Daniel 3

Qoripita rurash monumentuta adorayashqan

1Saypitanami rey Nabucodonosor qoripita juk monumentuta rurasirqan kimsa chunka (30) metru altuta y kimsa metru anchuta. Nirkurmi say monumentuta ichisirqan Babilonia provinciacho kaykaq Dura niyashqan pampaman. 2Saypitanami qayasirqan nacionta mandäsiqninkunata, prefectukunata, gobernadorkunata, yäsikuqkunata, tesorërukunata, juezkunata, marka autoridäkunata y provinciakunacho kaykaq wakin autoridäkunatapis. Paykunata qayasirqan monumentuta ichisishqanpita kushikur fiestata rurayänanpaqmi. 3Sayno qayasiptinmi nacionta mandäsiqninkuna, prefectukuna, gobernadorkuna, yäsikuqkuna, tesorërukuna, juezkuna, marka autoridäkuna y provinciakunacho kaykaq wakin autoridäkunapis monumentu ichisishqan kaqman lapan shuntakäyarqan.

4Saychömi wilakuq runa sinchipa qayakur nirqan: <<Intëru markakunapita y nacionkunapita shamuqkuna, tukuy niraq idiömata parlaq karpis, shumaq wiyayämay. 5Imay hörapis cornëta, këna, taksha arpa, guitärra, jatun arpa, zampöña y mas wakin instrumentukunapis waqamushqanta wiyar juk yarpayla lapayki rey Nabucodonosor ichisishqan monumentuta adorayänaykipaq qonqurpakuyanki. 6Mayqaykipis say monumentuta qonqurpaykur mana adorayaptikiqa jinan hörami fiyupa waylash jornuman qaykuyäshunki>>.

7Órden mansariypaq kaptinmi instrumentukuna waqamushqanta wiyar intëru markakunapita y nacionkunapita shamuq runakuna ima idiömata parlaq karpis qonqurpakuykur rey Nabucodonosor ichisishqan qori monumentuta adorayarqan.

8Saypitanami juk ishkay Babilonia#3.8 Hebreo idiömachöqa Caldea ninmi. Caldeaqa Babiloniapa jukaq jutinmi kaykan. runakuna aywayarqan rey kaqman. Chaykurmi Israel runakunapa contran 9Nabucodonosorta kayno niyarqan: <<¡Qamla imayyaqpis rey kaykulay! 10Qammi ordenashkanki cornëtata, kënata, taksha arpata, guitärrata, arpata, zampöñata y mas wakin instrumentukunatapis tukamuqta wiyayashpan qoripita rurasishqayki monumentupa puntanman qonqurpaykur lapanpis adorayänanpaq. 11Saynöpis ordenashkanki qonqurpakuykur monumentuta mana adoraq kaqtaqa waylash jornuman qaykasinaykipaqmi. 12Sayno ordenaykaptikipis kanmi Babilonia provinciacho mandäsiyäshunaykipaq churashqayki juk ishkay Israel runakuna nishqaykita mana cäsukuq. Tayta rey, qam adorashqayki dioskunata paykunaqa manami adorayansu. Say runakunaqa rurasishqayki qori monumentuta adorayänanpaq ordenaykaptikipis manami adoraykäyansu. Say runakunami Sadrac, Mesac y Abed-nego kaykäyan>>.

13Sayno niyaptinmi Nabucodonosor fiyupa rabyash qayasirqan Sadracta, Mesacta y Abed-neguta. Say maqtakuna reypa nawpanman chaykuyaptinmi 14Nabucodonosor nirqan: <<¿Rasunpaku qamkuna diosnïkunatapis y qoripita rurasishqä monumentutapis adorayankisu? 15Kananqa cornëtata, kënata, taksha arpata, guitärrata, arpata, zampöñata y wakin instrumentukunatapis tukamuqta wiyayashpayki jukla qonqurpakuykur rurasishqä monumentuta adorayay. Mana adorayaptikiqa fiyupa waylaykaq jornumanmi qaykasiyäshayki. Sayno ruraptï ¿ima diosraq salvayäshunki?>>

16Niptinmi Sadrac, Mesac y Abed-nego Nabucodonosorta niyarqan: <<Tayta rey, saypitaqa imatapis ama parlakushunsu. 17Waylash jornuman qaykayämaptikipis sirviyashqä Tayta Diosnïmi say jornupita y makikipitapis salvayämanqa. 18Jina mana salvayämaptinpis noqakuna manami diosnikikunata sirviyäshaqsu ni say rurasishqayki monumentutapis adorayäshaqsu>>.

Waylaykaq jornupita Tayta Dios salvashqan

19Sadrac, Mesac y Abed-nego sayno niyaptinmi Nabucodonosor pukayayparaq rabyashpan jornu waylasiqkunata ordenarqan qanchis kuti mas waylasiyänanpaq. 20Nirkurmi ali chölunnin soldädukunata mandarqan Sadracta, Mesacta y Abed-neguta pankarkur waylash jornuman qaykuyänanpaq. 21Sayno rurarkurmi say jornuman qaykuyarqan cäpantinta, lanqintinta, uman wankukunantinta y lapan jatiräyashqan mödanantinta. 22-23Qaykuyaptinmi say maqtakunaqa makin chakin pankash jornu rurinman jeqarpuyarqan. Apurä qaykuyänanpaq rey ordenaptin y pasaypa waylash jornu karmi qaykuq soldädukunata rupariykurqan. Saymi Sadracta, Mesacta y Abed-neguta qaykuq soldädukuna jukla wanuyarqan.

24Sayta rikaykurmi jamaraykashqanpita sharkurkur Nabucodonosor fiyupa espantash yäsiqninkunata nirqan: <<¿Manaku kimsan maqtakunata pankarkur jornuman qaykasishkansi?>>

Sayno niptinmi paykuna niyarqan: <<Aw, tayta rey>>.

25Saymi nirqan: <<¡Jornu rurincho chusku runakuna kachayla y mana rupakuypa puriykäyaqtami rikaykä! ¡Paykunawan kaykaq runaqa juk dios niraqmi kaykan!>>

26Saymi Nabucodonosor jornu kaqman aywaykur qayakurqan: <<¡Munayyuq Diosta adoraq Sadrac, Mesac y Abed-nego! ¡Yarqayämuy!>>

Saymi kimsan maqtakuna jornupita yarqayämurqan. 27Yarqayämuptinmi paykuna kaqman nación mandäsiqninkuna, prefectukuna, gobernadorkuna y yäsikuqkuna rikaq shuntakäyarqan. Saychömi rikayarqan say maqtakunata ichiklatapis nina mana rupashqanta. Ni aqsalanpis ni mödanankunalapis mana rupash kaptinmi ni rupa rupalapis asyäyarqansu.

28Saymi Nabucodonosor nirqan: <<Sadrac, Mesac y Abed-nego adorayashqan Dios alabash kaykuläsun. Paymi angilninta kachamush salvananpaq. Diosninman yärakurmi noqa ordenashqätapis cäsukuyashsu. Paykunaqa juk dioskunata adorayänanpa trukan wanuyänanpaqpis listumi kayash. 29Manami ima diospis saynöqa salvansu. Pï runatapis Sadrac, Mesac y Abed-nego adorayashqan Diospa contran parlaq kaqtaqa ichik ichikla roquykar ushakäsiyäsun. Wayinkunatapis rupasiyäsun. Sayno kasun may nacionpita kaptinpis y ima idiömata parlaptinpis>>.

30Saypitanami Sadracta, Mesacta y Abed-neguta Nabucodonosor churarqan Babilonia provinciacho munayyuq autoridä kayänanpaqmi.

Currently Selected:

Daniel 3: qvhB

Highlight

Copy