2 Corintios 6
6
1Wilakuqnin karmi qamkunata ruwakuyä kuyapäkuq Tayta Diosta mana yupaytupäyänaykipaq. 2Palabranchöpis kaynömi qelqaraykan:
<<Kuyapashqä hörami manakamashqaykita wiyashkä.
Salvanäpaq kaq junaqmi qamta salvashkä>>.#Isa. 49.8.
Tayta Dios kuyapäyäshunayki höraqa kanan hörami kaykan. Tayta Dios salvayäshunayki junaqqa kanan junaqmi kaykan.
Imano nakarpis Pablo wilakushqan
3Noqakuna wilakuyashqäta pipis manakaqman mana churayänanpaqmi imatapis lutanta rurayäsu. 4Saypa trukanqa Tayta Diosta sirviq kayashqäta tantiyakuyänanpaqmi pay munashqannöla kawayä imano nakarpis, ima pishïyämaptinpis, fiyupa lakikurpis, 5astayämaptinpis, carcilman wichqayämaptinpis, maqayämaptinpis, utikash wilakurpis y punuyta mikuyta mana tarirpis. 6Saynöpis Tayta Diosta sirviq kayashqäta tantiyakuyänanpaqmi mana jusalikuypa kawayä, wilakuyninta shumaq tantiyakuyä, chikimaqnïkunata perdonayä, pïmaytapis kuyapäyä, Espíritu Santupa munaynincho kawayä, pipaqpis ali shonqu kayä, 7Diospa wilakuyninta wilakuyä y pay yanapäyämaptin imatapis alita rurayä. Conträ sharkuyaptinpis pay munashqanno alilatami rurayä.
8Wakin runakunami ali rikayäman y wakinnami mana ali rikayäman. Saynöpis wakinmi favornï parlayan y wakinnami conträ rimayan. Rasun kaqlata parlayaptïpis lulakuyashqätami yarpäyan. 9Wakinqa reqiykäyämarpis manami reqiq tukuyämansu. Ushakäyashqäta yarpäyaptinpis kawaykäyäraqmi. Chikiyämashpan nakasiyämarpis manami wanusiyämashsu. 10Lakish karpis kushishlami kawaykäyä. Pobri karpis askaqta rïcuyäsiqnömi kaykäyä.#6.10 Askaqta rïcuyäsiqnömi kaykäyä nishqanqa askaqtami wilapäyä Jesucristupa ali wilakuyninta imayka riquëzatano chaskiyänanpaq ninanmi. Imäkuna mana kaptinpis noqakunapami lapanpis kaykan.
11Corintucho taq wawqi panikuna, lapan shonqükunawan kuyarmi imatapis mana pakaypa lapan yarpäyashqäta wilapäyashkä. 12Qamkunata kuyar mana qonqaypa yarparaykaptïqa ¿imanirtaq qonqaykayämashkanki? 13Saymi wamräkunatano niyäshayki: Noqakuna kuyayashqäno qamkunapis kuyayämashpayki yarparkayälämay.
Tayta Diospa templun kashqansi
14Wawqi panikuna, musyayashqaykinöpis manami pipis törutawan ashnuta yügunsu. Saynölami qamkunapis Jesucristuta mana chaskikuqkunawan yügushno kayankimansu. Ali ruraypis manami mana ali ruraywan tinkunsu. Aksi kashqanchöpis sakay manami kansu. 15Jesucristupis Belialwan#6.15 Belialqa Satanásmi kaykan. manami tantiyanakuyansu. Saynölami Jesucristuta chaskikuqkunawan mana chaskikuqkunapis tantiyanakuyansu. 16Saynöpis Tayta Diospa templunman ïdulukunata jamasiyashqan manami alisu kaykan. Noqansiqa imayyaqpis kawaq Tayta Diospa templunmi kaykansi.#1Cor. 3.16; 6.19. Palabranchöpis Tayta Dios nikan:
<<Paykunawanmi täshaq.
Paykunawanmi purishaq.
Paykunapa Diosninmi kashaq.
Paykunami kuyashqä runakuna kayanqa>>.#Lev. 26.12; Eze. 37.27.
17Mastapis palabrancho nikan:
<<Jusalikur kawaq runakunapita witikuyay.
Paykunapita yarqukuyay.
Imatapis impüruyäsikuqkunata ama yatayaysu.
Sayno kawayaptikimi chaskiyäshayki.#Isa. 52.11.
18Qamkunapa taytaykimi kashaq.
Qamkunami wamräkuna kayankipaq.
Lapanpaq munayyuq Tayta Dios karmi sayno nï>>.#2Sam. 7.14; 1Crón. 17.13; Jer. 31.9.
Currently Selected:
2 Corintios 6: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
