Codinto 2 4

Esuquidistu chuibennequido chiaid

1Nuquin Papa bëdamboshëcquidën ubitedi bëdambuen isquin: Esuquidistu chuibenneta, caid icquin chieshtoenquio icquin aidi chuibanquido ubitedi nec. 2Icsambuen nash dacuëdec ompodquidën nacbimbuen nainquio iquembi. Bëdambocquid danmianenquio icquin Nuquin Papan Chiaid utsi uaquin chuibanquin matses mua uainquiocquin abimbo chuibanembi. Aden umbi abimbo chiac tantiaquido yec: Pabado icsambuen naquid nec, quetiapimbo icnubi adembi bëdambuen chuibanembi. Nuquin Papan nuquitedi isec, quequin adembi abimbo chuibanembi. 3Esuquidistu chuibansho utsin utsinquien pamunacbimbuen tantiatiapimbo iquec. Adquido Nuquin Papabëd tabadtiapimbo iquendac. 4Ad icnuc: Nuquin Papapadquidquiobidi bëdamboshëcquid Esuquidistu nec, quequin chuibansho tantiaquido icnushe, queshun icsambuen namianquid icquin Mayan Icsa Satanasën pamunacbimbuen utsi utsien tantiamenquio iquec. 5Umbi naid tantiamenuen chuibanesa nebi. Esuquidistu Nuquin Icbo nec, quequin chuibanquidquio nebi. Aid tantiaquid icquin mibitedi tantiamenuen chuiquin mibi nashunquid ubitedi nec. 6Taëecquiobi ëndenquimboshë: Inchëshquio icbuedi uëshëmbo yanta, capampic Nuquin Papan. Adombuembidi Nuquin Papan Chiaid pamumëdacbimbuen tantienquiocbuedi Nuquin Papan tantiamiaido nebi. Esuquidistu aton Papapadquidquio bëdamboshëcquid nec, quequin tantiaquin utsibo chuibanquido nebi.#4.6 Nuquin Papan: Uëshëmbo icta, quiaid iste bunquin Ene. 1.3 ista. Esus Nuquin Papan tantiamianquid nec, quequin Isa. 9.2 ista.

Natiamiantequid icnubi chieshtoenquio icquin Esus tantiate chiaid

7Aden Nuquin Papan Chiaid bëdamboshëcquid chuibanquid nebi. Ubibi nidaid ushu bedshun matsu nacnenacbimbuen matses uaid icshobi Nuquin Papan nadatiambocquin nabanquin Esuquidistu chuibennequid icmiondashi. Adquid icmiacsho issun: Pabadon ambembi naic, matsestedishun cainquio iquec. 8Aden chuibanquid icsho chieshënquin mëyanaqui abi chuibennequid nebi. Badedbadedquien natiamiaqui: ¿Atotsimbi napeba? quequi chieshtoenquio iquebi. Nuquin Papan ubi bëdambo icmec. 9Ubi chieshënquido matses dadpen icnubi Nuquin Papan ubi bëdambo icmequidën ubi nianenquio iquec. Cumapenen cuestanquin: Uënësosh, queshun nianaqui uënësabi icquin abi Esuquidistu chuibenembi. 10Ubi nidacnoshombi Esus mëyanquin uënës uanëdacpaden mëyanquin uënës uatsen uënës uatsenshobi Esusën bëdambo icmedennioshi. Adoacsho issun: Uënësash uincuennëdaid Esusën bëdambo icmequin dayacquio icmedenniaid nec, quequin utsibon isbededebi. 11Adembi Esuquidistu chuibansho chieshënquin uënës uatsiashi, quequin tantiaquimbi abi chuibennec nebi. Esusën ubëd icquin chieshtomenquio icquin dayacquio icmiac chuibansho utsibon adembidi tantiabededec. 12Aden chieshënquin mëyanac uënëstsenshumbi abi Esus chuibanquid nebi. Aden chuibanac Esus tantiabenec chuca uaid yanash aidbëd ënëdtiapimbo yec tabadtequid mibitedi nendac.

13Nuquin Papan Chiampid nad iquec: Ambi chiacpadombuen Nuquin Papan naindac, quequin tantiabenshun chuibanombi, quepampic. Adombuembidi aid tantiaquin Esuquidistu nuqui chuibennec.#4.13 Cuëd. 116.10 tantiaquin nëid dada uapanëdash. Min onqueten nibëdnubi chotaquën Cuëd. 116.10 ista. 14Nadembidi tantiaquin chuibennequid nebi. Nuquin Papan Esuquidistu uënësacsho uincuenmenëdacpaden abëdi tabadmenuen mibitedibëtabi ubitedi uincuenmeshun abi yacno tabadmendac, quequin tantiaquin chiec nebi. 15Ma Esus tantiasho Nuquin Papan bëdambuen isaido yec mibitedi bëdambo icpanu queshun chuibansho mëyanaid nebi. Mëyanaqui: Utsi dadpen Esuquidistu tantiaquido ma yannu, queshun chuibennec nebi. Aden chiac abi tantiaquido dadpen yansho issun: Mimbi naidtedi bëdambo iquec, Papa, quequin ma utsibontsen mibi onqueten bëdambocquid chuipanuna, caimbi.

16Adquid icnuc chieshtoenquio icquin cun dada shënibudec tsësiobudquimbi badiadquidën badiadquidënquien Nuquin Papan namiac Esuquidistu tantiaquid icbuedi Esus tantiaquidquio yanebi. 17Nuqui natiamiaidtedi ënëdendac. Natiamiaid icbuedi Nuquin Papa yacno tabadec bëdamboshë nuqui iquendac. Uënësesa yanash ënëdenquio yec tabadendabi, quequin nuqui tantiec. 18Aden tantiec: Ubi natiamiaid iquec, queshumbic: Nuquin Papabëd tabadendabi, quequin dacuëdenquio icquin tantiec tsadebi. Umbi isaidtedi ënëdendac. Padnuen umbi isacmaid ¿mitsipadquien icpec? quequin tantiaquiembi. Nuquin Papa yacno tabadec uënësesa iquendabi, quequin nuqui tantiendac.

Currently Selected:

Codinto 2 4: mcfNT

Highlight

Copy

Compare