Éxodo 9

Uywakuna pesti qeshyawan wanuyashqan

1Saypitami Moisésta Tayta Dios nirqan: <<Aywaykur Faraónta niy: <Hebreo runakunapa#9.1 Hebreo runakuna Israel runakunami karqan. Saymi Moiséspis hebreo runa karqan. Tayta Diosninmi nin: Kuyashqä hebreo runakunata adoramaq aywayänanpaq kachariy. 2Aywayänanta mana munar saynöla michaptikiqa 3intëru Egiptumanmi pesti qeshyata kachamushaq. Saywanmi wanuyanqa cawallukuna, ashnukuna, camëllukuna, wäkakuna, uyshakuna y cabrakunapis. 4Egipto runakunapa uywankuna qeshyawan wanuyaptinpis Israel runakunapa uywankunaqa manami ni juklaylapis wanuyanqasu> >>.

5Nirkurnami Tayta Dios nirqan: <<Waraymi say nishqäta rurashaq>>.

6Nishqannöla waraynin junaq ruraptinmi Egipto runakunapa uywankuna wanuyarqan. Israel runakunapami isanqa ni juklaylapis wanuyarqansu. 7Saymi Israel runakunapa uywankunata rikamuq Faraón kachaptin ni juklaylatapis wanushta rikayarqansu. Sayno kaykaptinpis Faraónqa shonqun yapay chukruyaptinmi Israel runakuna aywayänanta munarqansu.

Runakunatawan uywakunata chupu ushashqan

8Moiséstawan Aaróntami Tayta Dios nirqan: <<Jornupita uchpata aptakurkur Faraón kaqman aywayay. Nirkur paypa nawpancho uchpata junaqpa Moisés shikarinqa. 9Say uchpatami intëru Egiptupa polvutano wayra apanqa. Saypitami chupu yurimunqa Egipto runakunacho y uywankunachöpis>>.

10 Tayta Dios nishqannölami Moiséswan Aarón jornupita uchpata shuntayarqan. Nirkurmi Faraón kaqman aywaykur uchpata Moisés altupa shikarirqan. Saymi runakunatapis uywakunatapis chupu usharqan.#Apoc. 16.2. 11Wakin runakunatanöla chupu sariykuptinmi brüjukunapis Moisésta witipäyarqannasu.

12Yapaypis Tayta Diosmi Faraónpa shonqunta chukruyäsirqan. Saymi Moiséswan Aarón nishqanta Faraón cäsukurqansu. Sayno karqan Moisésta Tayta Dios nishqannölami.

Runtu tamya kashqan

13Saypitami Moisésta Tayta Dios nirqan: <<Waray tutala aywaykur Faraónta ninki: <Hebreo runakunapa Tayta Diosninmi nin: Adoramaq aywayänanpaq kuyashqä runakunata kachariy. 14Mana kachariptikiqa kananyaq castigashqäpitapis masraqmi castigashayki. Saynölami castigashaq mandäsishuqnikikunata y intëru Egiptucho taq runakunatapis. Sayraqmi noqala kay pasacho munayyuq Dios kashqäta tantiyanki. 15Munarqa maynami qamtapis intëru Egipto runakunatapis fiyu qeshyawan ushakärasïmanna karqan. 16Sayno kaptinpis maysaycho taq runakuna munayyuq kashqäta musyayänanpaqmi qamta ushakäsishkäsu.#Rom. 9.17.

17<< <Mana tantiyakushpaykimi kuyashqä runakuna adoramaq aywayänanta michaykanki. 18Saymi waray junaq kayno höra runtu tamyata tamyasimushaq. Say tamyanöqa manami Egipto nación qalaykushqanpita kananyaqpis kashsu. 19Kanan uywaykikunata jukla wayi rurinman qaykasiy. Wayi rurinman mana amparakuq kaqtaqa uywatapis runatapis lapantami runtu tamya wanusinqa> >>.

20Saymi Faraónpa wakin kaq mandäsiqninkunaqa Tayta Dios nishqanta cäsukur ashmayninkunatapis uywankunatapis wayi rurinman qeshpisiyarqan. 21Wakinmi isanqa Tayta Dios nishqanta mana wiyakuyashpan waqtalacho kachaykuyarqan.

22Saymi Moisésta Tayta Dios nirqan: <<Runtu tamya tamyamunanpaq makikita jana pasapa joqariy. Say runtumi chanqa Egiptucho kaykaq lapan runakunaman, uywakunaman y chakracho mikuykunamanpis>>.

23Nishqanno jana pasaman Moisés tukrunta joqarkuptinmi intëru Egiptuman Tayta Dios maqakasimurqan, räyusimurqan y runtu tamyata tamyasimurqan. 24Saymi runtupis maqakuypis mana chawaypa karqan.#Apoc. 8.7; 16.21. Saynöqa manami imaypis Egiptucho karqansu. 25Saymi say runtu tamya intëru Egiptucho runakunatapis uywakunatapis wanusirqan. Chakracho mikuykunatapis pasaypami usharqan. Jachakunatapis#9.25 Wakin runakunaqa qeru niyan. intëru Egiptucho qarapächulatami kachaykurqan. 26Sayno tamyaykarpis Israel runakuna taykäyashqan Gosén partimanmi isanqa charqansu.

27Saymi Moiséstawan Aarónta qayaykasir Faraón nirqan: <<Noqa y lapan Egipto runakunami jusayuq kaykäyä Tayta Dios kayno castigayämänanpaq. 28Tayta Diosta manakuyay maqakuytapis runtutapis chawäsinanpaq. Kananqa kachariyäshaykinami Tayta Diosta adoraq aywayänaykipaq>>.

29Sayno niptinmi Moisés nirqan: <<Kay markapita yarqushqä höra makïta jana pasaman joqarkur Tayta Diosta manakuptïmi runtupis maqakuypis chawanqa. Saynöpami musyankipaq kay pasapis Tayta Diospa munaynincho kashqanta. 30Sayno kaptinpis musyämi qampis ni mandäsishuqnikikunapis Tayta Diosta mana mansapakuyashqaykita>>.

31Say runtu tamyawanmi shikshiraykaq cebädapis y tukturaykaq lïnupis chipya ushakäyarqan. 32Trïgutawan centënatami#9.32 Centëna trïgu niraqmi kaykan. isanqa qepa muruy kaptin usharqansu.

33Markapita yarquskir makinta joqarkur Tayta Diosta Moisés manakuptinmi jinan höra runtu tamyapis maqakuypis chawarqan. 34Tamyapis, runtupis, maqakuypis chawaskiptinnami Faraón y mandäsiqninkunapis shonqunkunata chukruyäsiyarqan. 35Saymi Israel runakuna Tayta Diosta adoraq aywayänanta Faraón munarqannasu. Sayno karqan Moisésta Tayta Dios nishqannölami.

Currently Selected:

Éxodo 9: qvhB

Highlight

Copy

Compare