Éxodo 10

Saysika chukluskuna yuriyashqan

1Saypitanami Moisésta Tayta Dios nirqan: <<Faraón kaqman ayway. Aläpa mansariypaq castïgukunawan castiganäpaqmi paypatapis y mandäsiqninkunapatapis shonqunkunata chukruyäsishkä. 2Munayyuq Tayta Dios kashqäta tantiyarnami Egiptucho espantaypaq castigashqäta wamraykikunata y wilkaykikunatapis wilapäyanki>>.

3Sayno niptinmi Moiséswan Aarón Faraón kaqman aywaykur niyarqan: <<Hebreo runakunapa#10.3 Hebreo runakuna Israel runakunami karqan. Saymi Moiséspis hebreo runa karqan. Tayta Diosninmi nin: <¿Imayyaqta mana cäsukamaypa kakunki? ¡Kuyashqä runakunata adoramaq aywayänanpaq kachariy! 4Saynöla kachariyta mana munaptikiqa waray junaqmi nacionnikiman aska chukluskunata yurisimushaq. 5Saykunami alpapis mana rikakashqanyaq tishyayparaq juntäyämunqa. Runtu tamyapita qeshpiq mikuytapis chipyaqmi ushayanqa. Saynölami lapan jachakunatapis kachkaykar ushayanqa. 6Saykunami juntäyanqa palaciuykimanpis, mandäsishuqnikikunapa wayinkunamanpis y intëru Egiptucho taq runakunapa wayinkunamanpis. Taytaykipis ni awiluykikunapis manami imaypis saytanöqa rikayashsu> >>.

Sayno niyta ushaskirnami Faraónpa palaciunpita Moisés tikrar aywakurqan.

7Saymi mandäsiqninkuna Faraónta niyarqan: <<Taytay, ¿imayyaqnataq say runa pasaypa desgraciaman jitarpamäshun? Say runakuna Tayta Diosninta adoraq jina aywakuyäsun. ¿Manaku tantiyakunki Egiptucho imaykapis pasaypana ushakaykashqanta?>>

8Sayno niyaptinmi Moiséstawan Aarónta yapay qayaykasir Faraón nirqan: <<Kananqa Tayta Diosnikita adoraq aywayay. Isanqa wilamay pï pï aywayänanpaq kashqantapis>>.

9Saymi Moisés nirqan: <<Noqakunaqa Tayta Diosta adorar jatun fiestatami rurayäshaq. Saymi lapä aywayäshaq olqu wamräkunata, warmi wamräkunata y awilükunatapis pushakurkur. Saynölami uyshäkunata, cabräkunata y wäkäkunata chipyaq qatikurkur aywayäshaq>>.

10Faraónnami nirqan: <<Achyä Tayta Dioschir yanapaykuyäshunki ari. ¿Niq tumpala aywakuyänaykipaq kashqanta mana tantiyashqätaku yarpaykäyanki? ¿Wamraykikunawan lapayki aywayänaykipaq kacharinätaku yarpaykäyanki? 11Manami yarpäyashqaykinösu kanqa. Tayta Diosta adoraq aywayta munarqa olqu kaqkunala aywayay. Olqu kaqkunala aywayänaykipaqmi manakayämarqayki>>.

Sayno nirmi paykunata nawpanpita qarqusirqan.

12Saypitanami Moisésta Tayta Dios nirqan: <<Egipto nacionman makikita joqariy aska chukluskuna shayämunanpaq. Say chukluskunami ushayanqa lapan plantakunata y runtu tamya ushashqanpita qeshpiqkunata>>.

13Sayno niptinmi Egiptuman tukrunta Moisés joqarirqan. Saymi inti jeqamunanläpita juk paqas y juk junaq Tayta Dios wayräsimurqan. Say wayrami warayninpaqqa saysika chukluskunata juntäsimurqan. 14Saynöpami intëru Egiptuman chukluskuna juntäyarqan. Sayjinanpaqa chukluskuna manami imaypis karqansu ni imaypis kanqasu.#Apoc. 9.2-3. 15Saymi pampapis mana rikakashqanyaq juntäyarqan. Sayno tishyayparaq karmi lapan plantakunata y runtu tamyapita qeshpiq jachakunapa wayuynintapis mikuyarqan. Saymi Egiptucho jachakunapis qewakunapis verdiqa quëdarqansu.

16Saymi Moiséstawan Aarónta jukla qayaykasir Faraón nirqan: <<Mana wiyakuypa Tayta Diosnikipa contran y qamkunapa contrayki rikakurmi jusalikushkä. 17Saymi ruwakü kananlapis perdonaykäyämänaykipaq. Saynöpis Tayta Diosnikita manakuykuyälay kay chukluskunata elaqaykasinanpaq>>.

18Saymi Faraónpa palaciunpita Moisés yarqurir Tayta Diosta jukla manakurqan. 19Manakuptinmi inti jeqananläpita Tayta Dios fiyupa wayräsimurqan. Say wayra lapan chukluskunata Puka Lamarman apaptinmi intëru Egiptucho karqannasu.

20Sayno kaptinpis Faraónpa shonqunta Tayta Dios yapay chukruyäsiptinmi Israel runakuna yarquyänanta munarqannasu.

Pasa sakakäkushqan

21Saypitanami Moisésta Tayta Dios nirqan: <<Jana pasapa makikita joqariy intëru Egiptucho pasaypa yanawyayparaq pasa sakakäkunanpaq>>.

22Nishqanno makinta Moisés joqariptinmi kimsa junaqyaq Egiptucho fiyupa sakakäkurqan.#Sal. 105.28; Apoc. 16.10. 23Saymi Egipto runakuna kimsa junaqnintin pitapis rikayarqansu ni maypa aywaytapis kamäpakuyarqansu. Israel runakuna täyashqanchömi isanqa asikyarqan.

24Saynami Moisésta qayaykasir Faraón nirqan: <<Tayta Diosta adoraq wamraykikunanintin lapayki aywayay. Uyshaykikunata, cabraykikunata y wäkaykikunata isanqa kaycho kachaykuyay>>.

25Faraón sayno niptinmi Moisés nirqan: <<Uywäkunata qatiyänäta mana munarqa ¿qamsuraq uywakunata kamaripäyämanki Tayta Diosnïta adorar sacrificiukunata rupasiyänäpaq? 26Uywäkunata ni juktapis mana kachariypami lapanta qatiyäshaq. Qatiyashqä uywakunapitami akrayäshaq sacrificiuta rupasir Tayta Diosnïta adorayänäpaq. Manaraq charqa manami musyayäraqsu ayka uywata rupasiyänäpaq kashqantapis>>.

27Sayno niptinmi Faraónpa shonqunta Tayta Dios yapay chukruyäsirqan Israel runakunata mana kacharinanpaq. 28Saymi Moisésta Faraón nirqan: <<Kananpitaqa manami qamta rikaytapis munäsu. Yapay yuripämaptikiqa supaynikitami aparasishayki>>.

29Sayno niptinmi Moisés nirqan: <<Nishqaykinömi kanqa, tayta. Kananpitaqa manami imaypis rikayämankinasu>>.

Currently Selected:

Éxodo 10: qvhB

Highlight

Copy

Compare