiwan masarash levadüraynaq tantata y aceitiwan lushipash levadüraynaq llapsha tantatapis. Lapan say tantakunata trïgu jarinapita ruranki. 3Say rurashqayki tantakunata canastaman winarkur apamunki. Saynöpis turïtuta y ishkan carnikunatapis Tinkunansi Tolduman apamunki.

4<<Nirkur Aarónta y surinkunata Tinkunansi Toldu patiuman pushamur armakasinki. 5Nirkur Aarónta jatipanki tünicata, sotänata, efodta y pectoralta. Saykunata jatiparkur efodpa wachkunwan wachkapanki. 6Saynöpis umanman görrata jatiparkur sagrädu vinchata#Éxo. 28.36; 39.30. jananman churapanki. 7Sayno jatiparkur noqata sirvimaq cüra kananpaq Aarónpa umanman sagrädu aceitita winapanki. 8Nirkur Aarónpa surinkunata qayaykur tünicata jatipanki. 9Aarónta wachkunwan wachkapashqaykino paykunatapis wachkapanki. Görrantapis jatipanki. Saynöpami noqata sirvimaq cüra kayänanpaq churanki. Paykuna y paykunapita miraqkuna imayyaqpis sirvimaq cürakunami kayanqa.

10<<Saypitanami turïtuta apamunki Tinkunansi Toldu patiuman. Saychömi Aarónpis surinkunapis turïtupa umanman makinkunata churayanqa. 11Nirkurnami Tinkunansi Toldu patiucho say turïtuta nawpächo pishtanki. 12Yawarninman dëduykita töparkasir altarpa waqrankunata lushinki. Nirkur pusuq kaq yawarta altar chakinman talinki. 13Pacha wiranta, natinnincho kaykaq wiranta y ishkan rurunninkunata wirantinta altarcho rupasinki. 14Aysanta, qaranta y ashashnintaqa campamentupita jukläman apaykur rupasinki. Turïtuta altarcho rupasishqaykiqa purificasina sacrificiumi kanqa.

15<<Saypitanami jukaq carnipa umanman Aarónwan surinkuna makinkunata churayanqa. 16Saypitanami pishtaskir yawarninwan altarpa chuskun lädunkunata saqsupanki. 17Aysanta cuartusashpaykimi aqishnintapis chakinkunatapis maylanki. Nirkurnami altar jananman umantinta churarkur 18lapanta rupasinki. Say rupasishqayki mushkümuptinmi noqa Tayta Dios kushikushaq.#Efe. 5.2; Fil. 4.18.

19<<Jukaq carnipa umanmanpis Aarónwan surinkuna makinkunata churaskiyaptin 20say carnita pishtanki. Yawarninta shuntarkur Aarónpa y surinkunapa aluq kaq rinrinpa ura puntanta ichiklata lushinki. Saynöpis yawarwan lushinki aluq kaq makinpa y chakinpa maman dëdunkunatapis. Pusuq kaq yawartana altarpa chuskun lädunkunaman saqsupanki. 21Altarta saqsupashqayki yawarta shuntarkur pusuq kaq aceitiwan Aarónta y mödanankunatapis saqsupanki. Saynöla surinkunata y mödanankunatapis saqsupanki. Saynöpami Aarónwan surinkuna noqata sirvimaq cürakuna kananpaq consagrädu kayanqa. Mödanankunapis listunami kanqa jatikurkur sirviyämänanpaq.

22<<Nirkurna jorqunki pishtashqayki carnipa chupa wiranta, pacha wiranta, natinnincho kaykaq wiranta, ishkan rurunninkunata wirantinta y aluq kaq chankantapis. Sayno jorqunki Aarón y surinkuna cüra kayänanpaq pishtashqayki carni kaptinmi. 23Noqapa nawpächo kaykaq canastapita jorqunki juk jatun tantata, aceitiwan masarash juk tantata y juk llapsha tantatapis. Lapanpis say tantakunaqa levadüraynaqmi kayanqa. 24Lapan saykunata Aarónta y surinkunata aptapanki noqapa nawpäman joqarir wakman kayman kuyusiyänanpaq. 25Sayno rurarkuyaptin say tantakunata shuntanki. Nirkur jukaq carnita rupasina sacrificiupaq rupasishqaykinöla saykunatapis altarcho rupasinki. Say rupasishqaykipa mushkuyninmi noqapa shonqüpaqno kanqa. 26Sirvimaq cüra kayman Aarónta churar pishtashqayki carnipa qasquntapis#29.26 Wakin runakunaqa pëchuntapis niyan. noqapa nawpäman joqarir wakman kayman kuyusinki. Say aysaqa qampaqmi kanqa.

27<<Say joqarimushqayki qasqunta y aluq kaq chankantaqa rakinki 28Aarónpaq y paypita miraqkunapaqpis. Jawka kawakuy sacrificiu cadala noqapaq kaptin saykunata Israel runakunapita imaypis chaskiyanqa. Say nishqäkunaqa imayyaqpis leymi qamkunapaq kanqa.

29<<Aarón wanuptinqa sagrädu mödanankuna paypita miraqkuna jatikuyänanpaqmi kanqa. Say mödanakunata jatikuyanqa sagrädu aceitita winapar cüra kananpaq churashqan hörami. 30Tinkunansi Tolduman yaykunanpaq mayqanpis Aarón ayllupita cüra kananpaq churaptin qanchis junaq say mödanata jatiranqa.

31<<Pishtashqan carnipa wakin aysanta sagrädu lugarcho yanunki.#29.31 Say sagrädu lugarqa altar nawpankunami karqan. Sayta musyanaykipaq liyinki Lev. 10.13-14. 32Say aysata y canastacho pusuq tantata Aarónwan surinkuna Tinkunansi Toldu patiucho mikuyanqa. 33Cüra kananpaq churashqanpita purificasina sacrificiu kaptinmi say aysawan tantakuna paykuna mikuyänanpaq kanqa. Cüra mana karqa say sagrädu mikuykunata pipis ama mikunqasu. 34Tantatawan aysata say junaq mana ushaptinqa pusuq kaqta rupasinki. Saytaqa sagrädu kaptin ama pipis mikunqasu.

35<<Aarónta y surinkunatapis cüra kayänanpaq churashpayki nishqänöla lapan saykunata ruranki. Cüra churayqa qanchis junaqnintinmi düranqa. 36Say qanchis junaqyaq waran waran juk turïtuta pishtarkur rupasinki Aarónwan surinkuna purificash kayänanpaq. Saynöpis say rupasishqaykikunaqa altar purificash kananpaqmi kanqa. Nirkur altar jananman aceitita winapanki sagrädu kananpaq. 37Sayno sacrificiuta waran waran rupasinki qanchis junaqyaq. Saynöpami altar sagräduna kaptin sayta töpaq kaqqa imapis sagrädu rikakunqa.

Altarcho waran waran rupasiyänanpaqpis tantiyasishqan

Números 28.1-8

38<<Mana qonqaypa waran waran juk watayuq ishkay carnishta pishtarkur altarcho rupasiyanki. 39Jukaq carnishta pasa waraykaptin rupasiyanki y jukaqtana pasa sakaykaptin rupasiyanki. 40Punta kaq carnishpa aysanta altarcho rupasiyashpayki ishkay kïlu alinnin jarinata juk litru olïvupita rurash aceitiwan pichurkur rupasiyanki. Say jananman winapäyanki juk litru vïnuta. 41Tutapa rupasiyashqaykinöla jukaq carnishtapis pichuyashqayki jarinatawan altarcho tardipa rupasiyanki. Sayno rupasir vïnutapis jananman winapäyanki. Say rupasishqayki mushkümuptinmi noqa Tayta Dios kushikushaq.

42<<Sayno rupasiyashqaykiqa noqapaq rupasina sacrificiumi kanqa. Saytaqa qamkuna y qamkunapita miraqkunapis Tinkunansi Toldu patiuman apaykur imaypis nawpächo rupasiyanki. Saychömi imaypis tinkushun parlanansipaq. 43Saychömi Israel mayikikunawanpis tinkushaq. Kikï saycho kaptïmi say patiu sagrädu kanqa.

44<<Tinkunansi Toldupis y patiucho kaykaq altarpis sagrädumi kanqa. Aaróntawan surinkunatapis noqami churashaq cüra kayashpan sirviyämänanpaq. 45Israel runakuna kayashqancho tarmi paykunapa Diosnin kasha. 46Saynöpami Tayta Diosnin kashqäta tantiyakuyanqa. Noqami Egiptupita jorqamushkä paykunawan kanäpaq. Paykunapa Tayta Diosninmi noqa kaykä.

Currently Selected:

Éxodo 29: qvhB

Highlight

Copy

Compare