Esusën Uan ismiaid 16

7ted cushtobanaid ismiaid

1Abi tabadte shubu yacnouëshquio Nuquin Papambo nëishash cumapenec cuëdquin abëd icquid 7ted icquido dëshoten cushtoaid bedbuedo naden chuisho tantiapombi: Matses yacno nidshun 7ted dëshoten cushtoaid nidaidën chiuinquin matses uesquin cuidta, quequin chuiposh.

Dëshote sietetedi cushtoaid

2Adoaquien Nuquin Papabëd icquid abentsëcshun ambi bedbued dëshoten cushtoaid nidaidën chiuimposh. Adnubien umbi isbued bëdi dapabimbuecquid acte ëquëducuësh chobued tantiaquin abibimbuecnuc nacnenaid tantiaquido yec aid cuëmëdaidbimbuecnuc dada uamequin siadmiaido yec chiuë dapa paëmboshëcquid datsadcuencuededposh.

3Adnubien Nuquin Papabëd icquid utsintsen ambi bedbued dëshoten cushtoaid acte dapa mad caid nëchiuimposh. Adoaquien intacposh. Matses cuessunniaidën intacbimbuecnuc intacuaidën acten icquidtedi uënësbudneposh.

4Adnubien Nuquin Papabëd icquid utsintsen ambi bedbued dëshoten cushtoaid nidaidënuësh acte ushumbo pududquequidbëta acte utsitedi nëchiuimbenneposh. Aden nëchiuimbenniac aidtsen intacposh. 5Adosho issun Nuquin Papabëd icquid utsin acte dayun uaquidën Nuquin Papa naden chuiposh:

Aden mimbi chiaid niaquesambo icquin mimbi chiacpadombuen naisabo cuidsho issun: Mibi bëdamboshë iquec, caimbi.

Mibi icsaisambo nec Papa. Adquid icpampidi mibi nëbi nibëdantiapimbocquid nec.

6Umbi oncamiaidobëta ubi tantiaquido chieshënquin nua intac mëyanmequin cuessun secabudniondash, queshun

cuessun secanquido cuidquin mimbi ambi acaid acte intacuashunquin acmiacsho issun mibi bëdamboshë iquec, caimbi,

queposh.

7Adnubien Nuquin Papa ismequin nëish iua pichicate dapa yacnouësh onquequin naden utsintsen chuiposh: Ai, abimbo mimbi caic, Papa. Abitedishun Icbombo yec nadatiambocquidquio mibi nec. Adquid icquin matsesën naidtedi mimbi tantiec. Icsambo icquidon naid abimbo chuiquin mimbi aido cuidec, quequin Nuquin Papa chuiposh.

8Adnubien Nuquin Papabëd icquid utsintsen ambi bedbued dëshoten cushtoaid badiadën uëshë bëchiuimposh. Adoaquien Nuquin Papan namiacpadec matses baded badedquiec uëshën pichiquebudneposh. 9Adec abitedi pichiquebudneshumbi Nuquin Papa icsambuen chuishumbededposh. Icsambuen nabanec tabadsho Nuquin Papan nuqui cuidquin naique. Nuqui icsambuen naid ënash aidën chiacpadec bëdambuec tabadnuna, quetiadquidëmbi chieshënquin Nuquin Papa icsambuen chuishumbededposh.

10Adnubien Nuquin Papabëd icquid utsintsen ambi bedbued dëshoten cushtoaid bëdi dapabimbuecquid acte ëquëducuësh chobued ambi namiaidobëd tabadacnombo chiuimposh. Adoaquien inchëshquioshë yec inchëshposh. Baded badiadenquio icposh. Adsho isash natiaquin matses abitedishunquio aton ana dëpebededposh. 11Aden natiamiaqui: Ambi chiaid niac niacsho Nuquin Papan nuqui cuidquin naique. Nuqui icsambuen naid ënash aidën chiacpadec tabadnuna, quetiadquidëmbi: Paëmboshë yec chiuëmianec icsambo iquec, quequin Nuquin Papa icsambuen chuishunquin chushcabededposh.

12Adnubien Nuquin Papabëd icquid utsintsen ambi bedbued dëshoten cushtoaid acte dapa Eupëdates caid nëchiuimposh. Adoaquien aid acte nua icbuedi nibëdquio yec anuesadposh. Ma matses utsi utsiec aton chuiquid tapabobëdi tsidadash uëshë choacmiuësh choquin ma potenu, queshun aden acte anuesadmeposh.

13Adnubien coqueshbimbuecquid podobitsi icsabo 3ted nëidtedshun ana shëcuënuësh chochosho ispombi. Nëidic nisi dapabimbuecquidën ana shëcuënuësh. Nëidic acte ëquëducuësh chobued bëdi dapabimbuecquidën ana shëcuënuësh. Nëidic nidaid shëcuënuësh chobuedën pais daëd icbuedën muauamequin oncamebuedën ana shëcuënuësh quec chosho ispombi. 14Aido Mayan Icsa Satanasën iuabo icquin nadatiambocquin dadpen nabanquin ismequido neposh. Matses utsi utsien aton chuiquid tapabobëtabi namenuec neposh. Aidon namiac chuiquid tapabo abitedi aton iuabobëdi tsidadash chochoendac. Nuquin Papa chieshënquin Esus tantiaquido cuessun secanuec adec chochoendac. Nuquin Papan nadatiambocquid icquin abitedi cuidte uëshënquiobi adoendac, camenuen Nuquin Papabëd icquidën aden ismeposhi.

15Aden ismebocshobi Esusënquio naden chuiposhi: Mimbi: Nëbimbobi aid choec, cacmaidquio ampe choacbimbuec choendabi. Ushenquio yacbimbuen ubi ënenquio icquin tantiec dashcute dasiuidacbimbuec icta. Dashcute dasiuidambo icsho icsambuen isnushe, quiash dasiuidacbimbuec icta, quequin chuiposhi.#16.15 Nuquin Papan Chiaid tantiaquidën naden chiec. Bëdambuec tabadte tantiamenuec dashcute quequin chuichitanëdash, quequin chiec.

16Adshumbic chuiquid tapabotedi aton sondadochedobëdi chochoash macuësh yacno tsidadsho ispombi. Aid macuësh isadaidbon onqueten Admaquedon quequin cuënaid neposh.

17Adnubien Nuquin Papabëd icquid utsintsen ambi bedbued dëshoten cushtoaid nibëdacnobi abuc chiuinquin Nuquin Papan cuidte ënquimbi ismeposhi. Aden chiuinnubien abi tabadte shubu yacnouëshquio Nuquin Papa cumapenec cuëdec: Nëbi ënquimbi cuidombi, queposh. 18Adnubi bedbedquetannepambuec matses nua cuëdec tantiadnuc abu tesquiannenuc natiamboshë shëcshëcquembuec nidaid ishcudamposh. Nuquin Papan tauambuen matses uambi adec nidaid ishcudenquio yec bëdiactsëc nidaid ishcudtednedi cumapenquiec ishcudamposh. 19Adnubien matses dadpen icquid shubu dadpen icquid Babidonia caid yacno nidaid abichobi icbuedi cuëshë dapa 3ted yanec tiadbudcuemposh. Aden Nuquin Papan: Ambocquido icsamboshë icquido nec, quequin Babidonia yacnocquido uesquin cuidquioposh. Adec nidaid uëdëquec ishcudnubi nidaid utsi utsiec yacno shubu dadpen icquid yacno yacnombuec shubu abitedi uesadec chimeshadbudneposh. 20Adec nidaid uëdëquec ishcudnubien acte dapa mad caid yacno acte nënantan nidaid nacnëdquidbëd nidaidën icquid macuësh tapa abitedimbo nibëdquio yamposh. 21Adnubi abucuëshquio ue dapa choacbimbuec ue tsasi dapa nuacquid 40ted quido udictsëc icquid dadpenquio paëdbudnequin matses tishtishbudneposh. Aden ue tsasi dapan tish tishmequin cumapenen cuidsho issun padenquio ictiadquidëmbi matsesën Nuquin Papa icsambuen chuishunquin chushcabededposh.

Currently Selected:

Esusën Uan ismiaid 16: mcfNT

Highlight

Copy

Compare