Myaso 96
96
Njambi ikeye Mwene wa Akamwa ya Akamwa
(1 Miz 16:23-33)
1Imbileni Shukulu Kalunga mwaso wauha!
Imbileni Shukulu Kalunga yeni vaka-kaye voshe!
2Imbileni Shukulu Kalunga, shangazaleni lizina lyendi!
Ambululeni kwamena kwendi a litangwa na litangwa.
3Ambululeni vumpau vwendi kuli vanu,
na vilinga vyendi vyakukomokesa kuli vanu voshe.
4Shukulu Kalunga wapwa wakama,
co vanapande kumushangazala,
ikeye lika vanapande kusingimika
kuhyana vinjambi voshe.
5Omwo vinjambi voshe va vanu vapwa tumponya lika,
oloni Shukulu Kalunga ikeye watangele melu.
6Singimikeni nakushangazala Shukulu Kalunga,
nzili yendi na vuvwa vwendi vili mu Njuvo yendi yakujela.
7Shangazaleni Shukulu Kalunga yeni vanu voshe va ano asi,
shangazaleni vumpau vwendi na nzili yendi!
8Shangazaleni lizina lya Shukulu Kalunga lya vumpau,
neneni milambu,
co ijeni mu Njuvo yendi.
9 #
Mya 29:1-2
Yeni vaka-kaye voshe
tsikameni nakulemesa Shukulu Kalunga,
na vuzalo vwakumulemesa navwo,
vaka-kaye voshe vajaje ku mesho endi!
10Endekeni kuli vanu voshe ngweni,
“Shukulu Kalunga ikeye mwene!
Kaye anga vakemikilile mu mwela wako
kukesi kushwenya embwe,
ikeye akasompa vanu voshe mu vushunga.”
11Melu ajolele, na asi avwaelele,
mema a kalunga akume
na vyoshe vije vilimo,
12mahya avwaelele ngwe vanu,
na vije vyoshe vilinakumenamo!
Co miti ya mu shwata itambeke nakujolela
13ku mesho a Shukulu Kalunga,
omwo aija nakusompa vanu voshe vali ano asi.
Akasompa kaye na vanu mu vushunga.
The Bible in Mbunda ©The Bible Society of Zambia, 2006