Ezequiel 32
32
1Nak yo̱ cablaju chihab kacꞌambal Babilonia, li Ka̱cuaꞌ quia̱tinac cuiqꞌuin saꞌ li xbe̱n cutan re lix cablaju po ut quixye cue: 2—At ralal cui̱nk, ta̱bicha jun li bich re rahil chꞌo̱lej chirix laj faraón lix reyeb laj Egipto. Ta̱ye: Chanchanat jun li cakcoj saꞌ xya̱nkeb li xni̱nkal ru tenamit. Chanchanat jun li joskꞌ aj xul dragón xcꞌabaꞌ nacuan saꞌ li palau. Nak narecꞌasi rib saꞌ li haꞌ natzꞌajnoꞌ li haꞌ ut nak nabe̱c nasululoꞌ ru. 3Li nimajcual Dios xye: —Chanchan nak tatinchap riqꞌuin lin yoy nak tintakla nabaleb li tenamit chi numta̱c saꞌ a̱be̱n. Chanchan nak eb aꞌan tateꞌxquelo saꞌ chꞌochꞌ. 4Ut tatincut saꞌ chꞌochꞌ ut aran tatincanab chi camenak re nak eb li soꞌsol ut eb li joskꞌ aj xul teꞌxtiu la̱ tibel re nak teꞌnujak xsaꞌeb. 5La̱in tincut la̱ tibel saꞌ eb li tzu̱l ut saꞌ eb li ru takꞌa. 6Tintꞌakresi li chꞌochꞌ riqꞌuin la̱ quiqꞌuel. Chixjunil li naꞌajej ta̱nujak riqꞌuin la̱ tibel, joꞌ saꞌ eb li u̱l ut saꞌ eb li tzu̱l. 7Nak la̱in tinsach a̱cuu, la̱in tinba̱nu̱nk re nak incꞌaꞌ chic teꞌlemtzꞌu̱nk li chahim. Incꞌaꞌ chic ta̱ilok li sakꞌe chi moco li po. 8Ta̱kꞌojyi̱nokꞌ ru li choxa. Incꞌaꞌ chic teꞌlemtzꞌu̱nk li chahim. Ut ta̱kꞌojyi̱nokꞌ ajcuiꞌ saꞌ chixjunil la̱ naꞌaj. La̱in li nimajcual Dios ninyehoc re aꞌin. 9Nabaleb li tenamit teꞌrahokꞌ saꞌ xchꞌo̱leb nak teꞌrabi resil nak texcꞌamekꞌ chi pre̱xil saꞌ eb li xni̱nkal ru tenamit li incꞌaꞌ nequenau ruheb. 10Nabal chi tenamit teꞌsachk xchꞌo̱leb nak teꞌrabi resil li cꞌaꞌru ta̱cꞌul. Eb li rey sicsotkeb xbaneb xxiu nak la̱in tincꞌut lin chꞌi̱chꞌ chiruheb saꞌ li cutan aꞌan nak tatcamsi̱k. Xiu xiu cua̱nkeb ut teꞌxcꞌoxla nak ma̱re teꞌcamsi̱k ajcuiꞌ eb aꞌan. 11Li nimajcual Dios quixye re laj faraón: —Lix reyeb laj Babilonia ta̱cha̱lk chi pletic a̱cuiqꞌuin. 12Li tenamit aꞌan, aꞌan li kꞌaxal joskꞌeb saꞌ xya̱nkeb li xni̱nkal ru tenamit. Eb li soldado teꞌpletik a̱cuiqꞌuin ut teꞌxcamsiheb chixjunileb la̱ tenamit li nacakꞌetkꞌeti cuiꞌ a̱cuib. Teꞌsachekꞌ ruheb usta kꞌaxal nabaleb. 13La̱in tincamsiheb li queto̱mk li nequeꞌcuan chire li nimaꞌ li cuan saꞌ le̱ tenamit. Incꞌaꞌ chic ta̱tzꞌajnokꞌ li haꞌ xban nak incꞌaꞌ chic teꞌbe̱k saꞌ li nimaꞌ li tenamit, chi moco li xul. 14Ta̱sakokꞌ cuiꞌchic ru li haꞌ ut tuktu̱k chic ru li nimaꞌ nak teꞌbe̱k rok. La̱in li nimajcual Dios ninyehoc re aꞌin. 15La̱in tinsach ru li cꞌaꞌru cuan Egipto. Ma̱cꞌaꞌ chic cua̱nk chi saꞌ ta̱cana̱k. Nak tincamsiheb chixjunileb teꞌxqꞌue retal nak la̱in li Ka̱cuaꞌ li nimajcual Dios. 16Aꞌan aꞌin li bich re rahil chꞌo̱lej li teꞌxbicha li ixk li cuanqueb saꞌ eb li xni̱nkal ru tenamit. Teꞌxbicha li bich aꞌin xban xrahil xchꞌo̱leb chirix li tenamit Egipto ut chirixeb li queꞌcuan aran, chan li nimajcual Dios. 17Nak yo̱ cablaju chihab kacꞌambal Egipto li Ka̱cuaꞌ quia̱tinac cuiqꞌuin saꞌ li oꞌlaju xbe li po ut quixye cue: 18—At ralal cui̱nk, chirahokꞌ a̱chꞌo̱l xban xqꞌuialeb laj Egipto. Taklaheb saꞌ xnaꞌajeb li camenak rochbeneb li ixk li cuanqueb saꞌ eb li xni̱nkal ru tenamit. 19Ta̱ye reheb: ¿Ma xban ta biꞌ nak chꞌinaꞌusex nak incꞌaꞌ texxic saꞌ xnaꞌajeb li camenak? La̱in texintakla saꞌ xnaꞌajeb li camenak ut texcana̱k aran rochbeneb li incꞌaꞌ queꞌxpa̱b li Dios. 20Eb laj Egipto teꞌcamsi̱k saꞌ li ple̱t. Ac cauresinbileb li chꞌi̱chꞌ re xcamsinquileb. Teꞌxic saꞌ xnaꞌaj li camenak li qꞌuila tenamit li teꞌcamsi̱k. 21Eb li cauheb rib li ac cuanqueb saꞌ xnaꞌajeb li camenak teꞌa̱tinak chirixeb laj Egipto ut eb li queꞌtenkꞌan reheb ut teꞌxye, “Eb aꞌan xeꞌchal arin chi cana̱c rochbeneb li queꞌcamsi̱c saꞌ li ple̱t, li incꞌaꞌ queꞌxpa̱b li Dios.” 22Lix reyeb laj Asiria cuan arin rochbeneb lix qꞌuila soldado. Sutsu xbaneb lix mukleba̱leb li queꞌcamsi̱c saꞌ li ple̱t. 23Eb li soldados queꞌmukeꞌ chixjun sutam lix mukleba̱l eb li rey li quilajeꞌcamsi̱c saꞌ li ple̱t. Chixjunileb li tenamit queꞌxucuac xbaneb nak toj yoꞌyo̱queb. 24Lix reyeb laj Elam cuan aran rochbeneb lix qꞌuila soldados. Li soldado cuanqueb chixjun sutam. Chixjunileb queꞌcamsi̱c saꞌ li ple̱t. Aꞌaneb li queꞌqꞌuehoc xxiuheb chixjunileb nak toj yoꞌyo̱queb, abanan anakcuan xuta̱nal queꞌxcꞌul xban nak queꞌco̱eb saꞌ xnaꞌajeb li camenak cuanqueb cuiꞌ li incꞌaꞌ queꞌxpa̱b li Dios. 25Saꞌ xya̱nkeb li camenak quiqꞌueheꞌ lix naꞌaj lix reyeb laj Elam rochbeneb li qꞌuila soldado. Ut chixjun sutam cuanqueb lix mukleba̱leb. Chixjunileb aꞌan incꞌaꞌ queꞌxpa̱b li Dios ut queꞌcamsi̱c saꞌ li ple̱t. Queꞌxqꞌue xxiuheb li tenamit nak toj yoꞌyo̱queb. Abanan xuta̱nal queꞌxcꞌul nak queꞌco̱eb saꞌ xnaꞌajeb li camenak. 26Lix reyeb laj Mesec ut lix reyeb laj Tubal cuanqueb arin rochbeneb lix qꞌuila soldados. Chixjunileb aꞌan incꞌaꞌ queꞌxpa̱b li Dios ut queꞌcamsi̱c saꞌ li ple̱t xban nak queꞌxqꞌue xxiuheb li tenamit nak toj yoꞌyo̱queb. 27Incꞌaꞌ queꞌmukeꞌ joꞌ nak queꞌmukeꞌ li cauheb rib li queꞌcam junxil, li incꞌaꞌ queꞌxpa̱b li Dios. Eb aꞌan queꞌco̱eb saꞌ xnaꞌajeb li camenak chi cuanqueb xchꞌi̱chꞌ re pletic rubel xjolom ut lix chꞌi̱chꞌ re xcolbal re xchꞌo̱l quiqꞌueheb saꞌ xbe̱neb. Lix ma̱queb junelic cua̱nk saꞌ xbe̱neb xban nak aꞌaneb queꞌqꞌuehoc xxiuheb li ni̱nkeb xcuanquil nak toj yoꞌyo̱queb. 28Joꞌcan ajcuiꞌ la̱ex aj Egipto. Ta̱sachekꞌ e̱ru ut texxic saꞌ xnaꞌajeb li camenak saꞌ xya̱nkeb li incꞌaꞌ queꞌxpa̱b li Dios. Aran texcana̱k saꞌ xya̱nkeb li queꞌcamsi̱c saꞌ li ple̱t. 29Eb li rey li queꞌcuan Edom cuanqueb aran rochbeneb li queꞌtaklan saꞌ xbe̱neb li tenamit. Usta queꞌcuan xcuanquil, abanan queꞌtakla̱c saꞌ xya̱nkeb li queꞌcamsi̱c saꞌ li ple̱t. Aran teꞌcua̱nk saꞌ xnaꞌajeb li camenak li cuanqueb cuiꞌ li incꞌaꞌ queꞌxpa̱b li Dios. 30Cuanqueb aran chixjunileb li queꞌtaklan saꞌ li norte. Ut cuanqueb ajcuiꞌ chixjunileb laj Sidón. Eb aꞌan queꞌxqꞌue xxiuheb li tenamit nak toj yoꞌyo̱queb. Usta cuanqueb xcuanquil xuta̱nal queꞌxcꞌul nak queꞌco̱eb saꞌ xnaꞌajeb li camenak li incꞌaꞌ queꞌxpa̱b li Dios, ut cuanqueb rochbeneb li queꞌcamsi̱c saꞌ li ple̱t. 31Nak laj faraón lix reyeb laj Egipto ta̱rileb li cuanqueb saꞌ xnaꞌajeb li camenak, ta̱cꞌojla̱k xchꞌo̱l chirixeb lix soldado li teꞌcamsi̱k saꞌ li ple̱t. 32Usta la̱in quinqꞌue laj faraón chixqꞌuebal xxiuheb li tenamit nak toj yoꞌyo, abanan laj faraón ut eb lix tenamit teꞌcua̱nk saꞌ xnaꞌajeb li camenak li cuanqueb cuiꞌ li incꞌaꞌ queꞌxpa̱b li Dios li queꞌcamsi̱c saꞌ li ple̱t, chan li nimajcual Dios.
Currently Selected:
Ezequiel 32: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
