2 Corintios 8

Ofrendata shuntayänanpaq nishqan

1Wawqi panikuna, wilapäyäshayki Macedoniacho kaq wawqi panikunata Tayta Dios kuyapar imano yanapashqantapis. 2Paykunaqa fiyupa nakarpis y pasaypa muchuycho karpis kushishqami saysika ofrendata shuntayash. 3Kikïmi rikashkä ofrendata churayänanpaq kaqpita masta churayashqanta. Sayno churayash voluntäninkunapitami. 4Paykuna yaparir yaparirmi ruwakayämash wakin markakunacho ofrendata shuntayashqanno Jerusaléncho yärakuq mayinsikunapaq shuntayänanpaq.#Rom. 15.26. 5Ofrendata shuntarnami yarpäyashqäpitapis mas askata shuntayash. Puntataqa Señor Jesucristupa munaynincho kawayänanpaqmi promitiyash. Saypitanami imata yäsiyashqätapis Tayta Dios munashqanno cumpliyänanpaq niyämash.

6Qamkunapis ofrendata shuntar qalaykuyänaykipaq Titumi shakyäsiyäshushkanki. Saymi payta ruwakurqä qamkuna kaqman kutimur saynöla mas shakyäsiyäshunaykipaq. 7Tayta Dios alimi yanapaykäyäshunki payman yärakuyänaykipaq, shumaq parlayänaykipaq, ali yachayänaykipaq, yanapäkuq kayänaykipaq y yachasiyashqäno pïmaytapis kuyayänaykipaq. Saynöla aska ofrendata shuntayänaykipaqpis Tayta Dios yanapaykuyäläshunki.

8Wakinkuna kushish shuntayashqanta nikä manami mana munaykaqta obligarsu, sinöqa kuyapäkuq kayashqaykita pïmaypis musyananpaqmi. 9Qamkuna musyayankimi Señor Jesucristupis kuyapäkuq kashqanta. Paymi gloriacho rïcu kayninta kacharishpan kay pasaman shamur muchuqnöla rikakurqan. Sayno rikakurqan qamkunapis gloriaman char Tayta Diospa nawpancho rïcu kayänaykipaqmi.

10Kanan yäsishqäta chaskikuyay: Qanyan wata ofrendata shuntar qalaykuyashna kaykarqa 11tariyashqaykiman tupu shuntar sïguiyay. 12Lapan shonquykikunawan kushish shuntayaptikiqa ofrendayashqaykita Tayta Dios chaskiyäshunkimi. Isanqa kashlanpita shuntayay. Ama lakikuyaysu shuntayashqayki ofrenda walkala kaptinpis.

13Manami muchuyman churayta munarsu sayno nikä, sinöqa lapansipis yanapänakunansita munarmi. 14Jerusaléncho yärakuq mayinsikuna kanan muchuyaptinpis qamkunapaqa kanraqmi. Qamkuna muchuycho kayaptikinami paykunapis yanapäyäshunki. Jukninsi jukninsi sayno yanapänakurqa manami pishipakushunnasu. 15Tayta Diospa palabranchöpis kaynömi qelqaraykan:

<<Askata shuntayaptinpis manami pusurqansu.

Walkalata shuntayaptinpis manami pishirqansu>>.#Éxo. 16.18.

Yanapaqninkunawan Corintuman Tito aywayänanpaq nishqan

16Titupis noqanöla qamkunapaq yarparaptinmi Tayta Diosta agradëcikü. 17Saymi qamkuna kaqman kutimunanpaq niptï kushish awnimash. Qamkunawan kayta munarmi manaraq niptïpis shamuyta munaykan. 18Tituwanmi juk wawqitapis kachaykämü. Tayta Diospa wilakuyninta ali wilakuq kaptinmi kaycho kaq lapan wawqi panikuna niyan ali wawqi kashqanta. 19Saymi Jerusalénman ofrendata apayaptï yanapäyämänanpaqpis payta akrayash. Ofrendata chäsiyaptïnami yanapäkuq kashqansita tantiyar Tayta Diosta alabayanqa. 20Saysika ofrendata chäsiyänäpaq yanapäyämaptinmi pipis lutanta parlanqasu. 21Tayta Diospa nawpanchöpis y runakunapa nawpanchöpis alilatami rurayta munä.

22Tituwanmi mas juk wawqitapis kachaykämü. Paypis Tayta Dios munashqanno kawaq wawqimi. Ali chaskiyänaykipaq kashqanta musyarmi paypis yanapäyäshunaykipaq kushish shamuykan.

23Tito pï kashqantapis tapuyäshuptiki wilayanki noqawan wilakur puriq kashqanta. Manami noqalata yanapämänanpaqsu sayno purin, sinöqa qamkunatapis yanapäyäshunaykipaqmi. Saynöla paywan shamuq ishkay wawqikunapita tapuyäshuptikipis wilayanki kaycho kaq wawqi panikuna paykunata kachayämushqanta y Cristo munashqanno ali kawaykäyashqanta. 24Qamkuna kaqman chäyämuptin paykunata shumaq chaskiykuyälay. Saynöpami maysaychöpis wawqi panikuna musyayanqa nishqänöla kuyapäkuq kayashqaykita.

Currently Selected:

2 Corintios 8: qvhB

Highlight

Copy

Compare