Esusën Uan ismiaid 15

Nuquin Papan abëd icquidon cuidtequid 7ted ismiaid

1Adshumbic Nuquin Papan cuidte tantiamenuen abuc dacuëdampamboshëcquid padpiden utsitsen ismeuaposhi. Adoac isquin matses natiamequin cuidtequid Nuquin Papabëd icquido 7ted icsho ispombi. Aidon ambi chiacpadombuen ënquimbi matses icsaquido natiamequin cuidsho isash Nuquin Papa nëishacbuedi bëdanendac, quequin tantiaquin aden ismeposhi.

VI. CUIDTE 7TED ICQUID ISMIAID

(15.2—16.21)

Ushquin isacbimbuen isuaid

2Ambobidi chian dapa mad caidbiecquid actepenquio yec acte actectsëcquio icquidi nëdënquepambuec icsho ispombi. Aid cuëmambi matses nidtoash tabadposh. Aido bëdi dapabimbuecquid acte ëquëducuësh chobuedën: Iuanu, cauidaido neposh. Bëdi dapabimbuecnuc nacnenaid tantiatiapimbo icquido aido neuaposh. Utsi utsiec aid cuëmëdaidbimbuecquid chuiquin dada uaquin bësenu, cac: Padi, quequido neposh. Adec abi tantiaquido icsho Nuquin Papan meniaid tintincate cuëdënmec tabadposh. 3Moises Nuquin Papan namiaid yec cuëdënampicpadec cuëdënquin Obecabimbuecquid tantiaquin naden chiec cuëdëncuededposh:#15.3 Moises cuëdënte iste bunquin Buan. 15.1-18 isbanta.

Mibi nadatiambocquin nabanquidquio nec.

Abitedimbo uaquidquio yec abitedishun Icbombo mibi nec.

Matsesën naid abitedi tantiaquin abimbo chuiquin bëdambuec tabadmetiadquio mibi nec.

Nidaid utsi utsiec yacno tabadquidon Chuiquid Tapambo mibi nec.

4Matses abitedishun: Nuquin Icbo dacuëdampambo icquid neque. Aidquio tantiec cuëdënnuna.

Adembidi: Mibiuidtsëqui bëdamboshë yec icsaisa nec, quequin mibi tantiendac.

Mibiuidtsëqui icsaisambo nec.

Adsho issun nidaid utsi utsiec yacno tabadquid matses abitedi chochoshon: Mibi bëdambocquid yec Cun Icbombo mibi nec, caindac.

Adquid icquin mimbi chiacpadombuen icsaquido cuidquimbi mibi tantiaquido mimbi bëdambuen isendac,

quec cuëdëncuededposh.

5Adsho istanquin abuc isaquien isadaidbon: Nuquin Papa tabadte nec, quequin Ambi shubumpi uampicpadquid shubumpi shëcniadsho ispombi. 6Aid shubumpi yacnouëshquio Nuquin Papan chiacpaden naquido umbi isbued Nuquin Papabëd icquido 7ted puduen puduemposh. Aido icsambuen naquid matses cuidquido neposh. Dashcute bëchish nibëdquid nacnacquio icquid dasiuidcuededash shocosh bëshpiu bëshpiucquid odo caid nacnenaid isquid isquidquiocquid shictonquecuededposh. 7Adsho issun Nuquin Papabëd icquid dadanobi ëshëcquid abentsëcshun dëshote shocosh bëshpiu bëshpiucquid odo caid nacnenaid icbo icbuen Nuquin Papabëd icquid abentsëc menebamposh. Uënëstiapimbocquid icquin Nuquin Papan nëishënquioshon cuidte cushtoaid dëshote neposh. 8Adnubien abitedi uaquidquio yec nadatiambocquid icquin nac Nuquin Papa Tabadte shubumpi nuntanuësh pushud pushudpambo icposh. Adec dacuëdampambuecsho isash Nuquin Papa chuinuec puduedtiapimbo icposh. Nainquin matses cuidan padpidec puduedtequid nec, quequin Nuquin Papabëd icquido 7tedshun ismeposhi.#15.8 Abitedishun Icbombo yec dacuëdampambocquid icquin ambi tantiacpadombuen icsaquido uesquin cuidendac utsibon: Padi, cuidenda, cadtiapimbo icquin, camenuen aden ismepanëdash.

Currently Selected:

Esusën Uan ismiaid 15: mcfNT

Highlight

Copy

Compare