Codinto 2 6
6
1Nëbi ubitedi Nuquin Papan: Umbi Chiaid chuibenneta, caido nebi. Adquid icquin: Nuquin Papa matses bëdambuen ismenuen Esusded cuidpanëdash, quequin Nuquin Papan Chiaid umbi chiac pamumëdacbimbuec tantiate bunenquio yec tabadenda. 2Nuquin Papan chuiquin dada uamiampid nad iquec:
Umbi tantiacpadën mimbi: Mibi tantiembi, quesho mibi bëdambuen isendambi.
Aden mibi cuidenquiocquin ubëd tabadtequid icmequin mibi bëdambuen isquin nashunendambi,
quequin chuipampic. Aden Nuquin Papan chiampicpadombuen nëbi bëdambuen tantiata. Nëbi Nuquin Papan mibi cuidenquio icquin mibi bëdambuen isquin abëd tabadmete uëshë neque. Ai, cata. Nëid uëshëmbobi ambi bëdambuen iste uëshë nendac.#6.2 Isa. 49.8 tantiaquin nëid dada uapanëdash.
Chuibennesho Pabado natiamiaid
3Icsambuec tabadquin umbi chuibanac: Muasho tantiatiapibi, quenushe, quiash ubëtan chuibanquid utsibobëd bëdambuec tabadquin ismembi. 4Nuquin Papan namiaido yec nadec tabadebi. Natiamiantequid icnuc chieshenquio yec dayacquiocquin Ambi Chiaid chuibanec bëdambuec tabadebi. Cuna nibëdnubi bëdambo iquebi. Chieshënquin natiamiaidquio yequi bëdambo iquebi. Piucquid nibëdsho menenquio yaqui bëdambo iquebi. 5Utsin cueshcanten cacuesmiaqui bëdambo iquebi. Quënën tsadunmiaqui bëdambo iquebi. Nuquin Papan Chiaid chuibansho utsibo dadpenshun chushcabededaqui bëdambo iquebi. Cumapenec chonoadbudequi bëdambo iquebi. Utsi tantiaquin nabanec natia ushcasmashi bëdambo iquebi. Bunequi bëdambo iquebi. 6Adquid icnubi icsambuen nainquio iquembi. Nuquin Papan Chiaid tantiaquidquio nebi. Tantiatiapimbo yec utsibo tabadshobi aido bëdambuen isquin adembidi Nuquin Papan Chiaid chuibennec nebi. Adembidi: Nashunquin chiac tantiabentsiash, queshun adquid nashunembi. Nuquin Papan Mayan Bëdan tantiamiaid yec bëdambuec tabadquin ismembi. Muainquio yec utsibobëd tantiananquiec bëdambuec tabadebi. 7Nuquin Papa nadatiambocquidën namiac Ambi Chiaid abimbo chuibanec bëdambo iquebi. Natiamiantequid icnubi: Ma utsibon ambi icsambuen naid ëmpanu, queshun ënenquio icquin abimbo chuibanec nebi. Utsibon: Icsambuen naquid Pabado nec, caqui adembidi Nuquin Papan chiacpadombuen nabanembi.
8Utsin utsinquien ubitedi bëdambuen isquin bëdambuen chuinubi utsibon ubi icsambuen chuishunaqui bëdambo iquebi. Bëdambuen chiaqui: Muaquid nec, quenubi abimbo chuiquidquio nebi. 9Ubi isquidombi ambi isacmaidbimbuecnuc isaqui bëdambo iquebi. Ubi uënës uate bunquin mëyanaqui abi capucuennebi. Ubi cuidquin mëyanmequimbi cuessunnenquio iquec. 10Uënësquio icmiaqui bëdambo iquebi. Cuna nibëdnubi: Ma Esuquidistu tantiaquido utsibo dadpen icnu, queshun chuibanec bëdambo iquebi. Cuna nibëdec, quiashic: Nuquin Papa yacno abitedi cuna nec, quequin tantiec bëdambo iquebi.
3. Codinto yacnocquido bëdambuec isnante chiaid
(6.11—7.16)
11Cun utsibo, mibitedi codinto yacno tabadquid icsho tantiaquioquin umbi nabanaid chuitiapibi, quenquio icquin ubi natiamebuedtedi mibi chuibanombi. 12Mibitedi tantiaquioquin umbi tantiaidtedi chuibanquid ubi icnubi mimbi tantiaidtedi mimbi ubi chienquio iquec. 13Amën aton bacuëbo chiacbimbuen mibi chiec nebi. Ubi tantiaquioquin mimbi naidbëta mimbi tantiaid ompoenquio icquin ubi chuiban, caimbi.
Esuquidistu tantiesabëtan icsambuen nainda, quequin chiaid
14Esuquidistu tantiesabëtan icsambuen nainda. Uëshëmbocquidbëd inchëshquiocquid bëdambo ictiapimbo iquec. Adacbimbuec bëdambocquidbëd icsambocquid bëdambuec tabadtiapimbo iquec. 15Esuquidistubëd Mayan Icsa Satanas bëdambuec isnantiapimbo iquec. Adecbidi Esuquidistu tantiaquidobëd Esus tantiesabo bëdambuec tabadtiapimbo iquec. 16¿Matsesën ambibi nacnenshun papa caid tantiaquidta aton Mayan Nuquin Papan meniaid icpadic? Padenquio. Abi tantiaquid yec abi tabadtequid nuquibi nec. Adec Nuquin Papa uënëstiapimbocquidbëd tabadtequido nuqui nec. Nuquin Papan dada uamiampid nad iquec:
Ubi tantiaquidobëd iquendabi.
Aidobëd capuendabi.
Aidon Papa caid nendabi.
Aido cun matses nendac,
quepampic Nuquin Papa.#6.16 D.N.Ch. 26.12 tantiaquin nëid dada uapanëdash.
17Nadembidi chuiquin Nuquin Icbon dada uamepampic:
Ubi tantiesabobëd tabadenquio yec cuenta.
Umbi: Mishtemaid nec, caid mishenda.
Adec icsambuen nainquio yec tabad.
Adquid: Ubëd iquec cho, caindambi.#6.17 Isa. 52.11 tantiaquin nëid dada uapanëdash.
18Mibitedishun Papa caid nendabi.
Adquid icquin: Mibitedi umbi: Cun mado nec. Cun champi nec, caido iquendac,
quec Nuquin Papa nadatiambocquid,
quequin chuiquin dada uapampic.#6.18 Sam.2. 7.8bëta Sam.2. 7.14 tantiaquin nëid dada uapanëdash.
Currently Selected:
Codinto 2 6: mcfNT
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
