Han Kãme 21
21
Jerusalém ra
1Vãhã ẽg tóg ag mỹ: “ẽg mũ sór vẽ,” he mũ. Kỹ tóg ẽg tỹ ag ré kỹ mũ kỹ ag mỹ jagy tĩ. Ge ra ẽg tóg tá pa mũ. Kỹ ẽg tóg vẽsỹmér canoa mág kã mĩ mũ mũ, goj vãso tỹ Cós kukãm. Tỹ vaj kỹ ẽg tóg goj vãso tỹ Rodes tá junjun mũ. Kar ẽg tóg ẽmã tỹ Pátara tá junjun mũ sir. 2Tá ẽg tóg canoa mág ũ vég mũ gé, ũ tỹ ga tỹ Fenícia ra tĩ mũ ẽn. Kỹ ẽg tóg ki ge kỹ kã mĩ mũ mũ sir. 3Goj vãso tỹ Chipre vég ẽg tóg mũ, ẽg jakãnh tá. Kỹ ẽg tóg ga tỹ Síria kukãm mũ mũ. Ẽmã tỹ Tiro tá ẽg tóg krỹg mũ. Ag tỹ canoa tỹ nén rĩnh kỹ tĩ ẽn tỹ tá vin han ke vẽ, ẽmã tỹ Tiro tá. 4Tá ẽg tóg Jesus mré ke ag vég mũ. Hã kỹ ẽg tóg kurã tỹ 7 (ke) ki tá nỹtĩ nĩ. Topẽ kuprĩg tỹ ag krĩn kỹ ag tóg Paulo mỹ ke mũ, ti tỹ Jerusalém ra tĩ tũ nĩ jé. 5Ge ra ẽg tóg kurã tỹ 7 (ke) tũg kỹ mũ mãn mũ. Hã ra ag tóg ẽg mré mũ sĩ han mũ, ag prũ fag mré hã ke gé. Ẽmã tá ag tóg pa mũ, ẽg mré, kỹ ẽg tóg goj fyr tá ẽg jakrĩ tỹ nỹtĩ kỹ Topẽ mré vĩ mũ. 6Kỹ ẽg tóg: “ẽg mũnh ken vẽ ha,” he mũ. Kỹ ẽg tóg canoa kã ra ge mũ. Jó ag tóg ag jamã ra vỹnvỹn ke mũ gé.
7Kỹ ẽg tóg ẽmã tỹ Tiro tá pa kỹ mũ mãn kỹ ẽmã tỹ Ptolemaida tá junjun mũ. Jesus mré ke ag vég ẽg tóg mũ sir tá. Ag mré ẽg tóg kurã pir han mũ.
8Tỹ vaj kỹ ẽg tóg tá pa kỹ ẽmã tỹ Cesaréia ra mũ mũ, ẽg pẽn kã. Tá ẽg tóg Jesus vĩ tó tĩ ũ ĩn krẽm nỹtĩ mũ, ti jiji hã vỹ: Filipe, he mũ. Ũ tỹ 7 (ke) tỹ vẽjẽn vẽnh kãpópãm ja ẽn ag kã ũ vẽ. 9Ti krẽ fag tóg 4 (ke) nĩ, ũn mén ja tũ fag. Ẽn fag vỹ Topẽ vĩ tó mũgtĩ.
10Si há tũ ra Judéia tá ke ũ tóg kãtĩ mũ, ũ tỹ Topẽ vĩ tó tĩ ti, ti jiji hã vỹ: Ágabo, he mũ. 11Ẽn tóg Paulo vẽsógfĩn ja tỹ ti nĩgé sigség mũ, ti pẽn ke gé. Kỹ tóg: “Topẽ kuprĩg tỹ tón hã vẽ, ha mẽ: ũ tỹ vẽsógfĩn ja tag tỹ tũ nĩ ẽn se jé ag tóg ke mũ, Judeu ag. Kỹ ag tóg fóg ag mỹ ti fẽg ke mũ, he tóg, Topẽ kuprĩg ti,” he tóg, Ágabo ti.
12Hã kỹ ẽg tóg Paulo mỹ: “Jerusalém ra tĩ tũg nĩ,” he mũ. Kỹ tá ke ag tóg ge mũ gé sir, ẽg mré. 13Hã ra Paulo tóg: “ãjag ne tóg kygfỹ mũ', he mũ. Inh fe ka han ãjag tóg mũ. Ag tỹ iség mũ ra tóg inh mỹ tỹ nén ũ tũ nĩ, ag tỹ isén mũ ra ke gé, ag tỹ Jerusalém tá inh vóg kónãn mũ ra, ẽg Senhor tỹ Jesus tugnĩn,” he tóg.
14Kỹ ẽg tóg vĩ mãn tũ nĩ sir. “Jesus tỹ nén han mũ vỹ tóg há nĩ,” he ẽg tóg mũ sir. 15Kar kỹ ẽg tóg Jerusalém ra mũ mũ. 16Cesaréia tá ke ũ ag tóg ẽg mré mũ mũ gé, Jesus mré ke ũ ag. Ẽg mỹ ag tóg ũ ven mũ, ẽg tỹ ti ĩn krẽm nỹtĩ jé. Ti jiji hã vỹ: Menasom, he mũ. Goj vãso tỹ Chipre tá ke vẽ. Vãsỹ tóg Jesus ki rã ja nĩgtĩ.
Paulo tỹ Tiago mré vẽmén
17Ẽg tỹ Jerusalém tá junjun kỹ Jesus mré ke ag fe tóg mrin ke mũ sir.
18Tỹ vaj kỹ Paulo tóg ẽg mré Tiago venh tĩ mũ. Kỹ igreja to kófa ag kar tóg tá vẽnh mãn mũ gé. 19Kỹ tóg ag mỹ Topẽ tỹ nén han mũ kar tugtó kãn mũ, Topẽ tỹ fóg kar krĩn mũ ti, ti tỹ ag mỹ Topẽ vĩ tón kỹ. 20Kỹ ag tóg Topẽ mỹ vĩ há han mũ. Kỹ ag tóg Paulo mỹ: “régre', Judeu tỹ hẽn ri ke ag vỹ Jesus ki ge kỹ nỹtĩ, ũ tỹ mil tỹ hẽn ri ke ag. Ẽn ag kar tóg Moisés tỹ ẽg mỹ vẽjykre nĩm ja ẽn han tĩ,” he mũ. 21“Hã ra ũ ag tóg ag mỹ ã to ón ja nĩgtĩ. Judeu tỹ fóg mĩ mũ kar krĩn kónãn ã nẽji tĩ, ag tỹ Moisés tỹ ẽg mỹ nén nĩm ja tovãnh jé. Ãjag krẽ gré fár junun kym tũg nĩ. Moisés tỹ ẽg mỹ nén nĩm ja han mãn tũg nĩ, he ã nẽji tĩ,” he ag tóg, Paulo mỹ. 22“Kỹ ẽg ne han mũ ha'? Ũ tỹ hẽn ri ke ag vỹ vẽnh mãn ke mũ, ag tỹ ã kãtĩg mẽn kỹ. 23Tag han nĩ, ha mẽ.Tag ki ũ tỹ 4 (ke) ag vỹ Topẽ mỹ promessa han kỹ nỹtĩ. 24Ag mỹ: “inh mré nỹtĩm nĩ,” hem nĩ. Ag mré vẽnh jãnhkri han nĩ. Ag tỹ vẽjãre kỹ ag jo kajãm nĩ. Kỹ vẽnh kar tóg ã jykre há ki kanhrãn mũ sir. Ũ ẽn ag tỹ ã to ón mũ ve jé ag tóg ke mũ, ã tỹ Moisés tỹ ẽg mỹ nén nĩm ja ẽn han kỹ,” he ag tóg mũ, Paulo mỹ.
25“Jó ẽg tóg fóg tỹ Jesus ki ge mũ ag mỹ vẽnh rá jẽnẽ ja nĩgtĩ. Ag mỹ ẽg tóg: Moisés tỹ ẽg mỹ nén nĩm ja ẽn han ke tũ ãjag nĩ. Ãjag tỹ nén han ken hã vẽ, ha mẽ: vẽnh kãgrá to fénhta ko tũg nĩ. Nén ũ kyvénh ko tũg nĩ gé. Nén ũ tỹ vẽsóg ki ter mũ ko tũg nĩ gé. Ãjag prũ tũ fag mré nỹ tũg nĩ gé, he ja ẽg tóg nĩgtĩ ag mỹ,” he ag tóg, kófa ag, Paulo mỹ.
26Kỹ Paulo tóg ũ tỹ 4 (ke) ẽn ag mỹ: “inh mré nỹtĩm nĩ,” he mũ. Tỹ vaj kỹ tóg ag mré vẽnh jãnhkrig mũ, Judeu ag jykre ki. Kỹ tóg Topẽ ĩn to tĩg kỹ ũ tỹ ki rĩr tĩ ag mỹ: “ag mré sóg vẽnh jãnhkrig mũ, kurã tỹ 7 (ke) ki,” he mũ sir.
Ag tỹ Paulo se
27Kurã tỹ 7 (ke) ẽn tũ ken kỹ Judeu tỹ Ásia tá ke ag tóg Topẽ ĩn tá Paulo vég mũ sir. Kỹ ag tóg jũgjũ mũ. Ti kãgmĩg ag tóg mũ, kỹ ag tóg prẽnprẽr mũ sir. 28“!..Judeu', kãmũ jẽg ra..!“ he ag tóg. “!..Ũ tỹ vẽnh kar krĩn kónãn mũ ẽn ve ra..! !..Ẽg povo to tóg vĩ kónãn mo..! !..Topẽ ĩn to tóg vĩ kónãn mo..! !..Kỹ tóg fóg ag mỹ: Topẽ ĩn kã ra ge jẽg, he ja ne..!“ he ag tóg. 29Fóg tỹ Trófimo ẽn ve ja ag tóg nĩgtĩ, Éfeso tá ke ẽn, Paulo mré tĩ mũ ẽn. Jerusalém tá ag tóg ti ve ja nĩgtĩ, kỹ ag tóg ón kỹ: “Paulo hỹn ti pére vyr, Topẽ ĩn kã ra,” he mũ.
30Kỹ ẽmã ẽn tá ke kar ag vỹ jagnẽ kato tẽgtẽ mũ sir, jũgjũ kỹ. Ag tỹ Paulo kãgmĩ kỹ ag tóg Topẽ ĩn kã tá ti kutẽm mũ. Kỹ ũ tỹ ki rĩr tĩ ag tóg ĩn nĩgfénh mũ sir. 31Kỹ ag tóg ti rẽg mũ, Paulo ti.
Hã ra soldado ag pã'i mág vỹ mẽg mũ. 32Kỹ soldado ag tóg ti mré ti to pétẽ mũ. Judeu ag tỹ soldado ag ve kỹ ag tóg sir Paulo tovãnh mũ. 33Hã ra pã'i mág tóg: ti kãgmĩ ra! Ti se ra!“ he mũ. “Ũ nẽ? Ti tỹ ne han nẽ?“ he tóg. 34Hã ra ũ ag tóg ti mỹ nén ũ tó, jó ũ ag tóg ti mỹ nén ũ tó, kỹ tóg ki kanhrãn tũ nĩ sir. Kỹ tóg soldado ag mỹ: “ẽg ĩn kã ra ti rãg,” he mũ.
35Ag tỹ sãnsãn he jafã tá junjun kỹ ag tóg ti vãg mũ. Vẽnh kar tỹ ti to jũgjũ kỹ ag tóg ti vãg mũ. 36Vẽnh kar tóg ag nón mũ kỹ: “!..ti rẽ ra..!“ he mũ, prẽnprẽr kỹ.
Paulo tỹ ag mỹ vẽnh kãmén mũ
37Ag tỹ ĩn kã ra ti rãg sór kỹ Paulo tóg soldado ag pã'i mág mỹ: “sỹ ã mré vẽmén há tóg tĩ,” he mũ. Grego vĩ ki tóg ti mỹ ke mũ. Fóg tỹ pã'i vẽ, hã kỹ tóg Grego vĩ hã tó tĩ.
38Kỹ tóg ti mỹ: “ã hã ne tóg Grego vĩ tó há nĩ',” he mũ. “Kỹ ã mỹ tỹ Egito tá ke ẽn tũ nĩ', ũ tỹ vẽnh génh han mũ ẽn', ũ tỹ mil tỹ 4 (ke) mré tĩ mũ ẽn, governo kato tẽ mũ ẽn ag mré, ẽmã tũ mĩ tĩ mũ ẽn?“ he tóg.
39Kỹ tóg ti mỹ: “hỹ,” he mũ. “Tỹ sóg Judeu nĩ. Tỹ sóg ẽmã tỹ Tarso tá ke nĩ. Ga tỹ Cilícia tá ẽmã mág kãfór vẽ, inh mur ja ti. Isỹ povo tag mré vĩnh há tóg tĩ,” he tóg. 40Kỹ tóg ti mỹ: “ha vĩ ge,” he mũ.
Kỹ Paulo tóg sãnsãn he jafã kri jẽ kỹ Hebreu vĩ ki ag mỹ:
Currently Selected:
Han Kãme 21: kgp
Highlight
Share
Compare
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
