Myaso 77
77
Kuzembeleka a simbu ya tuyando
Mwaso wa Asafe
1Njikatambeka manene kuli Njambi,
njikatambeka manene,
co akanjiziva.
2A simbu ya n̄avava njilomba
kuli Shukulu Kalunga,
vutsiki njijundula mavoko ange nakulombela,
oloni kunjalizembelekele.
3Omo njanuka Njambi,
co njilinyenga omo njiyongola,
co njizeya manene.
4Yove unanjilalesa cilavu-lavu,
njalijujukila manene,
ngeci kunjasa kwendeka.
5Njinayongola a matangwa akulaja
co njinanuka myaka ya ku san̄ulu.
6Njanukile myaso ku vutsiki,
evi vikevyo njalyendekesele mu mbunge yange ngwange,
7“Kuma simbu yoshe Shukulu Kalunga akatuvyana ndi?
Kuma kukwesi simbu yakavwaelela netu ndi?
8Kuma cizemo cendi cije kucesi kutenguluka cinahu ndi?
Kuma vikulaeso vyendi vinahu ku myaka yoshe ndi?
9Kuma Njambi nevala kukala na mema ku mbunge ndi?
Kuma vukalu vwendi vunatundisa kutetela kwendi ndi?”
10Asinoni njalyendekesele mu mbunge yange ngwange,
“Cuma cakama cilinakunjizivisa ku mbunge kuvavala
cinapu ngeci Njambi kesi na nzili lalo.”
11Shukulu Kalunga,
njikanuka vilinga vyove vyakama,
mwa vushunga vene njikanuka vikomokeso
viwalingile ku simbu ya kunima.
12Njikanuka vipangi viwunalingi,
nakuyongola vilinga vyove vyoshe vya nzili.
13Vyuma vyoshe viwukalingi yove Njambi vyapwa vyakujela!
Njambi mukajo lalo wakama
wakuhyana yove Njambi yetu?
14Yove u Njambi uje muka-kulinga vikomokeso,
yove wamwesele nzili yove akati ka vanu.
15Yove wamenene vanu vove
vatekulwila va Yakomba na Yosefa,
na nzili yove yakama.
16Yove Njambi omo mema a kalunga akumwene,
co azivile lyova ngwe vanu,
na vinzinga vya mema a kalunga vyajajele ngwe vanu.
17Mashelwa anyokesele nyonzi,
co cililimo calumine mwilu,
na mihyato yahyahyatele ku mitambela kwoshe.
18Mikalateto ya cilumo cove yasholokele,
na mihyato yahyahyatele mu kaye mwoshe,
co asi ajajele.
19Wendele a mankimba,
wajavukile mema a kalunga,
oloni myanja yove kuyasholokele.
20Watwamenenene vanu vove ngwe kanyungi,
waangwile Mosesa na Alone kupwa vantwama vavo.
The Bible in Mbunda ©The Bible Society of Zambia, 2006