Myaso ya Solomoni 3
3
Munakazi
1Ku vutsiki omo njalalele a vulili vwange,
njalotele uje injazema!
Njamushakezekele, oloni kunjamuwanene.
2Njaile nakwendangana mu nganda,
mu vitapalo na mu tungila twatundondo,
njashakezekele uje injazema.
Njamushakezekele oloni kunjamuwanene.
3Vaka-kunyunga mu nganda vaje vakele nakwendangana,
vanjimwene, co njavehwile ngwange,
“Munanjimwenako muka-cizemo cange ndi?”
4Akuvaseza kasimbu kakandondo,
njamuwanene uje injazema mu mwonyo wange.
Njamukwatele, co kunjatavele kumwecela,
noo njamutwalele mu njuvo ya vanana,
ku mulili uje vanjikitilile.
5Yeni vanakazi va mu Yelusalema, njikulaeseni
lisingeni ali vishonge na vimbambi#3:5 VISHONGE NA VIMBAMBI: Kenga 2:7.
ngeci kumukendula cizemo,
kuvanga noo cikeco vavenya cishaka.
Mwaso wamucitatu
Vasamba vavo
6Vikajo vije vilinakwija kutunda mu mambo,
vyakufwa ngwe vimanda vya vwisi
vilinakunika lwengo lwaluvwa
lwa insense na miila,
insense yakulandesa vaka-kulandulula?
7Solomoni ikeye alinakwija
vanamwambata a litanda lyendi,
mashwalale va nzili va mu Isalele
vakupwa makumi atanu na limo, vanamuzengeleka.
8Voshe vapwa vaka-kulwa na mikwale
vapwa vaka-kukanyama manene mu nzita,
munu na munu nalilemeka mukwale a mbunda yendi,
mukulinyunga nawo ku vutsiki.
9Mwene Solomoni vamwambatele
a litanda lyalivwa,
lije vapangele na viti vya ku Lembanone.
10Vimanda vyalyo vavifwika na siliva,
akamwa yalyo ali nanga yakwoleka na ngolinde.
Misato yalyo vaifwika vinanga vyakuvenguluka,
vyakutonga mwamuvwa
vanakazi va mu Yelusalema
vakevo vanaitongo mukumwesa cizemo cavo.
11Yeni vanakazi va mu Siyone,
ijeni mumone Mwene Solomoni.
Mwene Solomoni nazala cilongo
cije civamuzikile vaina ku mutwe wendi,
a litangwa lya vulo vwendi,
a litangwa lyakuvwaelela nakujolela kwendi.
The Bible in Mbunda ©The Bible Society of Zambia, 2006