Daniel 1

Amïgunkunawan Babiloniacho Daniel kayashqan

1Judá nacioncho kimsa watana Joacim rey kaykaptinmi Babilonia nacionpa mandaqnin rey Nabucodonosor soldädunkunawan Jerusalénman chaykur tumaypa sapaskiyarqan. 2Tayta Diosmi kachaparirqan rey Joacimta Nabucodonosor prësu sarinanpaq y Diospa templuncho kaykaq wakin manëjukunata apakunanpaq. Saykunatami Babiloniaman apaykur diosninkunapa templuncho kaq almacén cuartuman churarqan.#2Rey. 24.1; 2Crón. 36.6-7.

3Nirkurnami eunucukunapa mandaqnin Aspenazta Nabucodonosor nirqan prësu apayämushqan wakin Israel maqtakunata palaciuman pushananpaq. Wakin maqtakunaqa Israel rey ayllumi kayarqan y wakinnami Israelcho rïcu ayllukuna kayarqan.#2Rey. 20.18; 24.10-16; Isa. 39.7. 4Say pushayashqan maqtakuna kayarqan sänu, kuyaylapaq, shumaq tantiyakuq, yachasiptin jukla yachakuq y ali yachaq. Saymi paykuna ali kayarqan reypa palaciuncho sirviyänanpaq, Babilonia#1.4 Hebreo idiömachöqa Caldea ninmi. Caldeaqa Babiloniapa jukaq jutinmi kaykan. runakuna qelqayashqankunata estudiayänanpaq y parlayashqan idiömata yachakuyänanpaq.

5Rey Nabucodonosormi ordenarqan palaciucho yanukuyashqan mikuykunata say maqtakuna waran waran mikuyänanpaq y vïnutapis upuyänanpaq. Saynöpis ordenarqan kimsa wata shumaq yachakurkur palaciucho payta sirviyänanpaqmi.

6Say akrashqan maqtakunachömi kayarqan Daniel, Ananías, Misael y Azarías. Paykuna Judápitami kayarqan. 7Paykunapa jutinta Aspenaz trukasirmi Danielpa jutinta trukasirqan Beltsasar kananpaq, Ananíaspa jutinta trukasirqan Sadrac kananpaq, Misaelpa jutinta trukasirqan Mesac kananpaq y Azaríaspa jutintana trukasirqan Abed-nego kananpaq.

8Danielmi impüru kayta mana munar yarpachakurqan reypa mikuyninta mana mikunanpaq y vïnuntapis mana upunanpaq. Saymi Aspenazta ruwakurqan say mikuykunata mana qarananpaq. 9Tayta Dios yanapaptinmi Danielqa Aspenazwan ali yachanänakuyarqan. 10Sayno ruwakuptinmi Aspenaz nirqan: <<Isanqa reytami mansapakü. Paymi nimash qamkunata ali mikuyta y ali vïnuta qaranäpaq. Wakin maqtakuna weray weray kaykäyaqta rikar y qamkunata upishyashta rikaykuyäshushpaykiqa wanusimanqachir>>.

11Sayno niptinmi cuidaqnin runatana Daniel ruwakurqan. Say runatami mandaq Aspenaz churash karqan Danielta, Ananíasta, Misaelta y Azaríasta cuidananpaq. Ruwakurmi Daniel nirqan: 12<<Ruwakuläshayki, taytay. Verdüralata y yakulata chunka junaq qaraykayälämay. 13Say chunka junaq päsarkuptin reypa mikuyninta mikuq maqtakunaman tinkusiyämanki imano kaykäyashqätapis rikanaykipaq. Paykunapita mas ali kayaptïqa manakuyashqänöla qarayämanki>>.

14Saymi cuidaq runa awnishpan manakuyashqannöla chunka junaq qararqan. 15Chunka junaq cumplirkuptinnami rey kamaripashqan mikuyta mikuqkunapitapis mas weray weray kaykäyarqan. 16Saymi maqtakunata cuidaq runaqa reypa mikuyninta ni vïnuntapis say maqtakunata qararqansu. Saypa trukanqa verdüralatana qararqan.

17Say chuskun maqtakunata Tayta Dios yachayta qormi yanaparqan Babilonia runakuna qelqayashqan röllukunata liyiyänanpaq y yachasishqankunata shumaq yachakuyänanpaq. Saynöpis Danielta yanaparqan pipis revelación chaskishqanta tantiyananpaq y runakuna imapaq sueñuyashqantapis musyananpaq.

18Rey Nabucodonosor nishqanno kimsa wata yacharkasirnami reypa nawpanman say maqtakunata Aspenaz pusharqan. 19Danielwan, Ananíaswan, Misaelwan y Azaríaswan parlaskirnami rey tantiyakurqan lapan maqtakunapitapis mas yachaq kayashqanta. Saymi paykunata churarqan yanapaqnin kayänanpaq. 20Mayjina aja kaqkunata rey tapuptin maysaycho brüjukunapita y rikakuqkunapitapis chunka kuti masmi tantiyayarqan. 21Saynöpami Danielqa Babiloniacho tarqan rey Ciro punta kaq wata mandashqan wisanyaq.

Currently Selected:

Daniel 1: qvhB

Highlight

Copy