Lamentaciones 3
3
1La̱in jun cui̱nk quincꞌul nabal li raylal xban nak yo̱ xjoskꞌil li Dios saꞌ inbe̱n. 2Cꞌajoꞌ li raylal xqꞌue saꞌ inbe̱n. Incꞌaꞌ chic us nin-el. Chanchan nak yo̱quin chi be̱c saꞌ kꞌojyi̱n ut incꞌaꞌ naxcutanobresi lin be. 3Rajlal cutan junes raylal nincꞌul. 4Xban li raylal li yo̱quin chixcꞌulbal, chanchan nak ti̱xin chic chi us. Ut chanchan tokoleb lin bakel. 5Junes raylal ut chꞌaꞌajquilal nincꞌul. Sutsu̱quin xban li raylal. 6Xban li raylal li nincꞌul, chanchan nak cuanquin saꞌ kꞌojyi̱n, joꞌ eb li camenak li ac xeꞌcam najter. 7Chanchan nak sutsu̱quin saꞌ tzꞌac re nak incꞌaꞌ tine̱lelik. Chanchan nak bacꞌbo̱quin riqꞌuin cadena kꞌaxal a̱l xban li raylal li yo̱quin chixcꞌulbal. 8Usta xinjap cue chixtzꞌa̱manquil intenkꞌanquil chiru, abanan li Ka̱cuaꞌ incꞌaꞌ xrabi lin tij. 9Chanchan nak eb li tzꞌac yi̱banbil riqꞌuin pec nequeꞌramoc re lin be. Ut incꞌaꞌ chic nintau cꞌaꞌru tinba̱nu. 10Li Ka̱cuaꞌ chanchan jun li oso malaj ut jun li cakcoj mukmu roybeninquil ani tixchap. 11Chanchan nak quinixchap ut quinixrahobtesi ut quinixcanab injunes chi ma̱ ani natenkꞌan cue. 12Chanchan nak yo̱ chinti̱canquil riqꞌuin lix tzimaj. 13Chanchan nak quinixcut riqꞌuin lix tzimaj ut kꞌaxal cham qui-oc. 14Chixjunileb li cuech tenamitil niquineꞌxhob. Rajlal cutan yo̱queb chinseꞌenquil. 15Junes raylal nincꞌul. Chanchan nak junes cꞌa chic li nintzaca. 16Chanchan nak quinixcut chiru chꞌochꞌ ut xeꞌtokeꞌ li ruch cue. Ut chanchan nak quinixtolcꞌosi saꞌ poks. 17Ma̱cꞌaꞌ chic tuktu̱quil usilal cuiqꞌuin. Ut ma̱cꞌaꞌ chic li sahil chꞌo̱lejil. 18Ma̱cꞌaꞌ chic inmetzꞌe̱u. Ut nincꞌoxla nak ma̱cꞌaꞌ chic nacuoybeni riqꞌuin li Ka̱cuaꞌ. 19La̱in nincꞌoxlac chirix chixjunil li raylal ut li rahil chꞌo̱lejil li nincꞌul. Nacuecꞌa tzꞌakal xmay li raylal li nincꞌul. 20Incꞌaꞌ na-el saꞌ inchꞌo̱l. Ut yo̱ chi chꞌina̱nc inchꞌo̱l. 21Abanan cuan jun li nacꞌojla cuiꞌ inchꞌo̱l. Ut aꞌan li nacuoybeni. 22Xban nak junelic naruxta̱na ku li Ka̱cuaꞌ, joꞌcan nak incꞌaꞌ xo-osoꞌ. Junelic naril xtokꞌoba̱l ku. 23Cuulaj cuulaj nocorosobtesi. Acꞌ chic li kosobtesinquil xban nak kꞌaxal nim li rusilal saꞌ kabe̱n. 24Li Ka̱cuaꞌ, aꞌan li natenkꞌan cue. Ut aꞌan li ninyoꞌoni. 25Li Ka̱cuaꞌ junelic cha̱bil riqꞌuineb li nequeꞌyoꞌonin riqꞌuin. Ut naruxta̱na ruheb li nequeꞌxsicꞌ xtenkꞌanquil riqꞌuin. 26Kꞌaxal us nak junak ta̱roybeni nak ta̱tenkꞌa̱k xban li Ka̱cuaꞌ. Ut incꞌaꞌ yo̱k chixcuechꞌinquil li cꞌaꞌru naxba̱nu. 27Kꞌaxal us nak junak tixcanab rib chi takla̱c xban li Ka̱cuaꞌ chalen saꞌ xsa̱jilal. 28Kꞌaxal us nak junak tixcꞌojob xchꞌo̱l ut incꞌaꞌ ta̱cuechꞌi̱nk xban nak li Ka̱cuaꞌ, aꞌan li quiqꞌuehoc re chixcꞌulbal li raylal. 29Chixcubsihak ban rib rubel xcuanquil li Ka̱cuaꞌ, xban nak toj cuan cꞌaꞌru naroybeni. 30Chixqꞌuehak chi saqꞌuecꞌ saꞌ xnakꞌ ru xbaneb li xicꞌ nequeꞌiloc re usta ta̱cꞌutekꞌ xxuta̱n. 31Li Ka̱cuaꞌ incꞌaꞌ nocoxtzꞌekta̱na chi junaj cua. 32Usta naxqꞌue xrahil kachꞌo̱l, abanan naruxta̱na ku xban nak kꞌaxal nim li ruxta̱n saꞌ kabe̱n. 33Moco yal naraj ta xchꞌo̱l li Ka̱cuaꞌ nak naxqꞌue li raylal saꞌ kabe̱n. 34Li Ka̱cuaꞌ incꞌaꞌ nacuulac chiru nak teꞌrahobtesi̱k li cuanqueb rubel xcuanquil jalan tenamit. 35Chi moco nacuulac chiru li Ka̱cuaꞌ nak ta̱makꞌekꞌ chiruheb li cꞌaꞌru reheb. 36Li Ka̱cuaꞌ incꞌaꞌ nacuulac chiru nak incꞌaꞌ narakeꞌ a̱tin saꞌ ti̱quilal. 37¿Ani ta biꞌ ta̱ru̱k tixye cꞌaꞌru tixcꞌul junak cui moco joꞌcan ta naraj li Dios? 38Nakacꞌul li us joꞌ ajcuiꞌ li incꞌaꞌ us xban nak joꞌcan naraj li Ka̱cuaꞌ. 39¿Cꞌaꞌut nak ta̱rahokꞌ xchꞌo̱l li cui̱nk xban li raylal li naxcꞌul, cui aꞌan ajcuiꞌ li yo̱ chi ma̱cobc? 40Chikaqꞌuehak retal chi us cꞌaꞌru takaba̱nu. Chikajal li kacꞌaꞌux ut chosukꞌi̱k riqꞌuin li Ka̱cuaꞌ. 41Chikaya̱ba xcꞌabaꞌ li Ka̱cuaꞌ cuan saꞌ choxa ut takaye: 42—La̱o xkakꞌet la̱ cua̱tin ut xoma̱cob cha̱cuu. Ut la̱at incꞌaꞌ xacuy kama̱c. 43Cꞌajoꞌ la̱ joskꞌil. Joꞌcan nak xaqꞌue li raylal saꞌ kabe̱n. Xoa̱canab chi camsi̱c ut incꞌaꞌ xacuil xtokꞌoba̱l ku. 44Chanchan nak xamuk a̱cuib saꞌ chok re nak incꞌaꞌ ta̱cuabi li katij. 45Xban li raylal xaqꞌue saꞌ kabe̱n, chanchano aj chic mul ut ma̱cꞌaꞌ chic noco-oc cuiꞌ chiruheb chixjunileb li tenamit. 46Chixjunileb li xicꞌ nequeꞌiloc ke nocoeꞌxhob. 47Kꞌaxal ra xkacꞌul. Xsacheꞌ ru li katenamit. Ut yo̱ kaxiu.— 48Li xyaꞌal cuu natꞌululnac saꞌ xnakꞌ cuu xban nak queꞌsacheꞌ ruheb lin tenamit. 49Incꞌaꞌ tincanab ya̱bac xban nak ma̱cꞌaꞌ nacꞌojoban inchꞌo̱l, 50toj retal nak li Ka̱cuaꞌ ta̱ril chak xtokꞌoba̱l ku saꞌ choxa. 51Cꞌajoꞌ nak nayotꞌeꞌ inchꞌo̱l xban li raylal li xeꞌxcꞌul eb li ixk li cuanqueb Jerusalén. 52Eb li xicꞌ nequeꞌiloc cue xineꞌxchap chi ma̱cꞌaꞌ inma̱c. Chanchanin li xul li quitꞌaneꞌ saꞌ jun li raꞌal ut incꞌaꞌ naru ta̱e̱lelik. 53Xineꞌxcut chi yoꞌyo saꞌ jun li chamal jul ut queꞌxtzꞌap li re riqꞌuin jun nimla pec. 54Saꞌ inchꞌo̱l la̱in nak oc cue chi subu̱nc saꞌ haꞌ. Ut quinye: —Anakcuan xin-osoꞌ.— 55At Ka̱cuaꞌ, la̱in quinya̱ba la̱ cꞌabaꞌ nak cuanquin chak saꞌ xchamal li jul. 56Cacuabi li cꞌaꞌru quinye nak quintzꞌa̱ma cha̱cuu nak tina̱col. Incꞌaꞌ xacanab yal chi joꞌcan li cꞌaꞌru quintzꞌa̱ma cha̱cuu. 57Saꞌ li cutan nak quintzꞌa̱ma intenkꞌanquil a̱cue, la̱at caye cue: Matxucuac. 58At Ka̱cuaꞌ, la̱at cat-oquen chicuix ut quina̱col. 59At Ka̱cuaꞌ, la̱at caqꞌue retal li raylal yo̱quin chixcꞌulbal chi ma̱cꞌaꞌ inma̱c. Chacol rix lin yuꞌam. 60La̱at nacanau nak xicꞌ niquineꞌril. Nacaqꞌue retal nak yo̱queb chixcꞌu̱banquil chanru nak tineꞌxcamsi li xicꞌ nequeꞌiloc cue. 61La̱at xacuabi nak yo̱queb chinhobbal. Nacanau chixjunil li cꞌaꞌru nequeꞌxcꞌu̱b chicuix. 62Nacanau cꞌaꞌru nequeꞌxye li xicꞌ nequeꞌiloc cue. Rajlal chicuix nequeꞌa̱tinac. 63Chaqꞌue retal li cꞌaꞌru nequeꞌxba̱nu. Chalen ekꞌela ut toj ecuu, junelic yo̱queb chinhobbal. 64Chaqꞌueheb chixtojbal rix lix ma̱queb, at Ka̱cuaꞌ. Chaba̱nu reheb joꞌ xcꞌulubeb xcꞌulbal. 65Chacacuubresi lix chꞌo̱leb re nak incꞌaꞌ teꞌxtau xya̱lal ut chamajecuaheb. 66Chacꞌut la̱ joskꞌil chiruheb ut chasach ruheb. Chacuisiheb saꞌ li ruchichꞌochꞌ, at Ka̱cuaꞌ.
Currently Selected:
Lamentaciones 3: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
