2 Corintios 9

1Jerusaléncho kaq wawqi panikunapaq ofrendata shuntayänaykipaqqa masta tantiyasinä manami nistakannasu. 2Musyämi ofrenda shuntayta munayashqaykita. Saymi Macedonia provincia wawqi panikunata wilarqä qanyan watapita ofrenda shuntayta qalaykuyashqaykita. Sayno wilaptïmi paykunapis shuntaykäyan.

3Saynöpis kaycho kaq wawqi panikunata wilarqä qamkuna kaqman shamuptï ofrendata alistakushla shuyäsiyämänaykipaq kashqanta. Qamkunapaq sayno parlashqä manakaqlapaq kananta mana munarmi say kimsa wawqikunata kachaykämü. 4Macedoniapita wawqikunawan shamur cuidädu sayraq shuntaykaqta tariyäman. Shuntayashqaykita wilaykaptïpis manaraq shuntayaptikiqa noqapaq y qamkunapaqpis penqakuypaqmi kanqa. 5Saymi kimsaq nawpayämunqa shuntäsiyäshunaykipaq. Saynöpami shuntayänaykipaq niyashqaykinöla ofrenda listuna kanqa noqa chämur apanäpaq. Chämuptïraq shuntayaptikiqa runakuna yarpäyanqa mana munaykar shuntaykäyashqaykitami.

Yanapäkuqkunata Tayta Dios yanapashqan

6Musyashqansinöpis walkalata muruq kaqqa walkalatami shuntan. Askata muruq kaqqa askatami shuntan. 7Saynöla qamkunapis aykata ofrendayänaykipaqpis shumaq yarpachakurir kushishla ofrendayay. Shonquykikuna nanaykaptinqa ama ofrendayaysu. Kushish ofrendaq kaqtami Tayta Dios kuyan. 8Kuyayäshushpaykimi ali kaqkunata imaypis rurayänaykipaq munayninwan lapanchöpis yanapäyäshunki. 9Tayta Diospa palabranchöpis kaynömi qelqaraykan:

<<Pobrikunata imaypis milqaparkunmi.

Alilatami imaypis ruran.

Pïmaypis paytaqa respitanmi>>.#Sal. 112.9.

10Murutapis mikuytapis kamaripämaqninsi Tayta Dios bendicionninta churaykalämusun wakintapis kushishla yanapäyänaykipaq. 11Saynöpami imapis pishïyäshunkisu wakinta yanapäyänaykipaq. Qaraynikikunata chäsiyaptïmi Tayta Diosta kushishla agradëcikuyanqa.

12Saynölami ofrendata shuntayashqaykita chäsiptï Jerusaléncho kaq wawqi panikunapis mana pishïpakurna Tayta Diosta kushish agradëcikuyanqa. 13Saynöpis Jesucristupa ali wilakuyninta cäsukuyashqaykita tantiyar Tayta Diosta alabayanqa paykunata y wakinkunatapis yanapäyashqaykipita. 14Saynöpis kuyapäkuq kayninta qamkunaman churamushqanpitami Tayta Dios imaypis yanapäyäshunaykipaq lapan shonqunkunawan manakuyanqa.

15¡Tayta Diosta agradëcikushun kuyapäkuq kashqanpita! Saypita imanöpa agradëcikuytapis manami kamäpakunsisu.

Currently Selected:

2 Corintios 9: qvhB

Highlight

Copy

Compare