Codinto 2 5

Nuquin Papabëd tabadte iquendac, quiaid

1Nuquitedi shububimbuecquido nec. Adquid yec nuquin dada shënibudash uënësash nuquin dada nibëdnuc abi yacno Nuquin Papabëd tabadec dada chuca uaid nuqui iquendac. Dada chuca uaid matsesën nacnenacmaid nec, quequin nuquitedi tantiec. 2Nuquin Papa yacno abuc nidabi yec uëshquequid nuqui nec. Adbuedi abi yacno nidacsho dada chuca uaid yec ënëdenquio yec nuqui tabadendac, quequin nuqui tantiec. 3Uënësash nuquin dada chodquendac. Nuquin Papa yacnoshon dada chuca uaid yec nuquin dada chodquec nibëdantiapimbo iquendac. 4Nuquin dada chodquequid icnuc uinmabudash uëshquec nuqui tabadec. Cun dada chuca uaquin chodquesa icmepashuni. Uënësesa icnu, quec nuqui tabadec. 5Ubipadquid icmequin uënësesa icmendambi, quequin tantiaquin Nuquin Papan aton Mayan meniaido nuqui nec.

6Aden aton Mayan meniaido icquin nuqui abimbo tantiec. Nuquin dada chodquetequid icnuc Nuquin Icbobëd tabadenquio yec uanombo iquebi, quequin nuqui tantiec. 7Nëbi Nuquin Icbombo isenquio icquimbi ënenquio icquin: Abi iquec, quequin nuqui abimbo tantiec. 8Aden tantiec bëdambo iquebi. Dada chodquetequid icquimbi: Badedquio chodquesa icmepashuni. Cun Icbobëd tabadec nidnu, quequintsen nuqui tantiec. 9Aden tantiec nidaidën tabadquimbi Nuquin Papan chiacpaden naic tabadnuna. Adec tabadash abi yacno nidash ambi chiacpadembidi naic tabadendabi, quequin nuqui tantiec. 10Matsesën nabanaidtedi chuibante uëshë chonoc Nuquin Icbon nuqui nabanaidtedi chuibanendac, quequin tantiembi. Ambi chiacpaden naquido abëdi tabadmequimbic icsambuen naquido natiamequin cuidendac.

Ma utsibotsen abi tantiaquid icpanu, quequin chuibanaid

11Adec Nuquin Icbo dacuëdampambocquid icsho ma aidën chiacpadec tabadquin ma tantianu, queshun matses tantiamequin chuibante bunebi. Adosho umbi naidtedi Nuquin Papan tantiec. Adembidi ma mimbitsen umbi naid tantiapanu, quec tsadebi. 12Aden tantiaquin: Mibi bëdambo iquec, ma ubi canu, quequin mibitedi chuiquin dada uainquio iquembi. Bëdambuec tabadquid danmianquidon ubi icsambuen chuisho tantiashun: Ma Pabado bëdambocquid nepayoc, quequin ma aido chuinu, queshun mibitedi chuiquin dada uaic nebi. 13Aido: Pabado tantiadenash onquec, quenubi Nuquin Papan chiacpadombuen nabanembi. Nuquin Papa bëdambo iquec, ma mibitedi quenu, queshun bëdambuen tantiaquid icquin mibitedi chiec nebi. 14Esuquidistun tantiaid icquin ënenquio icquin naden chuibanquid nebi. Matses abitedi tantiec abided cuidadec Esuquidistu abentsëqui uënëspanëdash. Adquid icnuc uënësacbimbuen aid tantiaquid icquin nuqui bunaid nainquio iquendac, quequin nuqui tantiec. 15Adec matses abitedi cuidmenquio icnuec Esuquidistu uënëspanëdash. Adashic uincuempanëdash, queshun aid tantiaquin uënësacbimbuen nuqui icsambuen nabambued ënshun nuqui tantiacpadombuen nainquiocquin Esusën chiacpadombuen nanuna.

16Aden Esus tantiabenash tantiesabo onquiacpadec onquenquio nuqui iquec. Ënden Esus caic: Matsesi nec, quequin icsambuen chiec onquiondaidi nëbi: Nuquin Papan Madombo nec, quequin nuqui tantiec. 17Adquid icnuc Esuquidistubëd abentsëc yacbimbuec tabadquid yanash matses utsibimbuec chucambo yanec. Ënden Esus tantiesabon tantiacpaden ambibi tantiaquin icsambuen nabuedi Esuquidistun tantiamiac aid tantiaquid yanash bëdambuec tabadcuenec. 18Nuquin Papan ambi tantiacpaden namiaido nec. Esuquidistunuidtsëqui Nuquin Papa matses bëdambuen ismec. Adquid icquin ubi bëdambuen ismequin umbi Nuquin Papa bëdambuen ismete chuibenneta, caid nebi. 19Naden chiec nebi. Matsesën icsambuen naid bedshunash abided cuidadec Esuquidistu uënëspanëdash, quequin tantiaquin: Ma aidquio utsibon tantiapanu, queshun ambi Nuquin Papa bëdambuen ismete chiaid chuibanquido nebi. 20Esuquidistun: Umbi naid chuibenneta, caido ubitedi nebi. Adquido icquin umbi chuibannubi Nuquin Papan: Aidon chiaid tantiata, caido icquin abi tantiaquid yanshun: Umbi icsambuen naid bedshunash Esuquidistu abided cuidadpanëdash, quequin Nuquin Papabëd tabadte bunquin mimbi icsambuen naid ënshun Esuquidistu tantiaquiota. 21Ambi cuidtiadquidi nuqui icnubi Esuquidistu icsambuen naisa icshobi Nuquin Papan abided cuidmepanëdash: Cun Mado tantiaquidotedi icsambuen naisabimbuecnuc bëdambuen isembi, queshun.#5.21 Ëndenquimbo Esus tishabi icnuc Isayasën Esus abided cuidadte chuipampic. Ambi dada uaid Isa. 53.6bëta 9 is.

Currently Selected:

Codinto 2 5: mcfNT

Highlight

Copy

Compare