Esusën Uan ismiaid 14

Obecabimbuecquidbëta Nuquin Papan tantiamiaido ismiaid

1Adoshombic padpiden ismiac Obecabimbuecquid macuësh tapa Sion caid mannanënquio nidtosho ispombi. Aidbëd abi tantiaquido dadpenquio 144 midted tabadposh. Cuna nec, quequin cudasquin Obecabimbuecquidën cuëmëdquidbëta aton Papan cuëmëdquid dada uaquin bësebanaido neposh. 2Adsho tantiamiac abucuësh acte chododoquiacbimbuec cuëdtonobi abu tesquianniacbimbuec cuëdtosho tantiombi. Tintincate dadpen icbo icbuen sananquin cuëdënmiacbimbuec cumapenec cuëdposh. 3Adec Nuquin Papa aton tsadte dapan tsadacnombo chochoash tabadec cuëdënte chucan cuëdëncuededposh. Tsësiobobëtan dadanobi ëshëcquido 4ted icquidon ambobidi tabadquin tantianuc cuëdëncuededposh. Aido nidaidën tabadsho abi icsaid bedshunquin bëdambuen isaido icquin 144midted icquidonuidtsëqui aid cuëdënte chuca tantianuc utsibon tantiatiapimbo icposh. 4Aido nidaidën tabadec: Icsamane, queshun utsibon papa canun nacnenaid tantienquiocquido neposh. Adembidi utsibon Obecabimbuecquid tantiatiapimbo icnubi aid tantiaquidombo icnëdaid neposh. Adquid icquin Obecabimbuecquid ënenquio icquin abi nidacsho tsibanquin tantiaquidombo neposh. Adnëdaid icquin nëish iua pichicaquin ismiacbimbuen Nuquin Papabëta Obecabimbuecquid cuishoncamequioposh.#14.4 Utsibon papa caid tantienquio icquin aidbimbuecnuc nacnenaid ismec danëshën sebudshun chuiquido tantiamenuen chuipanëdash. 5Aido bëdambuec tabadnëdaido yec utsibon: Muaquin icsambuen chuishunesabo nec, quequin ismeposhi.

Nuquin Papabëd icquid utsi 3tedshun chiaid

6Aden ismeboshombic utsitsen ismiac Nuquin Papabëd icquid uicchun shucshucquec cuenacbimbuec abuc cuensho ispombi. Bënnudtiapimbo icquid Nuquin Papan Chiaidquio matses nëidted yacnocquido chuinuec neposh. Nëidic nidaid utsi utsiec yacno tabadquido. Nëidic matses utsi utsiec tabadquido. Nëidic onquete utsin utsinquiec onquequido. Nëidic shubu dadpen icquid utsi utsiec yacnocquido. 7Adec abuc cuenquimbi cumapenec cuëdquin naden chuibemposh: Nuquin Papauidtsëqui tantiata. Abu yec nidaid yec acte dapa mad caid yec nidaidënuësh acte pududquequid yec quenuc uaquid bëdamboshëcquid nec. Aidpadquid utsi nibëdec, quequin aidquio tantiata. Nëbi Ambi Chiaid niac niacquido cuidquieque, quequin abuc cuenquimbi chuibemposh.

8Adnubien Nuquin Papabëd icquid utsintsen abia choquid tsibanquin naden chuibenuaposh: Shubu dadpen icquid Babidonia yacnocquido aton shububëta nibëdanmendac. Ambocquidon acte paë uaid acmiac tantiadenshun matses utsibo abitedi Nuquin Papa tantiamenquio icquin icsamequioposh. Adec icsamianquid icsho Nuquin Papan uesquin cuidquiendac, quequin chuibemposh.#14.8 Ënden Esus choabi icnubi shubu dadpen icquid Babidonia yacnocquidon icsambuenshë napampic. Aid tantiate bunquin Ede. 50bëta Ede. 51 isbanta. Uanën shubu dadpen icquid Doma yacnoquido icsambuenuidi nasho tantiaquin Babidonia capampic.

9Adnubien Nuquin Papabëd icquid utsitsen abuc cuenuaposh. Adec cuenquimbi aidëntsen nua cuëdquin naden chuibenuaposh: Tantia. Chuinu. Bëdi dapabimbuecquid acte ëquëducuësh chobued tantiaquin aidbimbuecnuc nacnenaid tantiaquid icsho aton chuiquid icsamboshë icquidën chiacpadec utsi utsiec bësiadcuedednubi utsi utsiec mësiadcuededposh. 10Adquido yec icsamboshë icquidën iuabo icsho aton icbobëtabi Nuquin Papan nëishënquioshon chian annëdënquequid asupede icsambo nuadacno nësecaquin cuidquiendac. Obecabimbuecquidbëtan abëd icquid bëdamboshëcquidon isnubi Nuquin Papan aden cuidquiendac. 11Ënëdenquio yec mëyadnuc cuidacnouësh nuamboshë abuc nidec pushudtoposh. Aden Nuquin Papa chieshënquidquio bëdi dapabimbuecquid acte ëquëducuësh chobued tantiec aid cuëmëdquid siadaido icsho Nuquin Papan cuidquiendac. Aden cuidac: Padi. Ubi cuidenda, cac: Ai, quenquio icquin adembi ënenquio icquin cuidquiendac, quequin Nuquin Papabëd icquidën chuibemposh.

12Mibi padquid adoendac, quequin chiaid icnuc ënenquio icquin Nuquin Papa tantiaquiota. Aden tantiaquin mimbi nabocpadombuembi chieshtoenquio icquin ambi chiacpadombuenuidi nabanquin Esus tantiaquid icquin Nuquin Papa tantiaquiota, quequin chuiposhi.

13Adnubi abucuësh onquequin naden chuiuaposhi: Naden chuiquin dada uata. Chieshtoenquio icquin aton Icbo Esus tantiaquido icsho uënësuac bëdambo iquendac, quequin chuiposhi.

Adsho tantiashien Nuquin Papan Mayantsen: Ai, abimbo caic. Aido uënësash bëdamboshë yacno tabadec shubitiapimbo iquendac. Natiamiantequid nibëdec, utsibon chieshënte nibëdec, quiacnombo tabadmequin: Mimbi bëdambuen naoc, caindac Nuquin Papan bëdamboshë icmequin, quequin chuiposhi.

Nuquin Papan ënquin cuidtequid chiaid

14Adoshombic padpiden ismiac abu ushunquio matsesbimbuec isadquid tsadsho ispombi. Aidi Matsesën Tishaid Nuquin Papan Chomiaid yec chuiquid tapan mauetembo shocosh bëshpiu bëshpiucquid odo caid nacnenaid mauec tsadquimbi chështe uenquebudquid cuënumboshëcquid sanamposh.#14.14 Nuquin Papan Chiaid tantiaquidonquio naden chiec: Uanën Esus ispanëdash, quequin chiec. Utsibon Nuquin Papabëd icquid nepanëdash, quequin chiec. Daniedën adquidbimbuecsho ispampic. Dan. 7.13 ista. 15Adnubien Nuquin Papabëd icquid utsintsen Nuquin Papa tabadte shubu dapa yacnouësh choquin cumapenec onquequin abu ushun tsadquid chuiposh: Nëbi nidaidën icquid sinaid icsho chështe uenquebudquidën tebanquin sando. Nuquin Papan tantiacpadequi sinaque. Nëbimbobi nata, caposh.#14.15 Aden matses cuidte Oedën ispampic. Oed 3.13 ista. 16Adoaquien abu ushun tsadbuedën chështe uenquebudquidën sinaidtedi tebanquin sandoposh.#14.16 Aden Nuquin Papan tantiacpadombuen abi tantiaquidotedi bedshun abi yacno Esusën buanendac, camenuen aden ismepanëdash.

17Adnubien Nuquin Papabëd icquid utsitsen abuc Nuquin Papa tabadte shubu dapa yacnouëshquiobidi chouaposh. Aidëmbidi chështe uenquebudquid cuënumbocquid sanamposh. 18Adec choshobien matses cuidquid Nuquin Papabëd icquid utsintsen Nuquin Papa bëdambuen ismenuen nëish iua pichicate dayunuësh choquin cumapenec cuëdquin chuiposh: Shancuimbiecquid uba caid sinaque. Chështe uenquebudquidën mëtebanquin sandoshon buan, caposh. 19Adoaquien Nuquin Papabëd icquidën aton chështe uenquebudquidën uba caid mëtebanquin sandoshon: Ma tishtishnu, queshun abi tishtishte dapa nuamboshë yacno buanshun sandoposh. Adombuen uesquin cuidnuen Nuquin Papan matses icsambo icquido bëmendac, quequin tantiamenuen aden ismeposhi. 20Aden abi tishtishten sandonon shubu nibëdacno buanshun sandoshon uba tishtishac chododoquec intac nuamboshë yamposh. Aid intac acte chëuëdacbipambuec cabachun ëcbid yacnombo cuësquec intac chëuëdsho ispombi. Ënapen 300 quidometedo cactiombi cuësquec nuamboshë chëuëdsho ispombi.#14.20 Edusaden yacno chochomeshun ashunquio Nuquin Papan cuidac matsesën intac nuamboshë chididiquec nua mauanendac, quequin aden ismepanëdash.

Currently Selected:

Esusën Uan ismiaid 14: mcfNT

Highlight

Copy

Compare