Myaso 97
97
Njambi ikeye Mwene wa Akamwa ya Akamwa
1Shukulu Kalunga ikeye mwene!
Kaye kavwaelele ngwe vanu!
Man̄anda a mu mema a kalunga
ajolele ngwe vanu!
2Mashelwa na lisusulungu vinamuzengeleka,
co kushungama na vushunga
vikevyo vyapwa luvula lwa litanda lyendi.
3Tuhya tulinakutunda ku litanda lyendi,
nakwenyeka vitozi vendi vaje vanamuzengeleka.
4Mihyato ya Shukulu Kalunga itwila ceke a kaye,
kaye kamona mihyato, co kajaja.
5Malundu asosonyoka ngwe sela
ku mesho a Shukulu Kalunga wa kaye koshe.
6Melu asholola vushunga vwa Shukulu Kalunga,
co vanu voshe vamona vumpau vwendi.
7Voshe vaje valemesa tumponya,
shwamwa ikavakola,
vinjambi voshe va makuli vakatsikama
kuli Shukulu Kalunga.
8Yove Shukulu Kalunga
omo vanu va Siyone na vanu va Yunda
vaziva kusompa kwove kwa vushunga,
co vajolela.
9Shukulu Kalunga Muka-nzili yoshe,
yove washwana kaye koshe,
yove wakala na vumpau kuhyana vinjambi voshe.
10Yeni mwazema Shukulu Kalunga
munapande kuzinda vuvi,
Shukulu Kalunga akanyungu vanu vendi va kulongwa,
nakuvapatula ku nzili ya vaka-muuka.
11Ceke citwila ali vaka-vushunga,
nakujolela kukaija ali vaka-kushungama
mu vimbunge.
12Joleleni muli Shukulu Kalunga yeni voshe vaka-vushunga,
anukeni vije vyanalingi Njambi wakujela,
co mushangazaleni.
The Bible in Mbunda ©The Bible Society of Zambia, 2006