Ezequiel 33
33
Li Ka̱cuaꞌ quixxakab laj Ezequiel chokꞌ aj ilol re lix tenamit
1Li Ka̱cuaꞌ quia̱tinac cuiqꞌuin ut quixye cue: 2—At ralal cui̱nk, a̱tinan riqꞌuineb la̱ cuech tenamitil ut ta̱ye reheb: Joꞌcaꞌin xye li Ka̱cuaꞌ. Nak la̱in tinqꞌue jun tenamit chi pletic riqꞌuin jun chic tenamit, li tenamit aꞌan tixsicꞌ junak saꞌ xya̱nkeb aꞌan chokꞌ aj ilol re li tenamit. 3Nak laj ilol re li tenamit ta̱ril nak yo̱queb chi cha̱lc li xicꞌ nequeꞌiloc reheb, tixya̱basi li trompeta re xyebal resil re li tenamit nak xeꞌchal chi pletic. 4Cui ani ta̱rabi xya̱b li trompeta ut ma̱cꞌaꞌ tixba̱nu ut ta̱camsi̱k xbaneb li xicꞌ nequeꞌiloc re, aꞌan cuan re cui ta̱camsi̱k. 5Lix camic ta̱cana̱k saꞌ xbe̱n aꞌan xban nak xrabi xya̱b li trompeta, ut ma̱cꞌaꞌ quixba̱nu. Aban li ta̱abi̱nk tixcol lix yuꞌam. 6Cui laj ilol re li tenamit ta̱ril nak yo̱keb chi cha̱lc li xicꞌ nequeꞌiloc reheb ut incꞌaꞌ tixya̱basi lix trompeta, eb li tenamit teꞌcamsi̱k xbaneb, ut laj ilol re li tenamit, aꞌan cuan xma̱c xban nak ma̱cꞌaꞌ xba̱nu re xcolbaleb. 7Li Ka̱cuaꞌ quixye cue: —Anakcuan, at ralal cui̱nk, yo̱quin cha̱xakabanquil chokꞌ aj ilol reheb li ralal xcꞌajol laj Israel. Chaqꞌue retal chixjunil li cꞌaꞌru tinye a̱cue, ut ta̱ye aꞌan reheb. 8Cui tinye a̱cue nak ta̱ca̱mk junak li incꞌaꞌ us xnaꞌleb, tento nak la̱at ta̱ye re li jun aꞌan nak incꞌaꞌ us yo̱, re nak ta̱yotꞌekꞌ xchꞌo̱l ut tixjal xcꞌaꞌux. Cui incꞌaꞌ ta̱chꞌolob xya̱lal chiru, aꞌan ta̱ca̱mk xban lix ma̱c. Abanan saꞌ a̱be̱n la̱at ta̱cana̱k lix camic. 9Abanan cui ta̱ye re nak incꞌaꞌ us yo̱, ut aꞌan incꞌaꞌ na-abin cha̱cuu, li jun aꞌan ta̱ca̱mk. Abanan lix camic incꞌaꞌ ta̱cana̱k saꞌ a̱be̱n. 10At ralal cui̱nk, joꞌcaꞌin ta̱ye reheb li ralal xcꞌajol laj Israel. La̱ex nequeye, “Kꞌaxal ra cuanco xban li ma̱c ut li ma̱usilal nakaba̱nu. Yo̱co chi osocꞌ xban. ¿Chanru nak ta̱ru̱k ta̱cua̱nk kayuꞌam?” chanquex. 11Ta̱ye reheb nak li Ka̱cuaꞌ xye chi joꞌcaꞌin: Yoꞌyo̱quin la̱in li nimajcual Dios. La̱in incꞌaꞌ nacuaj nak texca̱mk saꞌ le̱ ma̱c. Nacuaj ban nak te̱jal e̱naꞌleb ut te̱canab xba̱nunquil li ma̱usilal ut ta̱cua̱nk e̱yuꞌam. Ex aj Israel, canabomak xba̱nunquil li ma̱usilal. ¿Cꞌaꞌut nak te̱qꞌue e̱rib chi ca̱mc xban le̱ ma̱c? 12At ralal cui̱nk, ta̱ye reheb la̱ cuech tenamitil nak lix ti̱quilal li ti̱c xchꞌo̱l incꞌaꞌ tixcol aꞌan nak ta̱ma̱cobk, chi moco ta̱sachekꞌ ru xban li ma̱usilal li quixba̱nu cui tixjal xcꞌaꞌux ut tixcanab xba̱nunquil li ma̱usilal. Cui junak ti̱c xchꞌo̱l ta̱oc chi ma̱cobc, aꞌan incꞌaꞌ ta̱colekꞌ xban li ti̱quilal li quixba̱nu junxil. 13La̱in naru ninye re junak li ti̱c xchꞌo̱l nak cua̱nk xyuꞌam. Abanan cui naxcꞌojob xchꞌo̱l riqꞌuin li ti̱quilal li quixba̱nu ut riqꞌuin aꞌan ta̱oc chi ma̱cobc, la̱in incꞌaꞌ tinjultica li us li quixba̱nu. Aꞌan ta̱ca̱mk xban li ma̱c li quixba̱nu. 14Cui la̱in tinye re junak li naxba̱nu li ma̱usilal nak ta̱ca̱mk, ut cui aꞌan tixcanab xba̱nunquil li incꞌaꞌ us ut tixba̱nu li us, aꞌan incꞌaꞌ ta̱ca̱mk. 15Ta̱cua̱nk xyuꞌam cui tixkꞌaxtesi li prenda li quixcꞌul nak quixqꞌue chi toꞌ li tumin, ut cui tixkꞌaxtesi li cꞌaꞌru quirelkꞌa ut cui tixba̱nu li cꞌaꞌru naxye saꞌ li chakꞌrab li naqꞌuehoc yuꞌam. Cui tixcanab xba̱nunquil li ma̱usilal, relic chi ya̱l ta̱cua̱nk xyuꞌam. Incꞌaꞌ ta̱ca̱mk. 16Incꞌaꞌ ta̱qꞌuehekꞌ saꞌ xbe̱n li ma̱c li quixba̱nu junxil. Quixba̱nu li us ut li ti̱quilal. Relic chi ya̱l ta̱cua̱nk xyuꞌam. 17Ma̱re la̱ cuech tenamitil teꞌxye nak moco ti̱c ta li ninba̱nu la̱in li Ka̱cuaꞌ. Abanan li nequeꞌxba̱nu eb aꞌan, aꞌan li moco ti̱c ta. 18Nak junak li ti̱c xchꞌo̱l tixjal xcꞌaꞌux ut tixcanab xba̱nunquil li ti̱quilal ut tixba̱nu li incꞌaꞌ us, aꞌan ta̱ca̱mk xban li ma̱c li tixba̱nu. 19Ut cui junak li incꞌaꞌ us xnaꞌleb tixcanab xba̱nunquil li ma̱usilal ut tixba̱nu li ti̱quilal ut li cha̱bilal, aꞌan ta̱cua̱nk xyuꞌam xban li us li tixba̱nu. 20Abanan la̱ex li ralal xcꞌajol laj Israel nequeye nak moco ti̱c ta li cꞌaꞌru ninba̱nu la̱in. La̱in li nimajcual Dios tinrakok a̱tin saꞌ e̱be̱n che̱ju̱nkalex aꞌ yal chanru le̱ yehom e̱ba̱nuhom, chan li Dios. 21Nak yo̱ cablaju chihab kacꞌambal chi pre̱xil aran Babilonia, saꞌ li o̱b xbe li xlaje po, quicuulac cuiqꞌuin jun li cui̱nk quie̱lelic Jerusalén. Li cui̱nk aꞌan quixye cue nak li tenamit Jerusalén ac x-e̱chani̱c xbaneb li xicꞌ nequeꞌiloc re. 22Saꞌ li ecuu nak toj ma̱jiꞌ nacuulac cuiqꞌuin li cui̱nk li quie̱lelic chak Jerusalén, la̱in quicuecꞌa xcuanquil li Ka̱cuaꞌ. Ac xtehon lix tzꞌu̱mal cue ut quiru quina̱tinac cuiꞌchic saꞌ li ekꞌela nak quicuulac cuiqꞌuin li cui̱nk. 23Li Ka̱cuaꞌ quia̱tinac cuiqꞌuin ut quixye cue: 24—At ralal cui̱nk, eb laj Israel li cuanqueb saꞌ lix tenamiteb, li jucꞌbil, yo̱queb chixyebal chi joꞌcaꞌin: Laj Abraham jun ajcuiꞌ chi cui̱nk, abanan chixjunil li naꞌajej quiqꞌueheꞌ re. La̱o kꞌaxal nabalo. Joꞌcan nak li naꞌajej aꞌin xqꞌueheꞌ chokꞌ ke. 25Ta̱ye reheb nak la̱in li nimajcual Dios ninye: La̱ex nequetiu li tib rochben lix quiqꞌuel. Ut nequelokꞌoni li jalanil dios ut nequexcamsin. ¿Ma naru ta biꞌ te̱re̱chani li naꞌajej aꞌin cui toj yo̱quex chixba̱nunquil li ma̱usilal? 26Cau e̱chꞌo̱l saꞌ xbe̱n le̱ chꞌi̱chꞌ ut nequeba̱nu li ma̱usilal. Nequemux ru li rixakil le̱ ras e̱ri̱tzꞌin. Cui toj yo̱quex chixba̱nunquil li ma̱usilal, ¿chanru nak te̱re̱chani li naꞌajej aꞌin? 27Ta̱ye reheb nak la̱in li yoꞌyo̱quil Dios ninye nak relic chi ya̱l telajeꞌcamsi̱k li cuanqueb saꞌ eb li tenamit li poꞌbileb. Ut eb li cuanqueb saꞌ li cꞌaleba̱l teꞌlajeꞌcamsi̱k xbaneb li joskꞌ aj xul. Ut eb li cuanqueb saꞌ eb li ochoch pec ut saꞌ eb li cab li nequeꞌxcol cuiꞌ ribeb telajeꞌca̱mk xban caki yajel. 28La̱in tinsach ru li naꞌajej ut ma̱cꞌaꞌ chic ta̱cua̱nk chi saꞌ. Tinsach lix cuanquileb li queꞌxkꞌetkꞌeti cuiꞌ ribeb. Ma̱cꞌaꞌ chic tincanab saꞌ eb li tzu̱l li cuanqueb Israel toj retal nak ma̱ ani ta̱numekꞌ aran. 29La̱in tinsukꞌisi lix naꞌajeb chokꞌ chaki chꞌochꞌ. Ma̱cꞌaꞌ chic cuan chi saꞌ ta̱cana̱k xban li ma̱usilal quilajeꞌxba̱nu. Riqꞌuin aꞌin teꞌxqꞌue retal nak la̱in li Ka̱cuaꞌ Dios. 30At ralal cui̱nk, eb la̱ cuech tenamitil nequeꞌxxakab ribeb chiru li tzꞌac ut saꞌ eb li oqueba̱l reheb li rochocheb ut nequeꞌa̱tinac cha̱cuix. Nequeꞌxye chi ribileb rib, “Yoꞌkeb kabihak cꞌaꞌru li esilal li tixye ke li Ka̱cuaꞌ,” chanqueb. 31Lin tenamit teꞌcuulak a̱cuiqꞌuin chirabinquil li cꞌaꞌru ta̱ye joꞌ cꞌaynakeb xba̱nunquil. Teꞌrabi li cꞌaꞌru ta̱ye, abanan incꞌaꞌ teꞌxba̱nu. Yal chi xtzꞌu̱mal reheb teꞌxye nak us la̱ cua̱tin, abanan saꞌ xchꞌo̱leb caꞌaj cuiꞌ li reheb aꞌan teꞌxcꞌoxla. 32Chokꞌ reheb aꞌan chanchanat jun aj bichanel joꞌ jun li nabichan bich re rahoc chi chꞌinaꞌus. Teꞌrabi li cꞌaꞌru ta̱ye abanan incꞌaꞌ teꞌxba̱nu. 33Abanan ta̱cꞌulma̱nk li cꞌaꞌru xinye. Ut nak ac xcꞌulman, aran teꞌxqꞌue retal nak la̱at tzꞌakal profeta li xatcuan saꞌ xya̱nkeb.—
Currently Selected:
Ezequiel 33: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
