Ezequiel 35
35
Resil li raylal li ta̱cha̱lk saꞌ xbe̱neb laj Edom
1Li Ka̱cuaꞌ quia̱tinac cuiqꞌuin ut quixye cue: 2—At ralal cui̱nk, ilon cuan cuiꞌ li tzu̱l Seir ut ta̱ye resil li raylal li ta̱cha̱lk saꞌ xbe̱neb laj Edom xban li ma̱usilal queꞌxba̱nu. 3Ye reheb: Joꞌcaꞌin xye li Ka̱cuaꞌ li nimajcual Dios. La̱in yo̱ injoskꞌil saꞌ e̱be̱n. La̱in tinrakok a̱tin saꞌ e̱be̱n ut tinsukꞌisi chaki chꞌochꞌ le̱ naꞌaj. Ma̱cꞌaꞌ chic cua̱nk chi saꞌ. 4Ma̱cꞌaꞌak chic ta̱cua̱nk saꞌ le̱ tenamit nak tinsach ruheb. Ut ma̱cꞌaꞌ chic ta̱e̱lk saꞌ le̱ chꞌochꞌ. Ut riqꞌuin aꞌan te̱qꞌue retal nak la̱in li Ka̱cuaꞌ. 5La̱ex li junelic xicꞌ xex-iloc reheb lin tenamit Israel ut xecanabeb chi camsi̱c nak yo̱queb chi cꞌuluc raylal xban li ma̱c queꞌxba̱nu. 6Joꞌcan nak la̱in li yoꞌyo̱quil Dios ninye e̱re nak relic chi ya̱l nak texca̱mk. Incꞌaꞌ naru te̱col e̱rib. La̱ex xexcamsin. Joꞌcan nak texcamsi̱k ajcuiꞌ la̱ex. 7La̱in tinsukꞌisi li tzu̱l Seir chokꞌ chaki chꞌochꞌ. Ma̱cꞌaꞌ chic ta̱e̱lk aran. La̱in tinsach ruheb li nequeꞌoc ut nequeꞌel aran. 8Saꞌ eb li tzu̱l telajeꞌcana̱k chi tꞌantꞌo li teꞌcamsi̱k saꞌ li ple̱t, joꞌ ajcuiꞌ saꞌ xbe̱neb li bol. Ut teꞌcana̱k ajcuiꞌ chi tꞌantꞌo saꞌ eb li ru takꞌa ut saꞌ eb li nimaꞌ. Nujenak chi camenak telajeꞌcana̱k. 9La̱in tincanab chi junaj cua li naꞌajej chi ma̱cꞌaꞌ chic cuan chi saꞌ. Ma̱ ani chic teꞌcua̱nk saꞌ eb le̱ tenamit, ut incꞌaꞌ chic teꞌxyi̱b. Ut riqꞌuin aꞌan te̱qꞌue retal nak la̱in li Ka̱cuaꞌ. 10La̱ex queye nak li cuib chi tenamit Judá ut Israel te̱re̱chani joꞌ ajcuiꞌ chixjunil li naꞌajej. Ta̱cana̱k chokꞌ e̱re li naꞌajej, chanquex, usta la̱in lix Dioseb. 11Joꞌcan nak la̱in li yoꞌyo̱quil Dios ninye e̱re nak relic chi ya̱l la̱in tinba̱nu̱nk e̱re aꞌ yal chanru e̱cꞌulub xban nak xecakaliheb lin tenamit ut xicꞌ querileb ut xecꞌut e̱joskꞌil chiruheb. Riqꞌuin aꞌan teꞌxqꞌue retal nak la̱in yo̱quin che̱qꞌuebal chixtojbal e̱ma̱c. 12Ut la̱ex te̱nau nak la̱in xcuabi li cꞌaꞌru xeye nak xetzꞌekta̱naheb li tzu̱l li cuanqueb Israel. La̱ex xeye nak xeꞌsacheꞌ ruheb ut la̱ex chic tex-e̱chani̱nk reheb. 13Xekꞌetkꞌeti e̱rib chicuu nak xeye li incꞌaꞌ us chicuix. Nabal xex-a̱tinac. Ut la̱in xcuabi li cꞌaꞌru xeye nak xine̱hob. 14La̱in li nimajcual Dios ninye nak la̱in tincanab le̱ naꞌaj chi ma̱cꞌaꞌ chic cuan chi saꞌ. Ut chixjunileb li cuanqueb saꞌ ruchichꞌochꞌ teꞌsahokꞌ saꞌ xchꞌo̱l nak teꞌril li cꞌaꞌru te̱cꞌul. 15La̱ex quisahoꞌ saꞌ e̱chꞌo̱l nak li naꞌajej Israel xcana chi ma̱cꞌaꞌ chic cuan chi saꞌ. Joꞌcan nak tincanab li tzu̱l Seir chi ma̱cꞌaꞌ chic cuan chi saꞌ, joꞌ ajcuiꞌ chixjunil li naꞌajej Edom. Ut riqꞌuin aꞌan teꞌxqꞌue retal nak la̱in li Ka̱cuaꞌ.
Currently Selected:
Ezequiel 35: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
