Han Kãme 22

1“inh kanhkã', ijóg', isỹ ãjag mỹ inh jykre kãmén ke vẽ,” he mũ.

2Kỹ ag tóg ti tỹ Hebreu vĩ ki ag mỹ vĩ mẽg mũ sir, kỹ ag tóg katy' he mũ sir.

3Kỹ tóg ag mỹ: “tỹ sóg Judeu nĩ. Ẽmã tỹ Tarso tá inh mur, ga tỹ Cilícia tá,” he mũ. “Ẽmã tag ki sóg hã ra mog, kỹ Gamaliel tóg inh kanhrãn. Inh mỹ tóg ẽg jógjóg ag jykre tó kãn, kỹ sóg to tar ja nĩ. Topẽ jykre to sóg tar pẽ ja nĩgtĩ, ãjag tỹ ũri han mũ ri ke. Topẽ jykre hỹn, he sóg tĩ gé, ẽg jykre ẽn to, hã ra sóg kygnẽ. 4Hã kỹ sóg Jesus mré ke ag to jũ pẽ ja nĩgtĩ. Ag kãgtén sór ja inh nĩgtĩ, ũn tỹtá fag ke gé. Ag sigse ja sóg nĩgtĩ. 5Topẽ tũ to pã'i mág vỹ ki kanhró nĩ, kófa ag kar ke gé. Ag hã tóg inh mỹ vẽnh rá han ja nĩgtĩ, sỹ Damasco ra tĩg jé, tá ẽg mré ke ag mỹ ven jé. Tá sóg Jesus mré ke ag sigse sór ja nĩ gé, Jerusalém mĩ ag tatĩ kãtĩg jé, tag ki ag vóg kónãn jé,” he tóg, Paulo ti.

Paulo tỹ ti tỹ Jesus ki rã kãmén

(Hk 9.1-19; 26.12-18)

6“Isĩg kỹ sóg Damasco tá jun mũ. Kỹ vãhã jẽngrẽ tar pẽ tóg inh ki kómkóm ke mũ. Kanhkã tá ke vẽ. Rã tỹ ẽg nĩno kã sa ra tóg ke mũ. 7Kỹ sóg kutẽ mũ. Kỹ sóg vẽnh vĩ mẽg mũ, kỹ tóg inh mỹ: “Saulo', Saulo', ã tỹ ne jé isũ ag vóg kónãn nẽ?“ he mũ. 8Kỹ sóg: “ã tỹ ũ nĩ?“ he mũ. Kỹ tóg inh mỹ: “tỹ sóg Jesus nĩ, Nazaré tá ke ẽn,” he mũ, “ã tỹ ũn vóg kónãn sór tĩ ẽn hã vỹ tỹ inh nĩ,” he tóg. 9Inh mré mũ ag vỹ jẽngrẽ ẽn vég mũ. Hã ra ag tóg ũ tỹ inh mỹ vĩ mũ ẽn vĩ mẽg tũ nĩ.

10Kỹ sóg ti mỹ: “kỹ sỹ hẽ ri kenh ke nẽ?“ he mũ. Kỹ tóg inh mỹ: “Damasco ki rã. Tá ũ tóg ã mỹ tó kãn mũ, ã tỹ nén han ke ti,” he mũ. 11Hã ra sóg nén ũ vég tũ nĩ, jẽngrẽ ẽn tar tãvĩ nĩn kỹ. Kỹ inh mré mũ ag tóg inh nĩgé kãgmĩ kỹ inh pére mũ mũ. Hã ki ẽg tóg Damasco tá junjun mũ sir.

12Kỹ ũ tỹ Ananias he mũ ẽn tóg inh venh kãtĩ mũ. Moisés tỹ ẽg mỹ vẽjykre nĩm ja ẽn han kãn tóg tĩ. Damasco tá ke kar vỹ ti to vĩ há han mũgtĩ, Judeu ẽn ag kar. 13Ẽn tóg inh venh kãtĩ mũ, kỹ tóg inh mỹ: “régre', Saulo', inh ki ẽvãnh,” he mũ. Kỹ sóg vẽsỹmér ti vég mũ sir. 14Kỹ tóg inh mỹ: “ẽg jógjóg ag Topẽ vỹ ã kuprẽg, vãsỹ, ã tỹ ti jykre ki kanhró nĩ jé, ã tỹ ũn kuryj nĩ ẽn ve jé, Cristo ẽn. Ti hã tóg ã mré vĩnh mũ,” he mũ. 15“Ã tỹ vẽnh kar mỹ ã tỹ nén vég mũ tónh ke vẽ, ã tỹ nén mẽg mũ ti. 16Kỹ ẽmẽ kã nĩ tũg nĩ. Jẽgnẽ ra, ã tỹ kype kỹ jẽ jé, Topẽ tỹ ã tỹ ti vĩ mranh tỹ tũ' he jé. Ti mré vĩ, ti jiji tó kỹ,” he tóg inh mỹ, Ananias ti,” he tóg, Paulo ti.

Paulo tỹ ti rãnhrãj kãmén

17“Isỹ kejẽn Jerusalém ra vỹn ke kỹ sóg Topẽ ĩn krẽm ti mré vĩ mũ. Kỹ sóg nén nẽ vég mũ. 18Ti hã vẽ, ẽg Senhor hã vẽ. Kỹ tóg inh mỹ: kur Jerusalém tá kutẽ. Ã vĩ mẽnh ke tũ ag nĩ, ã tỹ ag mỹ inh kãmén mũ ra, he mũ.

19Kỹ sóg ẽg Senhor ti mỹ: hã ra ag tóg isỹ nén han ja ki kanhró nỹtĩ. Ag sigse ja isóg nĩgtĩ. Vẽnh kanhrãn jafã krẽm sóg ag mrãnmrãn ja nĩgtĩ gé, ũ tỹ ã ki ge kỹ nỹtĩ ag, he mũ. 20Kỹ sóg ag tỹ Estêvão tén kỹ, ag tỹ ũ tỹ ã vĩ tó mũ ẽn tén kỹ tá jẽ ja nĩ gé. Kỹ tóg inh mỹ há ja tĩ, ag tỹ ti tén kỹ. Ag kur ki sóg rĩr ja nĩgtĩ gé, he sóg, ẽg Senhor mỹ.

21Hã ra tóg inh mỹ: vó, ha tĩg. Kór há ra sóg ã jẽnẽnh mũ, fóg kar to, kanhgág kar to ke gé, he mũ,” he tóg, Paulo ti.

22Hã ra vẽnh kar ẽn ag tóg ẽmẽ kã nỹtĩ nĩ. Ag tỹ ti vĩ tag mẽ kỹ ag tóg prẽnprẽr mũ sir. “!..Ti tén ra..! !..Ũ tỹ ge vỹ kórég ne..! !..Ti rĩr nĩn kỹ tóg ẽg mỹ tỹ ũ nỹnh mo..!“ he ag tóg. 23Ag kur vãm ag tóg mũ, ga funfur tỹ ag tóg tũm ke mũ sir, ag jũgjũ kỹ.

24Kỹ soldado ag pã'i mág vỹ: “ĩn kã ra ti rãg,” he mũ. “Ti mrãnmrãn ra. Hã tỹ ti ki jẽmẽ. Ag tỹ hẽ ri ken kỹ ã to vĩ kónãn nẽ? hem nĩ ti mỹ,” he tóg, soldado ag mỹ. Hã ra ag tóg Paulo tỹ nén tó mũ ki kagtĩg nỹtĩ.

25Kỹ ag tóg ti ség mũ, nén fár tỹ, ag tỹ ti mrãnmrãn jé. Hã ra Paulo tóg capitão ẽn mỹ: “mỹ ã mỹ há', ag tỹ inh mrãnmrãn ke ti? Tỹ sóg Romano nĩ, hã ra ag tóg inh mrãnmrãn sór mũ, ũ tỹ inh ki jẽmẽg tũ ra,” he mũ. 26Kỹ tóg capitão mỹ e tĩ, kỹ tóg pã'i mág mỹ tónh tĩ mũ. Ti mỹ tóg: “ã tỹ ne han ke nẽ ha? Romano vẽ mỹr,” he mũ. 27Kỹ pã'i mág tóg ti to kãtĩ kỹ ti mỹ: “kỹ ã mỹ tỹ Romano nĩ'?“ he mũ. Kỹ tóg: “hỹ,” he mũ. 28Kỹ tóg ti mỹ: “isỹ tỹ Romano nĩ jé sóg jãnkamy tỹ hẽn ri ke tỹ kajãm,” he mũ. Kỹ Paulo tóg ti mỹ: “inh mur mũ kã sóg tỹ Romano nĩ hã ra,” he mũ. 29Kỹ ag tóg ti tovãnh mũ sir, ũ tỹ ti mrãnmrãn ke mũ ẽn ag. Hã ra tóg pã'i mág mỹ e tĩ. Ti tỹ ũn tỹ tỹ Romano nĩ senh ke tũ vẽ vẽ, hã kỹ tóg ti mỹ e tĩ.

Judeu tỹ pã'i ag tỹ Paulo vĩ mẽg mũ

30Tỹ vaj kỹ pã'i mág tóg Judeu ag ki jẽmẽ mãn sór mũ, ag tỹ Paulo to jũ ẽn ti. Kỹ tóg ti kavãg mũ. Kỹ tóg Topẽ tũ to pã'i mág ag jé prẽr mũ, vẽnh jyvẽn tĩ kar ag ke gé. Kỹ tóg Paulo pére tĩ mũ, ag jo ti fẽg jé.

Currently Selected:

Han Kãme 22: kgp

Highlight

Compare

Copy