2 Corintios 7

1Kuyay wawqi panikuna, Tayta Dios sayno nikämashqaqa lapan jusansikunata kacharishun. Jusalikurqa cuerpunsitapis espïritunsitapis qanratansimi. Sayno kaykaptinqa Tayta Diosta mansapakur pay munashqanno imaypis kawashun.

Pablo yäsishqanta chaskikuyashqan

2Wawqi panikuna, yarparkayälämay, ari. Qamkunata manami mayqaykitapis sakyayashkäsu ni lulapäyashkäsu ni engañayashkäsu. 3Qamkunata sayno nikä manami manakaqman churarsu, sinöqa nawpata nishqänöpis qamkunata kuyayämi. Saymi imaypis mana qonqaypa yarparäyäshayki. 4Nishqäkunata chaskikuyänaykipaq kashqanta tantiyarmi qamkunaman yärakü. Saymi ima päsamaptinpis lakikunäpa trukan seqaypa kushikü.

5Macedonia provinciaman chäyashqäpita pasa manami jamaytapis tariyashkäsu. Saypa trukanqa runakuna conträ sharkuyaptin y qamkunapaq y Titupaq yarpachakurmi fiyupa lakikuyashkä. 6Sayno kaykäyaptïmi Tito chämuptin lakish kaykaqkunata shakyäsiq Tayta Dios shakyäsiyämash. 7Manami Tito chämushlanpitasu kushikuyashkä, sinöqa qamkuna kaqpita Tito kushish kutimushqanpitapis kushikuyashkämi. Paymi wilayämash qamkunaman watukaq shamunäta munaykäyashqaykita, jaqayäsinakushqansipita#7.7 Wakin runakunaqa qallayäsinakushqansipita o resientikasinakushqansipita niyanmi. lakikuyashqaykita y noqapaq yarpachakuykäyashqaykitapis. Sayno wilayämaptin masraqmi kushikuyashkä.

8Apasimushqä cartata liyir lakikuyashqaykita musyarpis manami pësaküsu. Qelqamushqä hörami isanqa pasaypa lakikurqä cartacho nikashqäta liyir lakikuyänaykipaq kashqanta yarpar. 9Kananqa seqaypami kushikü. Manami qamkunata lakikasishqäpitasu kushikü, saypa trukanqa tantiyakur Tayta Diosta cäsukuyashqaykipitami. Cartata apasiyämushqä manami manakaqlapaqsu kash, sinöqa Tayta Dios munashqanno lakikuyänaykipaqmi.

10Tayta Dios munashqanno lakikurqa jusalikuyta wanakunsimi. Jusalikuyta kachariqkunatami Tayta Dios perdonan. Sayno perdonta tarirqa manami lakikunsinasu, sinöqa kushikunsimi. Mana criyiqkunami isanqa lakikurpis jusalikuyta mana kacharir wanushno kaykäyan.

11Tayta Dios lakikuyman churayäshushqayki alipaqmi kash. Saymi kananqa perdonta manakayämashkanki, conträ sharkuq runapaq rabyanäyashkanki, Tayta Diosta mansapakuykäyanki, noqawan tinkuytana munaykäyanki, noqapaq yarpachakuykäyanki y jusayuq runata corrigiyashkanki. Sayno kayaptikimi tantiyakuyä lapanta sitiunman churayashqaykita.

12Say apasimushqä carta manami conträ sharkuq runata corrigiyänalaykipaqsu ni noqa kushikunaläpaqsu kash, sinöqa tantiyasiyashqäta chaskikur rasunpaypa kuyayämashqaykita [y noqapis qamkunata kuyashqäta] Tayta Diospa rikanancho tantiyayänaykipaqmi. 13Kuyayämashqaykita musyarmi seqaypa kushikuyashkä. Isanqa masraqmi kushikuyashkä Tituta ali chaskikuyashqaykita y shakyäsiyashqaykipita kikin wilayämaptin.

14Manaraq qamkuna kaqman Tito shamuptinmi payta shakyäsirqä <<paykuna alimi chaskiyäshunki>> nir. Say nishqänölami lapanpis kamakash. Saymi qamkunata imaypis rasun kaqta nishqäno qamkunapaq payta nishqäkunapis rasun kaqla kash. 15Kananqa Titupis qamkunapaq yarparaykan cäsukuyashqaykipita y payta ali chaskikuyashqaykipitami. 16Saynölami yärakuypaqna kayashqaykipita noqapis kushikü.

Currently Selected:

2 Corintios 7: qvhB

Highlight

Copy

Compare