Ezequiel 37

Li visión chirixeb li chaki bak

1Quicuecꞌa lix cuanquilal li Dios cuiqꞌuin nak quicuil jun li visión. Ut lix musikꞌ li nimajcual Dios quicꞌamoc cue saꞌ jun li ru takꞌa nujenak chi bak. 2Quinixqꞌue chixsutinquil li ru takꞌa ut quinqꞌue retal nak kꞌaxal nabal li bak cuan aran ut chakiheb chi us. 3Ut li Ka̱cuaꞌ quixye cue: —At ralal cui̱nk, ¿ma nacapa̱b nak teꞌyoꞌla̱k cuiꞌchic eb a bak aꞌin? chan. Ut la̱in quinchakꞌoc ut quinye re: —At Ka̱cuaꞌ Dios, caꞌaj cuiꞌ la̱at nacatnaꞌoc re.— 4Tojoꞌnak li Ka̱cuaꞌ quixye cue: —A̱tinan riqꞌuineb a bak aꞌin saꞌ incꞌabaꞌ la̱in. Ta̱ye reheb: Ex chaki bak, abihomak li ra̱tin li Ka̱cuaꞌ li oc cue chixyebal e̱re. 5Joꞌcaꞌin xye li Ka̱cuaꞌ: —La̱in tinqꞌue cuiꞌchic le̱ musikꞌ e̱re re nak texcuacli̱k cuiꞌchic chi yoꞌyo. 6La̱in tinqꞌue cuiꞌchic le̱ richꞌ mul ut tinqꞌue cuiꞌchic le̱ tibel ut le̱ tzꞌu̱mal. Ut tinqꞌue cuiꞌchic le̱ musikꞌ re nak texcuacli̱k cuiꞌchic chi yoꞌyo. Ut riqꞌuin aꞌan te̱qꞌue retal nak la̱in li Ka̱cuaꞌ, chan. 7Ut la̱in quina̱tinac joꞌ quixye cue li Ka̱cuaꞌ Dios. Nak yo̱quin chi a̱tinac, quicuabi jun choki̱nc. Quixqꞌue jun li hi̱c ut eb li bak queꞌoc chixchꞌutubanquil ribeb ut queꞌxtauhi ribeb. 8Ut nak quicuil, cuanqueb chic li richꞌ muleb ut lix tibeleb ut ac cuan chic lix tzꞌu̱maleb nak quicuil. Abanan toj ma̱cꞌaꞌ lix musikꞌeb. 9Ut li Ka̱cuaꞌ quixye cue: —At ralal cui̱nk, ye li cꞌaꞌru xinye a̱cue. A̱tina li musikꞌej. Ta̱ye re: At musikꞌej, cha̱lkat bar nachal cuiꞌ li ikꞌ saꞌ xca̱ pacꞌalil li ruchichꞌochꞌ. Tola̱cuapuheb li camenak aꞌin li queꞌcamsi̱c re nak teꞌcuacli̱k cuiꞌchic chi yoꞌyo, chan. 10Ut quinba̱nu joꞌ quixye cue li Ka̱cuaꞌ. Ut li musikꞌej qui-oc riqꞌuineb li camenak ut queꞌcuacli cuiꞌchic chi yoꞌyo. Xban nak kꞌaxal nabaleb, chanchan jun tu̱b chi soldado nak queꞌxakli. 11Ut quixye cuiꞌchic cue li Ka̱cuaꞌ: —At ralal cui̱nk, eb li bak aꞌin, aꞌan retalileb chixjunileb li ralal xcꞌajol laj Israel. Eb aꞌan nequeꞌxye, “Xchakic li kabakel. Ma̱cꞌaꞌ chic cꞌaꞌru nakayoꞌoni. Ac xo-osoꞌ,” chanqueb. 12Joꞌcan ut nak ta̱ye reheb: Joꞌcaꞌin xye li Ka̱cuaꞌ li nimajcual Dios. Ex intenamit, la̱in tinte li naꞌajej li mukmu̱quex cuiꞌ ut texcuisi aran. Texincꞌam cuiꞌchic toj saꞌ le̱ naꞌaj Israel. 13Ex intenamit, la̱ex te̱qꞌue retal nak la̱in li Ka̱cuaꞌ nak tinte li mukleba̱l li mukmu̱quex cuiꞌ ut texincuaclesi. 14Ut la̱in tinqꞌue lin musikꞌ e̱re re nak yoꞌyo̱kex. Texinqꞌue chi hila̱nc saꞌ le̱ naꞌaj. Ut riqꞌuin aꞌan te̱nau nak la̱in li Ka̱cuaꞌ. Xinye nak tinba̱nu aꞌan ut tinba̱nu li cꞌaꞌru xinye, chan li Ka̱cuaꞌ. 15Ut li Ka̱cuaꞌ Dios quixye ajcuiꞌ cue: 16—At ralal cui̱nk, ta̱chap jun li cheꞌ ut ta̱tzꞌi̱ba chiru li a̱tin aꞌin: “Re laj Judá ut reheb li ralal xcꞌajol”. Ut ta̱chap jun chic li cheꞌ ut ta̱tzꞌi̱ba chiru aꞌan: “Re laj José ut reheb li ralal xcꞌajol laj Efraín”. Li cuib chi cheꞌ, aꞌan retalileb chixjunileb li ralal xcꞌajol laj Israel. 17Chirix aꞌan, ta̱letz li jun riqꞌuin li jun chic ut jun aj chic chi cheꞌ ta̱cana̱k saꞌ a̱cuukꞌ. 18Teꞌxpatzꞌ a̱cue la̱ cuech tenamitil ut teꞌxye, “Chꞌolob xya̱lal chiku li yo̱cat chixba̱nunquil.” 19Ut La̱at ta̱ye reheb: Joꞌcaꞌin xye li nimajcual Dios: La̱in tinchap lix cheꞌ laj José li cuan riqꞌuin laj Efraín. Li cheꞌ aꞌan retalileb li ralal xcꞌajol laj Israel. Tinchap ajcuiꞌ li cheꞌ retalileb li ralal xcꞌajol laj Judá. Tinletz chi ribil rib li cheꞌ. Ut junak aj chic chi cheꞌ ta̱cana̱k saꞌ cuukꞌ. 20Ut li cuib chi cheꞌ li xattzꞌi̱bac cuiꞌ cua̱nkeb saꞌ a̱cuukꞌ chiruheb chixjunileb li cristian. 21Ut ta̱ye reheb nak la̱in li nimajcual Dios tincuisiheb chak chixjunileb laj Israel saꞌ eb li jalan tenamit li cuanqueb cuiꞌ chak. Tinchꞌutubeb ut tincꞌameb cuiꞌchic saꞌ lix tenamiteb. 22La̱in tinchꞌutubeb ru lin tenamit saꞌ eb li tzu̱l li cuanqueb Israel. Jun ajcuiꞌ li rey li ta̱takla̱nk saꞌ xbe̱neb. Moco cuibakeb ta chic chi tenamit. Jun aj ban chic. 23Incꞌaꞌ chic teꞌxmux ribeb xlokꞌoninquileb li jalanil dios, chi moco teꞌxkꞌetkꞌeti ribeb chicuu, chi moco teꞌxba̱nu chic li ma̱usilal. La̱in tincoleb chiru li ma̱usilal aꞌan ut tincuisi lix ma̱queb. Aꞌanakeb lin tenamit ut la̱inak lix Dioseb. 24Laj David laj cꞌanjel chicuu ta̱cua̱nk chokꞌ xreyeb. Jun ajcuiꞌ li ta̱ilok reheb. Ut teꞌcua̱nk saꞌ xya̱lal. Teꞌxba̱nu li cꞌaꞌru naxye saꞌ lin chakꞌrab. 25Teꞌcua̱nk saꞌ li chꞌochꞌ li quinqꞌue re laj Jacob laj cꞌanjel chicuu, li queꞌcuan cuiꞌ lix xeꞌto̱nil yucuaꞌeb. Eb aꞌan ut chixjunileb li ralal xcꞌajol li teꞌcua̱nk mokon teꞌcua̱nk saꞌ li naꞌajej aꞌan chi junelic. Ut li rey David ta̱takla̱nk saꞌ xbe̱neb chi junelic. 26La̱in tinba̱nu jun li contrato riqꞌuineb chi junelic re nak teꞌcua̱nk saꞌ tuktu̱quil usilal. Tinxakabeb saꞌ xnaꞌajeb ut tebinqꞌue chi qꞌuia̱nc. Ut tinqꞌue lin templo chi cua̱nc saꞌ lix naꞌajeb chi junelic. 27Ut la̱in cua̱nkin riqꞌuineb. La̱inak lix Dioseb ut aꞌanakeb lin tenamit. 28Ut eb li xni̱nkal ru tenamit teꞌxqꞌue retal nak la̱in li Ka̱cuaꞌ quinsantobresiheb laj Israel nak quinqꞌue chi cua̱nc lin templo chi junelic saꞌ xya̱nkeb, chan li Ka̱cuaꞌ.

Currently Selected:

Ezequiel 37: kek

Highlight

Copy

Compare