Daniel 2

Mandaq Nabucodonosor sueñushqan

1Ishkay watana Nabucodonosor rey kaykarmi yapay yapay saylata sueñurqan. Saymi fiyupa lakikur punuytapis tarirqansu. 2Sueñushqan imapaq kashqantapis wilayänanpaqmi rey qayasirqan musyakuqkunata, brüjukunata, rikakuqkunata y qoyllar estudiaqkunata. Lapan qayasishqankuna nawpanman shuntakaskiyaptinmi 3rey nirqan: <<Sueñushqä imapaq kashqantapis mana musyarmi fiyupa lakish kaykä>>.

4Saymi say yachaq runakuna arameo idiömacho niyarqan: <<¡Qamla imayyaqpis rey kaykulay! Sueñushqaykita wilaykayälämay imapaq kashqantapis wilayänäpaq>>.

5Sayno niyaptinmi rey Nabucodonosor paykunata nirqan: <<Manami wilayäshaykisu. Imata sueñushqäta y imapaq say suëñu kashqantapis mana wilayämaptikiqa pedäzu pedäzu kusuyäshunaykipaq y wayikikunatapis juchusir ushayänanpaqmi ordenashaq. 6Mayqaykipis imata sueñushqäta y imapaq say suëñu kashqantapis wilayämaptikimi isanqa churayäshayki lapan runakuna respitayäshunaykipaq. Say jananmanmi imaykatapis kamaripäyäshayki. Kanan jukla wilayämay imata sueñushqäta y imapaq sueñushqätapis>>.

7Sayno niptinmi yapay niyarqan: <<Tayta rey, imata sueñushqaykitapis wilayämaptikiqa sueñushqayki imapaq kashqantapis wilayäshaykimi>>.

8Saymi rey Nabucodonosor nirqan: <<Imata sueñushqätapis manami wilayäshaykisu. Qamkunaqa niq tumpalami tiemputa perdiykäsiyämanki. 9Sueñushqäta mana wilayämaptikiqa lapaykitami ushakäsiyäshayki. Qamkunaqa wilanakuyashkanki lulapämar engañayämänaykipaqmi. Niq tumpalami tiemputa perdiykäsiyämanki. Kanan jukla wilayämay imata sueñushqätapis. Saynöpami musyashaq sueñushqä imapaq kashqantapis>>.

10Saymi yachaq runakuna reyta niyarqan: <<Manami pipis kay pasacho kansu imata sueñushqaykita wilashunaykipaq. Saynöpis manami mayjina munayyuq reypis musyakuqkunata, brüjukunata o qoyllar estudiaqkunata manakayämashqaykinöqa manakushsu. 11Tayta rey, manakayämashqayki aläpa ajami kaykan. Runaqa sayta manami musyansu, sinöqa dioskunalami. Isanqa paykuna manami noqansiwansu kaykäyan>>.

12Sayno niyaptinmi rey fiyupa rabyakushpan ordenarqan Babiloniacho lapan yachaq runakunata chipyaq ushakäsiyänanpaq. 13Ordinta rurarkasirmi intëru nacionpa apasirqan lapan yachaq runakunata wanusiyänanpaq. Saymi Danielta y compañërunkunatapis ashisirqan wanusiyänanpaq.

14Say ordinwanmi reyta cuidaq soldädukunapa capitannin aywarqan Babiloniacho yachaq runakunata wanusinanpaq. Say runapa jutinmi karqan Arioc. Daniel kaqman chaptinmi Danielqa shumaq yarpachakuskir 15parlapar nirqan: <<¿Imataq kash rey apurädu sayno ordenananpaq?>>

Saymi Danielta Arioc wilarqan imanir wanusinanpaq nishqantapis. 16Wilaptinmi Danielqa rey Nabucodonosorman aywaykur manakurqan: <<Ichiklata shuyaykalämay imapaq say suëñu kashqantapis wilanäpaq>> nir.

17Nirkur wayinman Daniel kutiykurmi Ananíasta, Misaelta y Azaríasta wilarqan rey imanir yachaq runakunata wanusiyta munashqantapis. 18Nirkurmi paykunata nirqan: <<Jana pasacho kaq Tayta Diosta manakuykuyälay rey imata sueñushqantapis tantiyasimänanpaq. Mana tantiyasimaptinqa Babilonia nacioncho yachaq runakunatapis y noqansitapis wanusimäshunmi>>.

19Say sakaymi Danielta Tayta Dios revelarqan Nabucodonosor imata sueñushqanta y imapaq say suëñu kashqantapis. Saymi Danielqa jana pasacho kaykaq Tayta Diosta alabashpan 20nirqan:

<<Tayta Dios, imaypis alabash kaykulay.

Qampitami yachaypis y poderpis kaykan.

21Qammi kamakäsinki ima päsananpaq kaqtapis.

Tiempukunatapis qammi kamakäsinki.

Reykunatapis churanki y trukasinki.

Yachaqkunatapis mas yachayta qonki.

Tantiyakuqkunatapis mas tantiyasinki.

22Pipis mana tantiyashqantami musyasinki.

Qampaqqa lapanpis aksichönömi kaykan.

23Unay ayllükuna adorayashqan Tayta Dios, qamtami agradëcikur alabä.

Manakushqäta wiyamarmi yachayta qomashpayki shumaq tantiyasimashkanki rey Nabucodonosor imata sueñushqantapis>>.

24Nirkurmi Ariocwan parlaq Daniel aywarqan. Arioctami rey ordenash karqan yachaq runakunata wanusinanpaq. Saymi payta Daniel nirqan: <<Babiloniacho yachaq runakunata ama wanusiysu, taytay. Saypa trukanqa reypa nawpanman pushaykamay sueñushqan imapaq kashqantapis wilanäpaq>>.

25Sayno niptinmi Arioc jinan höra Danielta pusharqan rey kaqman. Chaykasirmi nirqan: <<Tayta rey, Judápita prësu apamushqansi runakunachömi tarishkä juk yachaq maqtata. Paymi wilashunki sueñushqayki imapaq kashqantapis>>.

26Sayno niptinmi Beltsasar jutiyuq Danielta Nabucodonosor tapurqan: <<¿Rasunpaku qam wilamanki imata sueñushqätapis y imapaq say suëñu kashqantapis?>> nir.

27Sayno tapuptinmi Daniel nirqan: <<Tayta rey, sueñushqaykita ¿piraqchi tantiyasishunkiman? Manami yachaqkunapis, brüjukunapis, musyakuqkunapis ni rikakuqkunapis puëdiyanqasu. 28Sayno kaptinpis jana pasacho kaykaq Tayta Diosmi runa mana tantiyashqanta revelan. Paymi sueñuynikicho musyasishushkanki shamuq watakuna imano kananpaq kashqantapis. Kanan wilashayki sueñuynikicho imata rikashqaykitapis.

29<<Tayta rey, cämaykichömi jitaraykarqayki waray warantin ima päsananpaq kaqtapis yarpachakur. Saymi punukaskiptiki imapis päsananpaq kaqta Tayta Dios revelashushkanki. 30Manami wakin runakunapita mas yachaq kaptïsu say sueñushqaykita musyasimash, sinöqa imapaq kashqantapis musyanaykipaqmi.

31<<Tayta rey, sueñuynikichömi rikashkanki runa niraq jatunkaray monumentuta. Say monumentumi mansariypaq chipipiykar nawpaykicho ichiraykash. 32Umanmi kash qori pürupita. Qasqun#2.32 Wakin runakunaqa pëchun niyan. y rikrankunami kash qellaypita. Pachan y mama chankankunanami kash broncipita. 33Qonqurninpita usuputunyaqmi fiërrupita kash. Chakinkunanami kuwash mituwan fiërru takush kash.

34<<Rikaraykaptikimi elaqpita juk rumi say monumentu kaqman kuchpakämush. Rumi sayno kuchpamush pipis mana qarpaykämuptinmi. Fiërrupita y mitupita rurash chakinman charmi say monumentuta pakish. 35Saymi mitupita, fiërrupita, broncipita, qellaypita y qoripita monumentuta shaluskish. Usya tiempu ëracho trïguta trillaptin polvu rikakushqannömi say monumentupis polvu rikakush. Say polvuta wayra apakuptinmi imapis quëdashnasu. Monumentuta shaluq rumimi isanqa jatunkaray jirka rikakushpan intëru pasaman juntash.

36<<Saytami sueñushkanki, tayta rey. Imapaq kashqantapis kanan tantiyasishayki. 37Jana pasacho kaykaq Tayta Diosmi churashushkanki lapan reykunapitapis mas munayyuq y pïmaypitapis mas respitash kanaykipaq. 38Saynöpis qampa munaynikimanmi churamush maysaycho taq runakunata, lapan uywakunata y lapan pajaqkunatapis#2.38 Wakin runakunaqa vuelaqkunatapis niyanmi.. Tayta Diosmi churashushkanki paykunapa mandaqnin kanaykipaq. Saymi sueñuynikicho rikashqayki monumentupa qori uman kaykanki.

39<<Qam mandashqayki nacionkunataqa juk nacionmi vincir munaynincho sararanqa. Isanqa say nación qam mandashqayki nacionpita mënus munayyuqmi kanqa. Saypitanami juk nación shamunqa lapan nacionkunata mandananpaq. Say nacionmi broncino fuerti kar intëru kay pasata munaynincho sararanqa. 40Saypita juk nacionnami lapan nacionkunata vincir mandanqa. Say nacionmi fiërruno fuerti kanqa. Fiërru imatapis pakir ushakäsishqannömi say nacionpis wakin nacionkunata chipyaq ushakäsinqa.

41<<Tayta rey, runa niraq monumentupa chakinkuna fiërrupita y kuwash mitupita kashqantami rikashkanki. Say kaykan say ultimu kaq nación runakuna juk yarpaywan juk yarpaywan kayänanpaq kashqanmi. Sayno kaykarpis fiërruno fuertimi kanqa. 42Chaki dëdunkuna fiërrupita y mitupita kashqannömi say nacionpis aybësis fiërruno fuerti kanqa y aybësis mituno débil kanqa. 43Fiërruwan mitu chakinkunacho talukäyashqanta rikashqaykinömi say nacionpa mandaqnin reykunapis munaynincho kaykaq reykunawan pactuta rurayanqa yanapänakuyänanpaq. Sayno rurarpis fiërruwan mituta taluyta mana puëdishqansinömi say nación runakunapis munaynincho kaykaq nación runakunawan talukayta kamäpakuyanqasu.

44<<Say reykuna mandaykäyashqan wisanmi jana pasacho kaykaq kikin Tayta Dios mandar qalaykunqa. Pay mandaykashqanqa manami imaypis ushakanqasu ni paytaqa manami pipis vincinqasu. Saynöpis paymi imayyaqpis mandaq kar wakin mandaqkunata ushakäsinqa. 45Sayno kananpaqmi sueñuynikicho rikashkanki jirkapita kuchpamuq rumita. Say rumi pipis mana kuchpaykämuptin shamurmi fiërrupita, broncipita, qellaypita, mitupita y qoripita monumentuman char chipyaq shalush. Tayta rey, sayno kananpaqmi Tayta Dios revelashushkanki. Sayno päsanqa tiempun chämuptinmi. Say sueñushqayki rasunpaypami päsanqa. Imapaq kashqanta wilashqäpis rasunpaypami kaykan>>.

46Sayno niptinmi rey Nabucodonosorqa urkunpis pasaman töpashqanyaq Danielpa puntanman qonqurpakuykurqan. Nirkurnami ordenarqan saki mikuy ofrendakunata payta entregayänanpaq y inciensuwan qoshnisiyänanpaqpis. 47Nirkurnami Nabucodonosor nirqan Danielta: <<Sirvishqayki Diosmi lapan dioskunapa Diosnin y lapan reykunapa mandaqnin rey kaykan. Lapan ima päsananpaq kaqtapis revelaq karmi revelashushkanki imapaq sueñushqätapis wilamänaykipaq>>.

48Saypitanami imaykatapis qararkur Danielta rey churarqan intëru Babilonia provinciacho gobernador kananpaq. Saynöpis yachaq runakunapa mandaqnin kananpaqmi churarqan. 49Saypitanami reyta Daniel manakurqan Sadracta, Mesacta, Abed-neguta Babilonia provinciakunacho mandäsinanpaq. Kikin Danielnami quëdarqan reypa palaciuncho.

Currently Selected:

Daniel 2: qvhB

Highlight

Copy