Ezequiel 36
36
Eb laj Israel teꞌcua̱nk cuiꞌchic saꞌ xtenamiteb
1Li Ka̱cuaꞌ quixye cue: —At ralal cui̱nk, tat-a̱tinak riqꞌuineb li cuanqueb Israel saꞌ li naꞌajej tzu̱l ru, ut ta̱ye reheb nak cheꞌrabihak li ra̱tin li Ka̱cuaꞌ. 2Aꞌan aꞌin li ninye la̱in li nimajcual Dios. Eb li xicꞌ nequeꞌiloc e̱re queꞌsahoꞌ saꞌ xchꞌo̱leb ut queꞌxye, “Anakcuan eb li tzu̱l li queꞌyi̱ba̱c najter kꞌe cutan ke la̱o,” chanqueb. 3Ta̱ye resil li cꞌaꞌru ta̱cꞌulma̱nk ut ta̱ye chi joꞌcaꞌin: Aꞌan aꞌin li naxye li nimajcual Dios. Eb li xni̱nkal ru tenamit li cuanqueb che̱jun sutam queꞌnumta saꞌ e̱be̱n ut queꞌxsach e̱ru ut xeꞌrelkꞌa li cꞌaꞌru e̱re. Joꞌcan nak quexhobeꞌ ut quexseꞌe̱c xbaneb li jalan xtenamiteb. 4Joꞌcan nak te̱rabi li cꞌaꞌru tinye la̱in li nimajcual Dios chirixeb li tzu̱l ut eb li nimaꞌ ut eb li ru takꞌa li ma̱cꞌaꞌ chic cuan chi saꞌ. Te̱rabi li cꞌaꞌru tinye chirixeb li tenamit li poꞌinbileb ru, li qui-elkꞌa̱c cꞌaꞌru reheb ut chirixeb li queꞌqꞌueheꞌ chi hobecꞌ ut chi seꞌe̱c xbaneb li xni̱nkal ru tenamit li cuanqueb chixjun sutam. 5Nak yo̱ injoskꞌil la̱in li nimajcual Dios quina̱tinac chirix li tenamit Edom joꞌ eb ajcuiꞌ li jun chꞌol chic tenamit li cuanqueb che̱jun sutam. Kꞌaxal sa saꞌ xchꞌo̱leb nak queꞌrelkꞌa li cꞌaꞌru e̱re la̱ex lin tenamit ut queꞌxcꞌam chokꞌ reheb. 6La̱in quina̱tinac chi yo̱ injoskꞌil chirixeb laj Edom li xicꞌ nequeꞌiloc e̱re xban nak eb aꞌan queꞌxcꞌut e̱xuta̱n nak queꞌxchap chokꞌ reheb le̱ naꞌaj. Queꞌxmakꞌ che̱ru li tzu̱l, li nimaꞌ, li ru takꞌa, ut eb li xbe̱n bol. 7La̱in li nimajcual Dios ninye riqꞌuin juramento nak relic chi ya̱l teꞌcꞌutekꞌ xxuta̱neb li xni̱nkal ru tenamit li cuanqueb che̱jun sutam. 8Ut teꞌtuxmek cuiꞌchic li cheꞌ li cuanqueb saꞌ li tzu̱l Israel ut teꞌu̱chi̱nk. Ut eb laj Israel teꞌxtzaca li ru xban nak chi se̱b teꞌsukꞌi̱k cuiꞌchic saꞌ lix tenamiteb. 9La̱in tincol rix lix naꞌajeb. La̱in tintenkꞌa̱nk reheb chixcꞌanjelanquil li chꞌochꞌ ut chiraubal xsaꞌ. 10La̱in tebinqꞌue cuiꞌchic chi ta̱mc laj Israel. Ta̱tenamitokꞌ cuiꞌchic li naꞌajej. Ut teꞌxyi̱b cuiꞌchic li tenamit li queꞌjuqꞌui̱c junxil. 11La̱in tinqꞌue chi nabalocꞌ li cristian joꞌ eb ajcuiꞌ li xul. Kꞌaxal cuiꞌchic nabal teꞌqꞌuia̱nk ut teꞌta̱mk. Tebinqꞌue chi cua̱nc saꞌ lix naꞌajeb joꞌ nak queꞌcuan junxil. Ut kꞌaxal cuiꞌchic tintenkꞌaheb re nak ta̱cua̱nk nabal cꞌaꞌru reheb. Ut riqꞌuin aꞌin teꞌxqꞌue retal nak la̱in li Ka̱cuaꞌ. 12La̱in tincꞌameb cuiꞌchic laj Israel saꞌ lix naꞌajeb. Aꞌaneb li teꞌe̱chani̱nk re li chꞌochꞌ. Ut eb li ralal xcꞌajol junelic teꞌxtzaca ru li acui̱mk li ta̱e̱lk saꞌ li chꞌochꞌ aꞌin. Ut incꞌaꞌ chic teꞌca̱mk xban cueꞌej. 13Li nimajcual Dios naxye chi joꞌcaꞌin: Anakcuan li jalaneb xtenamit nequeꞌxhob laj Israel ut nequeꞌxye nak li chꞌochꞌ naxtiuheb li ralal xcꞌajol ut naxcanab li naꞌajej chi ma̱cꞌaꞌ cristian chi saꞌ. 14Abanan anakcuan incꞌaꞌ chic teꞌxye chi joꞌcan xban nak teꞌnabalokꞌ cuiꞌchic li cristian. 15Incꞌaꞌ chic tebinqꞌue chi hobecꞌ xbaneb li xni̱nkal ru tenamit, chi moco teꞌnumta̱k chic saꞌ xbe̱neb, chi moco teꞌca̱mk chic li ralal xcꞌajoleb laj Israel, chan li Ka̱cuaꞌ. 16Ut li Ka̱cuaꞌ quia̱tinac cuiqꞌuin ut quixye: 17—At ralal cui̱nk, nak eb laj Israel cuanqueb saꞌ lix chꞌochꞌeb queꞌxmux ru li naꞌajej xban li ma̱usilal queꞌxba̱nu. Chanchaneb jun li ixk nak yo̱ chixcꞌulbal lix yajel re li po. 18Xban nak yo̱ injoskꞌil saꞌ xbe̱neb, la̱in quinqꞌueheb chixtojbal xma̱queb xban li camsi̱nc li queꞌxba̱nu saꞌ li naꞌajej ut xban nak queꞌxmux ru li naꞌajej nak queꞌxlokꞌoniheb li jalanil dios. 19La̱in quinjeqꞌuiheb ru saꞌ eb li xni̱nkal ru tenamit. Quinrakoc a̱tin saꞌ xbe̱neb aꞌ yal chanru lix yehom xba̱nuhomeb. 20Nak queꞌcuulac saꞌ eb li tenamit yalak bar, chixjunileb li tenamit queꞌxye nak aꞌaneb lin tenamit la̱in li Dios, ut queꞌisi̱c saꞌ li naꞌajej li quiqꞌueheꞌ reheb, chanqueb. Xma̱c eb aꞌan nak quimuxeꞌ ru lin santil cꞌabaꞌ. 21Ra quicuecꞌa nak queꞌxhob lin santil cꞌabaꞌ. Eb laj Israel queꞌxcꞌut inxuta̱n nak queꞌco̱eb yalak bar saꞌ jalan tenamit. 22Joꞌcan ut ye reheb li tenamit Israel: Joꞌcaꞌin ninye la̱in li nimajcual Dios. Ma̱cuaꞌ xban nak e̱cꞌulub la̱ex aj Israel nak tinba̱nu li us e̱re; re ban xqꞌuebal xcuanquil lin santil cꞌabaꞌ xban nak xemux ru lin cꞌabaꞌ chiruheb li tenamit bar xexcuan cuiꞌ chak. 23La̱in tinsantobresi lin cꞌabaꞌ li kꞌaxal nim xcuanquil li xemux ru chiruheb li xni̱nkal ru tenamit xban nak xerisi xcuanquil lin cꞌabaꞌ nak cuanquex saꞌ xya̱nkeb. Ut riqꞌuin li cꞌaꞌru tinba̱nu, teꞌxqꞌue retal nak la̱in li Ka̱cuaꞌ Dios. 24La̱in texcuisi saꞌ li xni̱nkal tenamit li cuanquex cuiꞌ. Texcuisi saꞌ chixjunileb li tenamit ut texincꞌam cuiꞌchic saꞌ le̱ naꞌaj. 25Chanchan nak texinchꞌajobresi riqꞌuin sak ru haꞌ nak tincuisi li ma̱usilal xeba̱nu nak xemux e̱rib riqꞌuin xlokꞌoninquil li jalanil dios. 26La̱in tinacꞌobresi le̱ ra̱m ut tinjal le̱ cꞌaꞌux. Tinkꞌunobresi le̱ ra̱m ut tincuisi li cacuil chꞌo̱lej li cuan e̱riqꞌuin, li chanchan pec. 27Ut la̱in tinqꞌue e̱re lin musikꞌ. Texinqꞌue chixpa̱banquil lin chakꞌrab ut te̱ba̱nu li cꞌaꞌru ninye. Te̱ba̱nu li cꞌaꞌru texintakla cuiꞌ. 28Texcua̱nk cuiꞌchic saꞌ li naꞌajej li quinqꞌue reheb le̱ xeꞌto̱nil yucuaꞌ. La̱exak chic lin tenamit ut la̱inak chic le̱ Dios. 29La̱in tintenkꞌa̱nk e̱re re nak incꞌaꞌ chic te̱ba̱nu li ma̱usilal. Ut tinqꞌue chi cua̱nc nabal li trigo re nak incꞌaꞌ ta̱cua̱nk cueꞌej. 30Ut tebinqꞌue chi u̱chi̱nc chi nabal eb li cheꞌ ut tebinqꞌue ajcuiꞌ chi u̱chi̱nc chi nabal li acui̱mk saꞌ li cꞌaleba̱l. Incꞌaꞌ chic tinqꞌue li cueꞌej saꞌ e̱be̱n re nak incꞌaꞌ xuta̱nal te̱cꞌul chiruheb li xni̱nkal ru tenamit. 31Nak ta̱julticokꞌ e̱re li incꞌaꞌ us xeba̱nu, texxuta̱na̱k xban le̱ ma̱usilal ut xban le̱ ma̱c. 32La̱ex aj Israel, chenauhak nak moco xban ta nak e̱cꞌulub nak yo̱quin chixba̱nunquil li usilal aꞌin. Chexxuta̱na̱k ban ut chisachk e̱chꞌo̱l xban li incꞌaꞌ us xeba̱nu. La̱in li Ka̱cuaꞌ ninyehoc re aꞌin, chan li Dios. 33Li nimajcual Dios quixye: —Nak ac xcuisi chixjunil le̱ ma̱c, texinqꞌue cuiꞌchic chi cua̱nc saꞌ eb le̱ tenamit ut te̱yi̱b cuiꞌchic li tenamit li queꞌjuqꞌui̱c. 34Nak queꞌnumeꞌ li cristian junxil queꞌxqꞌue retal nak ma̱cꞌaꞌ cuan chi saꞌ li naꞌajej. Abanan ta̱cꞌanjelak cuiꞌchic li naꞌajej. 35Ut teꞌxye, “Li naꞌajej aꞌin poꞌbil nak queꞌcuan ut ma̱cꞌaꞌ cuan chi saꞌ. Abanan anakcuan cha̱bil chic. Chanchan li naꞌajej Edén. Eb li tenamit poꞌbil nak queꞌcuan ut ma̱cꞌaꞌ cristian. Abanan cauresinbil chic li tenamit ut nabal li cristian cuanqueb.” 36Ut chixjunileb li xni̱nkal ru tenamit li cuanqueb chixjun sutam teꞌxqꞌue retal nak la̱in li Ka̱cuaꞌ quinyi̱ban reheb li tenamit li juqꞌuinbil. Quinqꞌue cuiꞌchic chixjunil li cuan chi saꞌ. La̱in li Ka̱cuaꞌ ninyehoc re aꞌin ut la̱in ninba̱nu li cꞌaꞌru ninye. 37Ut tincuabi li cꞌaꞌru teꞌxtzꞌa̱ma chicuu eb li ralal xcꞌajol laj Israel. Tinqꞌueheb cuiꞌchic chi qꞌuia̱nc joꞌ xqꞌuial li queto̱mk. 38Xban xqꞌuialeb chanchanakeb li carner li nequeꞌmayeja̱c Jerusalén saꞌ xkꞌehil eb li ninkꞌe. Kꞌaxal nabalakeb chic li cristian saꞌ eb li tenamit li chanchan chaki chꞌochꞌ nak quicuan. Ut riqꞌuin aꞌin teꞌxnau nak la̱in li Ka̱cuaꞌ, chan li Dios.
Currently Selected:
Ezequiel 36: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
