Myaso ya Solomoni 4
4
Munalume
1Kenga, uwamuvwa muka-cizemo cange,
mwa vushunga uwamuvwa manene.
Mesho ove atemwina cizemo,
omo unalifwiki lilesu ku mesho ove.#4:1 OMO UNALIFWIKI LILESU KU MESHO OVE: Kenga Kushangumuka 24:65.
Vin̄ambu vyove vyavilaja vinafu ngwe maka a vimembe
vaje vashelumuka kutunda ku malundu a Ngilyande.
2Mayo ove anapu akutoka
ngwe vutanga vwa vimanga vakuteula
vaje vatunda mukujwela.
Mayo ove oshe alimwamuvwa mu kanwa kove,
nalimo lyai linapukukamo.
3Tunwa twove tunapu ngwe vwanda vwakuvenguluka,
tunapu twatuvwa omo wendeka,
vinana vyove vinalifu na mbazuvwila ya
mapomingilanete omo unalifwiki nanga ku mutwe wove.
4Mukoshi wove unapu ngwe kaposhi ka Mwene Ndaviti,
kaje kavatunga na vutongwe
kuje kwajenjela vintelo vyakupwa 1,000
vya mashwalale va nzili.
5Mavele ove anapu ngwe vana vampasa va vishonge
vaje valinakulya akati ka man̄anda.
6Njikakala a lilundu lya miila,
a lilundu lya insense,
noo litangwa linalauka,
co lisusulungu linahu.
7Uwamuvwa muka-cizemo cange,
kumwesi kapenga muli yove!
8Ija tuye amo nange tutunde ku Lembanone, shombolwa yange,
ija tuye amo nange tutunde ku Lembanone.
Shelumuka utunde akamwa ya Munkinda wa Amana,
utunde ku Munkinda wa Senile
na ku Munkinda wa Helemone,
kuje kwakala vindumba na viingwe.
9Unakoko mbunge yange,
ndokazi yange, shombolwa yange,
unakoko mbunge yange akunjikenga na mesho ove,
na sungu yove ije unazala.
10Cizemo cove cinanjivwaelelesa,
ndokazi yange, shombolwa yange.
Cizemo cove cinapu cacivwa
manene kutuvakana vinyu,
mazi ove a lwengo
anatuvakana vyuma vyoshe
vyakunika lwengo.
11Yove shombolwa yange,
ku kanwa kove kukandweke
ngwe ngenga ya vuki,
mavele na vuki vyakala mwisi ya ndaka yove.
Vweko vwa vuzalo vwove
vunapu ngwe vweko vwa miti ya ku Lembanone.
12Ndokazi yange, shombolwa yange,
unapu ngwe citungu cakusita,
unapu ngwe lisima lyakusita
nambe ngwe lisima lya kavwelu-vwelu lyakusita.
13Vimbuto vyove vyapwa ngwe citungu
ca miti ya mapomingilanete,
muje muli vushuka vwavuvwa,
muli hena, na nalende,
14na sefelone, na cinyota, na sinamone,
na miyati yoshe ya insense,
na miila, na malimangango,
na miti yoshe ya n̄undu.
15Yove u kavwelu-vwelu ka mu citungu,
lisima lya mema a mwonyo,
vana va vindonga vakwita
kutunda ku Munkinda wa Lembanone.
Munakazi
16Induka, yove lihunzi lya ku kunto.
Huwila mu citungu cange,
yove lihunzi lya ku mbwela,
shulisamo na lihunzi lya lwengo lwaluvwa.
Muka-cizemo cange aije mu citungu cendi
nakulya vushuka vwamwo vwavuvwa.
The Bible in Mbunda ©The Bible Society of Zambia, 2006