Lamentaciones 4
4
1Li ka-oro xeꞌkꞌekoꞌ ru. Li cha̱bil oro incꞌaꞌ chic nequeꞌlemtzꞌun. Ut li terto̱quil pec li xcuan saꞌ li templo nequeꞌtꞌanaxin yalak bar saꞌ eb li be. 2Eb li cuanqueb Sión queꞌqꞌueheꞌ xlokꞌaleb junxil. Kꞌaxal lokꞌeb chiru li oro. Abanan anakcuan chanchaneb aj chic li chꞌochꞌ ucꞌal yi̱banbil yal xban cui̱nk. 3Li ixki xoj naxqꞌueheb xtuꞌ li cocꞌ ral. Abanan eb lin tenamit moco joꞌcaneb ta. Kꞌaxal joskꞌeb ban. Chanchaneb li nimla joskꞌ aj xul avestruz xcꞌabaꞌ, li nacuan saꞌ li chaki chꞌochꞌ. 4Li ruꞌuj rakꞌ eb li cꞌulaꞌal li toj nequeꞌtuꞌuc naxletz rib saꞌ reheb xban li chaki el. Eb li cocꞌal nequeꞌxtzꞌa̱ma xcua rucꞌaheb, abanan ma̱ ani naqꞌuehoc reheb. 5Eb li queꞌtzacan chak chi cha̱bil junxil, anakcuan yo̱queb chi ca̱mc xban xtzꞌocajiqueb saꞌ eb li be. Queꞌyoꞌla saꞌ biomal. Abanan anakcuan nequeꞌxyocꞌob ribeb saꞌ li mul. 6Kꞌaxal cuiꞌchic xnumta lix ma̱usilal lin tenamit chiru li ma̱usilal li queꞌxba̱nu eb laj Sodoma, li queꞌsacheꞌ ruheb saꞌ junpa̱t chi ma̱ ani quipletic riqꞌuineb. 7Eb li queꞌcꞌamoc be chiku kꞌaxal ti̱queb xchꞌo̱l junxil. Chanchaneb xsakal li nieve ut li leche xban nak kꞌaxal ti̱queb xchꞌo̱l. Kꞌaxal cauheb rib ut cꞌajoꞌ xchakꞌal ruheb. Chanchaneb li terto̱quil pec coral ut zafiro. 8Abanan, anakcuan chanchaneb chic li ru xam xban xkꞌekaleb. Ma̱ ani chic nanaꞌoc ruheb saꞌ eb li be xban nak xeꞌbakoꞌ. Lix tzꞌu̱mal xletz rib chiru lix bakeleb. Chanchaneb chic li chaki siꞌ. 9Kꞌaxal us chokꞌ reheb li xeꞌcamsi̱c saꞌ li ple̱t chiruheb li nequeꞌcam xban xtzꞌocajiqueb. Eb aꞌan timil timil nequeꞌcam xban nak ma̱cꞌaꞌ chic xtzacae̱mkeb. 10Usta queꞌxra lix cocꞌaleb, cuanqueb li naꞌbej queꞌxchik lix cocꞌal re teꞌxtzaca saꞌ eb li cutan nak queꞌsacheꞌ ruheb li cuanqueb Jerusalén. 11Quirisi xjoskꞌil li Ka̱cuaꞌ saꞌ xbe̱neb li cuanqueb Jerusalén. Quixtakla xam saꞌ li tenamit ut quilajeꞌsacheꞌ chixjunil. Joꞌ ajcuiꞌ lix cimiento li cab, queꞌosoꞌ xban xam. 12Eb lix reyeb li jalan xtenamiteb ma̱ jokꞌe queꞌxcꞌoxla nak naru teꞌoc saꞌ li tenamit Jerusalén li xicꞌ nequeꞌiloc reheb. Chi moco eb li jalan tenamit queꞌxpa̱b nak naru teꞌoc saꞌ li oqueba̱l re li tenamit Jerusalén. 13Aꞌin quicꞌulman xban lix ma̱queb li profetas ut eb laj tij. Eb aꞌan queꞌma̱cob nak queꞌxqꞌueheb chi camsi̱c aran Jerusalén li cristian li ma̱cꞌaꞌeb xma̱c. 14Eb li profeta ut eb laj tij chanchaneb li mutzꞌ nak nequeꞌxbeni ribeb saꞌ eb li be. Ut xban nak queꞌxmux ribeb riqꞌuin xquiqꞌuel li ras ri̱tzꞌin, xicꞌ nequeꞌileꞌ. Joꞌcan nak ma̱ ani na-ajoc re xchꞌeꞌbal li rakꞌeb. 15Nequeꞌxye reheb: —Elenkex chiku. Muxbil e̱ru. Ayukex. Incꞌaꞌ tojilok e̱riqꞌuin, chanqueb li tenamit reheb. Queꞌe̱lelic ut queꞌco̱eb yalak bar saꞌ jalan tenamit. Ut eb li tenamit aꞌan queꞌxye: —Ma̱ jokꞌe naru teꞌcua̱nk saꞌ kaya̱nk.— 16Xban xjoskꞌil li Ka̱cuaꞌ quixchaꞌchaꞌi ruheb ut incꞌaꞌ chic quixcꞌoxlaheb. Incꞌaꞌ queꞌqꞌueheꞌ xlokꞌal eb laj tij chi moco queꞌileꞌ xtokꞌoba̱l ruheb li nequeꞌcꞌamoc be. 17Xkasicꞌ katenkꞌanquil toj retal nak incꞌaꞌ chic xkacuy. Yo̱co chiroybeninquil nak teꞌcha̱lk chikatenkꞌanquil. Abanan li tenamit li yo̱co chiroybeninquil incꞌaꞌ xru chikatenkꞌanquil. 18Eb li xicꞌ nequeꞌiloc ke yo̱queb chixqꞌuebal ketal. Incꞌaꞌ naru noco-el saꞌ be. Xcuulac xkꞌehil li kacamic. Osocꞌ ke. 19Eb li xicꞌ nequeꞌiloc ke kꞌaxal cau nequeꞌa̱linac chiru li cꞌuch li narupupic chiru choxa. Coeꞌra̱lina toj saꞌ eb li tzu̱l ut coeꞌxram saꞌ eb li chaki chꞌochꞌ. 20Queꞌxchap li karey, li sicꞌbil ru xban li Ka̱cuaꞌ, li cꞌojcꞌo cuiꞌ kachꞌo̱l. Saꞌ kachꞌo̱l la̱o nak cua̱nk li rey aꞌan, eb li jalan tenamit incꞌaꞌ toeꞌxchꞌiꞌchꞌiꞌi. 21Chexseꞌek ut chisahokꞌ saꞌ le̱ chꞌo̱l la̱ex li cuanquex Edom ut la̱ex li cuanquex aran Uz. Chisahokꞌ saꞌ e̱chꞌo̱l anakcuan nak toj naru xba̱nunquil xban nak ta̱cuulak xkꞌehil nak te̱recꞌa xcꞌahil li raylal te̱cꞌul la̱ex. Chanchan texcala̱k ut chanchan tꞌustꞌu texcana̱k nak ta̱cꞌutekꞌ le̱ xuta̱n. 22Anakcuan la̱ex li cuanquex Sión, oc e̱re chi hila̱nc riqꞌuin li raylal yo̱quex chixcꞌulbal. Li Ka̱cuaꞌ incꞌaꞌ chic texcanab chi cꞌamecꞌ saꞌ jalan tenamit. Abanan, la̱ex aj Edom, texqꞌuehekꞌ chixtojbal rix le̱ ma̱c. Ut ta̱cꞌutu̱nk chiruheb chixjunileb le̱ ma̱usilal.
Currently Selected:
Lamentaciones 4: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
