Myaso 78
78
Njambi na vanu vendi
Mwaso wa Asafe
1Yeni vanu vange,
tolilileni ku vilongesa vyange,
tolilileni vije vinjendeka.
2Njikendeka mu visimo na mu tusau
a vyuma vije vyalingiwile ku san̄ulu,
3vyuma vije twazivile nakuzivuka.
Vyuma vije vivatulekele vakukulwila vetu,
4kutukavishwekela vana vetu embwe,
oloni tukavileka ku cisemwa cije cikaija kulutwe,
a nzili ya Shukulu Kalunga
na vilinga vyendi vyakama,
na vyuma vyakukomokesa vije vyanalingi.
5Ikeye waanene vukaleo ku vanu va Isalele,
na mashiko kuli vatekulwila va Yakomba.
Ikeye washikile vakukulwila vetu,
ngeci valongese mashiko endi ku vana vavo,
6ngeci cisemwa cikaija kulutwe vakalilongesevyo,
co vakavileka ku vana vavo.
7Mu ngila eyi vakevo lalo vakakulaela Njambi,
kujeneka kwivala vije vyalingile,
oloni simbu yoshe vakononoke mashiko endi.
8Vakevo kuvakapu ngwe vakukulwila vavo,
vanu vakukaluwa vimbunge nakujeneka kwononoka,
vanu vaje kuvakulaelele Njambi,
co kuvapwile va kulongwa kuli ikeye.
9VaEfalime vakele na mata a lusipa na mikili,
oloni vatewele a litangwa lya nzita.
10Vakevo kuvanyungile cikumiiyo cavo na Njambi,
vavyanene kwononoka mashiko endi.
11Vevalele vije vyalingile,
vikomokeso vije vyavamwesele.
12Ikeye walingile vikomokeso kuli vakukulwila vavo,
mu cana ca Zoane mu lifuti lya Ingito.
13Ikeye waangunwine mema a kalunga nakuvetisamo,
wemikile mema ngwe vivumbe.
14A simbu ya mutanya
wavatwamenenene na lishelwa,
co a simbu ya vutsiki wavatwamenenene
na ceke ca tuhya.
15Ikeye watavozwele mamanya mu mambo,
co wavanene mema amangi,
ngwe mema a mu mema a kalunga.
16Ku limanya kwatundile muna ndonga
co mema etile ngwe vindonga.
17Oloni vanu anga valingile vuvi ku mesho a Njambi,
vatengulukilile wa Akamwa ya Akamwa mu mambo.
18Co valingile shakelo mukweseka Njambi,
akulomba vyakulya vivashakele.
19Vayeluwisile Njambi nakwendeka ngwavo,
“Kuma Njambi asa kutuwanena vyakulya mu mambo ndi?
20Mwa vushunga vene omo wapupile ku limanya,
mema etile, co vana va vindonga vajalelele,
kuma asa lalo kutwana makende,
nakwana vanu vendi situ ndi?”
21Ngecivene, Shukulu Kalunga waluvalele omo wavazivile,
walwisile vanu vendi na tuhya,
co vukalu vwendi vwakele ali vakevo,
22omwo kuvakulaelele kuli ikeye,
nakukulaela ngeci asa kuvamena.
23Oloni washikile mashelwa mwilu,
co waashokolwele ngwe mapito.
24Wavanyokeselele maana ngeci valye,
nakuvana vimbuto vya vinona vya mwilu.
25Ngecivene, valile vyakulya vya tungelo,
co Njambi wavanene vyakulya vyoshe vije vivashakele.
26Wahuwisile lihunzi lya mu ngangela,
co na nzili yendi watwamenenene lihunzi lya mu mbwela.
27Watumine tuzila vavangi ku vanu vendi,
vapwile vavangi ngwe lishen̄avu
lya ku cikuma ca mema a kalunga,
28vawililile mukati ka cilombo cavo,
kuzengeleka vimbalaka vyavo,
29ngecivene, vanu valile nakukuta,
co Njambi wavanene vyoshe vivashakele.
30Oloni omo lishungu lyavo lyakulya kanda lihwe,
31Njambi waluvalele navo,
co watsiile vanalume vakutakama,
vanalume vavavwa va mu Isalele.
32Nameme ngoco anga vakele nakulinga vuvi,
vavyanene kukulaela vipangi vya Njambi vyakukomokesa,
33ngecivene, wakeesele matangwa ngwe mbundu,
co wamanesele kuyoya kwavo vwasi-vwasi.
34Omo watsiileo vamo, co vaje vasaleleo velukile kuli ikeye,
co vatengulukile nakulombela manene kuli ikeye.
35Vanukile ngeci Njambi wapwa limanya lyavo lya nzili,
Njambi Muka-nzili yoshe ikeye muka-kuvakwasa.
36Oloni vamushangazalele ngoco
na tunwa twavo, nakwendeka makuli
37omwo vimbunge vyavo kuvyapwile vya vushunga,
kuvapwile vaka-kukulaela cikumiiyo
cije valikumiiye na Njambi.
38Oloni Njambi wapwile
muka-mema ku mbunge ku vanu vendi,
wavasambesele kukuvulumuna kwavo,
co kavanyongesele embwe.
Visimbu vyoshe watutumwisile ku vukalu vwendi,
co kavumwesele embwe.
39Wanukile ngeci vapwile vanu lika,
vapwile lika ngwe lihunzi lije lilinakuhuwa, co liya.
40Visimbu vyavingi vamutengulukilile mu mambo,
nakumuvavalesa ku mbunge!
41Vatengulukile lalo nakweseka Njambi,
co vashangumwine Njambi Wakujela wa Isalele.
42Vevalele nzili yendi yakama,
nakwivala lalo litangwa lije lyavamenene ku vitozi vavo.
43Njambi walingile vilinga vyendi vya nzili,
na vizivukiso mu cana ca Zoane,
mu lifuti lya Ingito.
44 #
Kut 7:17-21
Ikeye watengulwile mema a mu vindonga kupwa maninga,
co vaka-Ingito kuvakele na mema akunwa.
45 #
Kut 8:1-6,20-24 Watumine vinzinzi akati kavo vaje vavayandesele
na mambotwe vaje vaviisile mu lifuti lyavo.
46 #
Kut 10:12-15
Watumine vimbimba-mikumbi vaje valile vushuka vwavo
nakuviisa vimbuto vyavo mu mahya avo.
47 #
Kut 9:22-25
Ikeye lalo waviisile miti yavo
ya mikolovozi ya vushuka vwa vinyu
na nyonzi ya mamanya,
na miti ya mikuyu waiviisile na mbundu.
48Watsiile vingombe vyavo
na nyonzi ya mamanya,
co watsiile matanga avo na muhyato.
49Wavamwesele tuyando twakama
akuvamwesa vukalu vwendi na matoto endi,
vije vyezile ngwe mbunga ya tungelo yakunyongesa.
50Ikeye kalikelele kuluvala,
nameme kwamena myonyo yavo ku kutsa,
oloni wavatsiile na mushongo wakulitambwisa.
51 #
Kut 12:29
Watsiile va ntwatwa voshe va vanalume,
va ku naanga yoshe ya mu Ingito.
52 #
Kut 13:17-22
Asinoni watwamenenene vanu vendi ngwe kanyungi,
co wavatwalele mu mambo.
53 #
Kut 14:26-28
Ikeye wavatwamenenene mwamuvwa,
co kuvazivile lyova,
oloni mema a kalunga akupwile vitozi vavo.
54 #
Kut 15:17; Yos 3:14-17 Co wavanenele ku lifuti lyendi lyakujela,
ku minkinda ije yafungulwile ikeye vavenya.
55 #
Yos 11:16-23
Ikeye washekelemo vavenya lifuti
omo vanu vendi vakele nakuya kulutwe,
co wapangezelele lifuti lyavo
akati ka miyati ya Isalele,
nakwana membo avo ku vanu vendi.
56 #
Maa 2:11-15
Oloni vatengulukilile Njambi
Muka-nzili yoshe nakumweseka,
co kuvanyungile vizilika vyendi.
57Oloni vapwile vaka-kujeneka kulongwa
nakujeneka kukulaela ngwe vakukulwila vavo,
kuvapwile va vushunga,
vapwile ngwe mukili wa kupenga-penga.
58Vamuluvalesele na malundu avo akulemesela,
co vamuzivisile lifuwa na tumponya twavo twakushonga.
59Omo Njambi wamwene eci waluvalele,
co wavyanene vanu vendi kuvyanenena.
60 #
Yos 18:1; Njele 7:12-14; 26:6 Wasezele mbalaka ya ku Shilo,
mbalaka ije yashimbikile
omo wakele akati ka vanu.
61 #
1 Sam 4:4-22
Watavele vitozi vavo kwambata
Cikasa ca Cikumiiyo,
cimweso ca nzili yendi na vumpau vwendi.
62Waluvalele manene na vanu vendi,
co watavele ngeci vitozi vavo vavatsiye.
63Vakwenje vavatsiilile mu nzita,
co vambanda kuvashombokele.
64Vaka-kukombelela vavatapele na mikwale,
co vifwile vavo kuvavalilile.
65Akukotoka Shukulu Kalunga wendukile
ngwe munu atunda a tulo,
wafwile ngwe cingenyenye uje navwaelela
omwo napende vinyu.
66Washekele vitozi vendi,
co wavazivisile shwamwa ku myaka yoshe.
67Wavyanene vatekulwila va Yosefa,
oloni kaangwile muyati wa Efalime,
68oloni waangwile muyati wa Yunda,
na Munkinda wa Siyone uje wazemene.
69Watungile Njuvo yendi yakujela,
nakuyipwisa yailaja ngwe munkinda,
ngwe kaye kaje kaatumbika myaka yoshe.
70Waangwile ngamba yendi Ndaviti,
co wamutundisile kukunyunga matanga a vimanga,
71 #
1 Sam 16:11-12; 2 Sam 7:8; 1 Miz 17:7 wamutundisile ku matanga a vimanga akupwa 1,000,
co wamupwisile mwene wa Isalele,
kanyungi ka vanu va Njambi.
72Ngecivene, Ndaviti wavanyungile na mbunge imo,
co wavatwamenenene na mana.
The Bible in Mbunda ©The Bible Society of Zambia, 2006