Lamentaciones 5
5
1At Ka̱cuaꞌ, chijulticokꞌ taxak a̱cue li cꞌaꞌru xkacꞌul. Chacuil taxak xtokꞌoba̱l ku xban nak xuta̱nal xo-el. 2Eb li jalaneb xtenamit queꞌxmakꞌ chiku li kanaꞌaj li xke̱chani junxil. Ut queꞌxmakꞌ ajcuiꞌ li kochoch. 3Xocana chi ma̱ ani chic na-iloc ke. Chanchan nak ma̱cꞌaꞌ chic kayucuaꞌ. Ut eb li kanaꞌ chanchaneb chic li xma̱lcaꞌan. 4Li haꞌ nakucꞌ toj nakalokꞌ. Ut joꞌcan ajcuiꞌ li kasiꞌ lokꞌbil. 5Rahobtesinbilo xbaneb li xicꞌ nequeꞌiloc ke ut tacuajenako. Abanan, incꞌaꞌ naru nocohilan. 6Re nak ta̱cua̱nk li katzacae̱mk, xkaqꞌue kib rubel xcuanquileb li tenamit Egipto ut li tenamit Asiria. 7Queꞌma̱cob li kaxeꞌto̱nil yucuaꞌ ut anakcuan camenakeb chic. Abanan la̱o yo̱co chixcꞌulbal li raylal xban li ma̱c queꞌxba̱nu eb aꞌan. 8Eb li queꞌcuan chokꞌ lokꞌbil mo̱s junxil, aꞌaneb chic li nequeꞌtaklan saꞌ kabe̱n anakcuan. Ut ma̱ ani nacoloc ke chiruheb. 9Eb laj camsinel cuanqueb yalak bar. Xiu xiu nak nocoxic chixsicꞌbal katzacae̱mk xban nak incꞌaꞌ nakanau ma tosukꞌi̱k chak malaj ut incꞌaꞌ. 10Li katibel xkꞌekoꞌ. Chanchan li horno. Ut yo̱ katik xban katzꞌocajic. 11Queꞌxmux ruheb li kixakil nak queꞌxchꞌic rib riqꞌuineb aran Sión. Ut queꞌxmux ajcuiꞌ ruheb li tukꞌ ixk aran Judá. 12Eb li queꞌcꞌamoc be chiku queꞌbaqꞌueꞌ li rukꞌeb ut riqꞌuin aꞌan queꞌtꞌuyuba̱c. Ut eb li ac ti̱xeb incꞌaꞌ chic queꞌqꞌueheꞌ xlokꞌal. 13Eb li sa̱j cui̱nk queꞌqꞌueheꞌ chixqueꞌbal li ru li trigo. Ra sa nak nequeꞌru xqꞌuebal vue̱lt re li nimla pec li nequeꞌxqueꞌ cuiꞌ li trigo. Ut joꞌcaneb ajcuiꞌ li cocꞌal. Incꞌaꞌ nequeꞌxcuy ri̱kanquil li siꞌ xban nak kꞌaxal a̱l. 14Incꞌaꞌ chic nequeꞌcꞌojla chire li oqueba̱l re li tenamit eb li ac che̱queb. Ut eb li toj sa̱j incꞌaꞌ chic nequeꞌbichan. 15Incꞌaꞌ chic nocoxajoc xban xsahil kachꞌo̱l. Lix sahil kachꞌo̱l xsukꞌi chokꞌ rahil chꞌo̱lej. 16Ma̱cꞌaꞌ chic kalokꞌal. Tokꞌob ku xban nak xoma̱cob. 17Xban li raylal nakacꞌul, xrahoꞌ kachꞌo̱l. Ut incꞌaꞌ chic saken noco-iloc. 18Chixjunil li cuan saꞌ li tzu̱l Sión ac juqꞌuinbil. Juneseb aj chic li yac nequeꞌbe̱c aran. 19Abanan, la̱at at Ka̱cuaꞌ, la̱at li tzꞌakal rey chi junelic kꞌe cutan. Ut la̱ cuanquil cuan chi junelic. 20¿Cꞌaꞌut nak nocosach saꞌ a̱chꞌo̱l chi junaj cua, at Ka̱cuaꞌ? Ut, ¿cꞌaꞌut nak kꞌaxal najt xoa̱canab kajunes? 21At Ka̱cuaꞌ, choa̱cꞌul cuiꞌchic a̱cuiqꞌuin ut la̱o chosukꞌi̱k ta cuiꞌchic a̱cuiqꞌuin. Ut ta̱qꞌue taxak kalokꞌal joꞌ nak cocuan chak junxil. 22¿Malaj ut toa̱tzꞌekta̱na chi junaj cua? ¿Ma junelic yo̱k a̱joskꞌil saꞌ kabe̱n?
Currently Selected:
Lamentaciones 5: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
