Han Kãme 23

1Kỹ Paulo tóg vẽnh jyvẽn ti ag vég mũ, kỹ tóg: “inh kanhkã', vẽjykre há kar han isóg tĩ, kurã kar ki, ũri ke gé, isỹ Topẽ mĩ ẽkrén kỹ,” he mũ.

2Kỹ Topẽ tũ to pã'i mág ẽn, Ananias he mũ ẽn vỹ: “ti jẽnky ki tãnh,” he mũ.

3Kỹ Paulo tóg ti mỹ: “Topẽ vỹ ã vóg kónãn ke mũ. Jykre régre ã nĩ,” he mũ. “Inh jyvẽn sór ã tóg mũ. Hã ra ã tóg Topẽ vĩ mranh, ã tỹ ag mỹ: ti tãnh ra, hen kỹ,” he tóg.

4Kỹ tá nỹtĩ ag tóg ti mỹ: “Topẽ mỹ rãnhrãj tĩ mỹ ã tóg vĩ kónãn mũ, Topẽ tũ to pã'i mág mỹ,” he mũ. 5Kỹ tóg: “mẽ',” he mũ. “Ti tỹ tỹ pã'i mág nĩ ki sóg kagtĩg ja nĩ. Sỹ ki kanhró nĩ ra sóg ti mỹ vĩ kónãn ke tũ nĩ vẽ. Topẽ vĩ ki tag tóg rán kỹ nĩ, hã vỹ: ã povo tỹ tỹ pã'i mág nĩn kỹ to vĩ kónãn tũg nĩ, he mũ,” he tóg.

6Hã ra Paulo tóg vẽnh jyvẽn tĩ ag vég mũ. Ũ ag tóg tỹ Saduceu nỹtĩ, kỹ ũ ag tóg tỹ Fariseu nỹtĩ. Vyrmỹ ag jykre nỹtĩ. Kỹ Paulo tóg jamã há ra ag mỹ: “inh kanhkã', tỹ sóg Fariseu nĩ, kỹ inh panh tóg tỹ Fariseu nĩ gé. Topẽ vỹ ũn kãgter mũ ag rĩnrĩn mãn ke mũ, tag kri sóg fĩg tĩ, hã kỹ ãjag tóg iso jũgjũ mũ,” he mũ.

7Ti tỹ tag tó kar kỹ Fariseu ag tóg Saduceu ag mré jagnẽ vĩ kafãn mũ, jũgjũ kỹ. Kỹ ag tóg vẽnh kãpugpóv mũ. 8Saduceu ag mỹ tóg tũ tĩ, Topẽ tỹ ẽg ter mũ rĩn mãn mũ ti. Topẽ tỹ jẽnẽ jafã tóg ag mỹ tũ tĩ gé. Kỹ vẽnh kuprĩg tóg ag mỹ tũ tĩ gé. Hã ra tóg Fariseu ag mỹ nỹtĩ, vẽnh kuprĩg, Topẽ tỹ jẽnẽ jafã, ti tỹ ẽg rĩn mãn ke ti. Hã kỹ ag tóg jagnẽ vĩ kafãn mũ sir. 9Kỹ ag tóg jagnẽ to jũgjũ kỹ prẽnprẽr mũ. Fariseu ag kã mĩ ũ ag tóg jẽgnẽgnẽ kỹ, Saduceu ag vĩ kafãn kỹ: “nén ũ kórég han tũ ti nĩ,” he mũ. “Hẽn ri ke mũn ti hỹn nén ũ vé, vẽnh kuprĩg, ke tũ nĩ kỹ Topẽ tỹ jẽnẽ jafã,” he ag tóg. 10Kỹ vẽnh génh tóg kutẽ ve nĩ. Kỹ soldado ag pã'i mág tóg Paulo to jykrén mũ. “Ag hỹn gen kỹ ti janjãn ke mũ,” he tóg. Kỹ tóg soldado ag mỹ: “kur mũ jẽg, ti kãgmĩ jé, ẽg tỹ ĩn kã ra ti rãg jé,” he mũ.

11Tỹ kuty kỹ Jesus tóg Paulo mré vĩ mũ. “Kamẽg tũg ra. Jerusalém tá ã tóg inh vĩ tó há han. Ge jé ã tóg ke mũ, ẽmã tỹ Roma tá,” he tóg.

Ag tỹ Paulo tén sór

12Tỹ vaj kỹ Judeu ag tóg jagnẽ mỹ: “Paulo tén jé ẽg tóg ke mũ. Jẽn ke tũ ẽg nĩ, ẽg tỹ ti tén ke jo, ke tũ nĩ mũ ra Topẽ tóg ẽg vóg kónãn ke mũ,” he mũ. 13Ũ tỹ 40 (ke) kãfór ag vẽ, jagnẽ mré jykrén mũ ag. 14Ẽn ag vỹ Topẽ tũ to pã'i ag mré vĩnh kãmũ mũ. “Jagnẽ mré ẽg jykrén. Nén ũ kãmẽnh ke tũ ẽg nĩ, ẽg tỹ ti tén ke jo,” he ag tóg. 15“Kỹ soldado ag pã'i mág mré vĩnh mũm nĩ. Ti mỹ: ẽg tỹ ti tỹ nén ũ kórég han mũ to jykrén mãn ke vẽ. Kỹ ẽg mỹ ti ven mãn nĩ, hem nĩ. Ti tỹ: he, hen kỹ ẽg tóg ti tén ke mũ,” he ag tóg.

16Hã ra Paulo ve fi kósin tóg mẽg mũ. Kỹ tóg ti mỹ tónh tĩ mũ. 17Kỹ Paulo tóg capitão ũ jé prẽr kỹ ti mỹ: “pã'i mág mỹ kyrũ tag pére tĩg, ti tỹ ti mỹ nén ũ tó jé,” he mũ.

18Kỹ capitão tóg kyrũ pére tĩ kỹ pã'i mág mỹ ti ven mũ. “Ti tỹ nẽji ã mré vĩ sór vẽ,” he tóg.

19Kỹ pã'i mág tóg vẽnh péju kỹ ti mré vẽmén kỹ ti mỹ: “ã inh mỹ ne tó sór mũ?” he mũ.

20Kỹ tóg ti mỹ: “Judeu ag tóg to jykrén, ag tỹ ã mỹ to vĩ jé, ã tỹ vaj kỹ Paulo jẽnẽ jé, vẽnh jyvẽn tĩ ag to,” he mũ. “Ón kỹ ag nẽji ã mỹ: ẽg tỹ ti mré vẽmén mãn há tóg tĩ, henh ke mũ,” he tóg. 21“Ag mỹ: he, he tũg nĩ. Ũ tỹ 40 (ke) ag tóg, ti jo vãjig mũ. Ti tén ke jo ag nẽji nén ũ konh ke tũ nĩ. Ke tũ nĩ mũ ra Topẽ nẽji ag vóg kónãn mũ,” he tóg, kyrũ ti, pã'i mág mỹ.

22Kỹ tóg ti mỹ: “ũ mỹ: ti mỹ sóg tó, he tũg nĩ. Ha jatun mỹ tĩg,” he mũ.

Ag tỹ Governador mỹ Paulo pére mũ

23Kỹ pã'i mág tóg capitão régre ag mỹ: “ãjag tũ kãnkãn ra! Ẽmã tỹ Cesaréia ra ãjag mũnh mũ, kuty tag kã 9 óra ki,” he mũ. “Kỹ soldado tỹ 200 (ke) ag vỹ ãjag mré mũnh mũ, kãvãru kri mũ tỹ 70 (ke) ag ke gé. Kỹ ũ tỹ 200 (ke) ũ ag vỹ rógro pu gé mũnh mũ,” he tóg. 24“Kỹ kãvãru ũ kri vin nĩ gé, Paulo tỹ kri nĩ jé. Governador tỹ Félix mỹ ti pére mũjẽg, ti tỹ jatun mỹ tá jun jé,” he tóg.

25Kỹ tóg Félix mỹ rán mũ, kỹ tóg:

26“Cláudio Lísias tỹ rá vẽ,” he mũ. “Isỹ Governador tỹ Félix mỹ rán hã vẽ, ã tỹ inh kãfór nĩn kỹ. Ã mỹ sóg: ã mỹ há? he mũ.

27Tag vỹ tỹ Judeu ag vẽse jẽ. Ti tén kren ag tóg. Hã ra sóg ti tỹ tỹ Romano nĩ jẽmẽ, kỹ sóg inh soldado ag mré ti kren han. 28Hã ra sóg ti kato tẽ mũ ag ki jẽmẽ sór mũ. Ag tỹ hẽ ri ken kỹ ti to jũgjũ nẽ'? he sóg. Hã kỹ sóg vẽnh jyvẽn tĩ ag mỹ ti ven mũ. 29Kỹ sóg vég mũ. Ag jykre tugrĩn ag tóg ti to jũgjũ mũ. Ũ tén ja tũ ti nĩ. Ti tỹ nén ũ to ter ke han tũ ti nĩ gé. Kỹ tóg ti tỹ nén ũ to se kỹ nĩnh ke han tũ nĩ gé. 30Hã ra sóg nén ũ mẽ gé. Ti to ag tóg vãjig mũ sir, hã kỹ sóg vẽsỹmér ti jẽnẽg mũ, ã to. Ti kato vĩ mũ ag mỹ sóg: ti hã mré vĩm nĩ, he mũ gé,” he tóg, vẽnh rán ki.

31Kỹ soldado ag tóg Paulo pére mũ mũ. Kuty tá mũ kỹ ag tóg ẽmã tỹ Antipátride tá junjun mũ. 32Tỹ vaj kỹ ũ tỹ ag pẽn kã mũ mũ ag tóg kyrãgrã mũ. Kãvãru kri mũ ag hã tóg ti pére mũ mũ, inhhã. 33Ẽn ag vỹ Cesaréia tá junjun mũ. Governador mỹ ag tóg vẽnh rá ẽn nĩm mũ. Kỹ ag tóg ti mỹ Paulo ven mũ.

34Kỹ Félix ẽn tóg vẽnh rá vég mũ, kỹ tóg Paulo mỹ: “tỹ ã ga tỹ hẽ tá ke nĩ?“ he mũ. Kỹ tóg ti mỹ: “ga tỹ Cilícia tá,” he mũ. 35Kỹ tóg: “ã kato vĩ mũ ag tỹ junjun kỹ sóg ã ki jẽmẽnh mũ,” he mũ. Kỹ tóg soldado ag mỹ: “Herodes tỹ vẽnh jyvẽn jafã krẽm ti nĩm,” he mũ.

Currently Selected:

Han Kãme 23: kgp

Highlight

Compare

Copy