Éxodo 28

Cürakunapa mödanankunata rurasinanpaq tantiyasishqan

Éxodo 39.1-31

1<<Israel runakunapita wawqiki Aarónta y surinkuna Nadabta, Abiúta, Eleazarta y Itamarta churanki sirvimaq cürakuna kayänanpaq. 2Wawqiki Aarón respitädu cüra kar jatikunanpaq kuyaylapaq sagrädu mödanankunata rurasipanki. 3Mödanankunata rurasinaykipaqqa habilidäta qoshqä runakunata tantiyasinki imano rurayänanpaqpis. Say mödanakunata jatikurmi sirvimaq cüra kananpaq consagrädu kanqa. 4Wawqiki Aarónwan surinkunapis jatikuyänanpaq rurasipanki pectoralta, efodta, sotänata, bordash tünicata, görrata y wachkutapis. Paykuna say sagrädu mödanata jatikuyanqa akrashqä cürakuna kar sirviyämänanpaqmi. 5Say mödanakunata awayanqa qori jïlupita, azul, granäti y puka milwa jïlukunapita y llanula puskash lïnu jïlupitapis.

Efodta rurasinanpaq tantiyasishqan

Éxodo 39.2-7

6<<Efodta awasinki qori jïlupita#Éxo. 39.3., azul, granäti y puka milwa jïlukunapita y llanula puskash lïnu jïlupitapis. Saytaqa shumaq awayta yachaqkuna awayanqa. 7Saynöpis efodpa ishkan kuchuncho tirantikuna kanqa umrunman shawananpaq. 8Efodpa wachkuntapis awasinki qori jïlupita, azul, granäti y puka milwa jïlukunapita y llanula puskash lïnu jïlupitapis. Say wachkuqa efodwan juklaylanömi kanqa.

9<<Saynöpis ishkay ónice rumikunaman Israelpa surinkunapa jutinkunata qelqasinki. 10Sayno qelqasinki qechpapita qalaykur nunushyaq. Juknin kaq rumiman soqta jutikunata qelqasinki y jukaq rumimanpis soqta jutikunata qelqasinki. 11Say jutikunata rumipita sëlluta ruraqno alhäja ruraq runawan qelqasinki. Say rumikuna mana yarqunanpaq sararänanta qoripita ruraykasir sigurasinki. 12Say ishkay rumikunata efodpa tirantinkunaman churasinki cürapa umruncho kananpaq. Saynöpami Aarón nawpäman yaykamur umruncho apamunqa Israelpa surinkunapa jutinkunata imaypis yarparänanpaq. 13Say rumikunapa sararänankunataqa qoripita rurasinki. 14Rumikuna kaykäyashqan kuchunpa piltash ishkay qori cordonta churasinki.

Pectoralta rurasinanpaq tantiyasishqan

Éxodo 39.8-21

15<<Qasqunman#28.15a Wakin runakunaqa pëchunman niyan. shawananpaq pectoralta rurasinki imata yarpashqätapis cüra musyananpaq.#28.15b Pectoral rurinchömi Urim y Tumim nishqan rumikuna karqan. Say rumikunawanmi cüra suertita rikaq Tayta Dios imata munashqanta musyananpaq. Saypita masta musyanaykipaq liyinki Éxo. 28.30. Saytapis rurasinki efodta rurasishqaykinöla. Saymi kanqa qori jïlupita, azul, granäti y puka milwa jïlukunapita y llanula puskash lïnu jïlupitapis. 16Rurarkasir bolsano cuadrädu kananpaq doblanki. Larguyninpis anchuyninpis ishkay chunka ishkay (22) centïmetru kanqa. 17Nirkur sayman churasinki chusku fïla kuyaylapaq rumikunata. Punta kaq fïlaman churasinki sárdica rumita, topacio rumita y carbunclo rumita. 18Ishkay kaq fïlaman churasinki esmeralda rumita, zafiro rumita y diamanti rumita. 19Kimsa kaq fïlaman churasinki jacinto rumita, ágata rumita y amatista rumita. 20Chusku kaq fïlamanna churasinki berilo rumita, ónice rumita y jaspe rumitapis. Say rumikuna mana yarqunanpaq qoripita sararäkunanta ruraykasir sigurasinki. 21Say rumikuna kayanqa chunka ishkaymi. Sayno chunka ishkay kayanqa Israelpa surinkuna chunka ishkay kayashqannömi. Cada rumiman juk trïbupa jutinta qelqasinki rumipita rurash sëlluno kananpaq.

22<<Pectoralpaq cordonkunata qori jïlupita piltasinki. 23Nirkur ishkay taksha arguëllakunata qoripita rurasinki. Say arguëllakunata tanasinki pectoralpa jana kaq ishkan esquïnanman. 24Nirkurna say arguëllakunapa qoripita piltash cordonta päsasinki. 25Cordonpa ishkan puntankunapana umruncho kaq sararänankunaman sigurasinki. Sayqa qasqunchömi wataranqa.

26<<Saynöpis ishkay taksha arguëllakunata qoripita rurasinki pectoralpa ura kaq kuchunkunaman churananpaq. Say arguëllakuna pectoral rurincho kar efod jananchömi kanqa. 27Saynöpis ishkay taksha arguëllakunata qoripita rurasinki efodpa wachkun janaläninman churananpaq. Saykunami efodpa tirantinkunacho kar pectoralpa costüranman tinkuranqa. 28Saypitami pectoralpa y efodpa arguëllankunata azul cordonwan watanki efodpita mana yarquykänanpaq.

29<<Lugar Santuman pectoralnin jatish Aarón yaykurmi Israelpa surinkunapa jutinkunata qasquncho apanqa. Pectoralnin jatish nawpächo kaptinmi paykunata y paykunapita miraqkunata imaypis yarparäshaq. 30Say pectoralman Urimta y Tumimta#Núm. 27.21; Esd. 2.63; Neh. 7.65. winanki qasquncho Aarón apananpaq. Saynöpami Lugar Santuman yaykur noqapa nawpächo imaypis sararanqa alipaq kaqta y mana alipaq kaqtapis Israel runakunata tantiyasinäpaq.

Mandaq cürapa wakin mödanankunata rurasinanpaq tantiyasishqan

Éxodo 39.22-31

31<<Efodpa rurinman jatikunanpaq azul jïlupita sotänata awasinki. 32Uman yaykunanpaq say sotäna kunkayuqmi kanqa. Sotänapa kunkan mana rachikänanpaq rebëtita jirapanki. Say rebëtita qara casäcapa rebëtintano jirapanki. 33Sotänapa ura kuchunman granäda niraqta bordasinki azul, granäti y puka milwa jïlukunawan. Saynöpis say kuchunpa qoripita rurash campanillakunata churasinki. 34Saynöpami juk qori campanilla, juk granäda, juk qori campanilla, juk granäda sotäna kuchuncho tumaypa kanqa. 35Say sotänan jatishqami Lugar Santuman imaypis Aarón yaykunqa. Saymi sirvimänanpaq yaykuptinpis y yarqamuptinpis campanillan wiyakämunqa. Sotänan jatish yaykurqa manami wanunqasu.

36<<Saynöpis qoripita vinchata rurasinki. Nirkur sayman qelqasinki <Tayta Diospa karmi santu> nir qelqaränanpaq. Sayta qelqasinki rumipita rurash sëlluno kananpaq. 37Say rurasishqayki vinchata Aarónpa görranman azul cordonwan watapanki. 38Say vinchata Aarón imaypis urkuncho jatiranqa. Saynöpami Israel runakuna sagrädu sacrificiukunata apayämushqan munashqäno mana kaptinpis perdonashaq. Israel runakunapa trukan Aarónnami jusayuq kanqa.

39<<Aarónpaq tünicatapis lïnu jïluwan awarkasir shumaq bordasinki. Görrantapis lïnu jïlupita awasinki.#28.39 Aarónpa görranqa manami iti wamrapa görrannösu karqan, sinöqa lïnu tëlapita rurash corönanömi. Wachkuntapis kuyaylapaqta bordasinki.

40<<Aarónpa surinkunapaqpis kamaraqla kayänanpaq tünicakunata, wachkukunata y görrakunata kuyaylapaqta rurasinki. 41Saykunata rurarkasir wawqiki Aarónta y surinkunata jatipanki. Nirkur umanman sagrädu aceitita winapanki sirvimaq cürakuna kayänanpaq.

42<<Saynöpis penqayninta sapananpaq seqlapita qonquryaq lïnupita calzoncïllunta rurasipanki. 43Say calzoncïllutami Aarón y surinkuna jatikuyanqa Tinkunansi Tolduman yaykuyänanpaq. Saynin jatishqami Lugar Santucho kaq altarchöpis sirviyämanqa. Calzoncïlluynaq yaykurqa jusayuq kar wanuyanqami. Say nishqäkunaqa imayyaqpis leymi Aarónpaq, surinkunapaq y paypita miraqkunapaqpis kanqa.

Currently Selected:

Éxodo 28: qvhB

Highlight

Copy

Compare