Myaso 76
76
Njambi Muka-kuhyana
Mwaso wa Asafe
1Njambi vamuzivuka mu Yunda,
lizina lyendi lyapwa lyakama mu Isalele.
2Limbo lyendi lyakala mu Yelusalema,
ikeye wakala a Munkinda wa Siyone.
3Wapokozwele mikili ya vitozi kuje,
na vintelo vyavo,
na vimoko vya mukwale,
na vitwa vyavo vyoshe vya nzita.
4Vumpau vwove vwapwa vwakukomokesa yove Njambi!
Yove uwakama,
omo utunda ku minkinda kuje kuwafungulwile vitozi vove!
5Mashwalale vavo va vingenyenye vanavapukula
vyoshe vivanakala navyo,
co vanalala ngumbanga vanatsi,
nzili yavo yoshe na vutongwe vwavo vinapu vyangoco.
6Omo yove Njambi ya Yakomba waluvalele,
co tuvalu na vaka-kulondao vawile na kutsa.
7Oloni yove Shukulu Kalunga voshe valinakukukomoka!
Iyajo asa kwimana ku mesho ove omo unaluvala?
8Kusompa kwove vacizivukile tunde mwilu,
vanu va asi vazivile lyova volokele kuluu,
9omo yove wakatukile nakusompesa,
nakwamena voshe vavayandesele va ano asi.
10Mwa vushunga nameme vanu
vanaluvala vakakushangazala,
vaje vanovoka ku vinzita vakanyunga viwano vyove.
11Aneni Shukulu Kalunga Njambi yeni
vije mwamukulaesele,
yeni voshe miyati ya muyehi muneneleni vwana.
Njambi ikeye imunapande kukomoka.
12Ikeye ononwesa vana va vimyene va kulyalesa,
nakuzivisa lyova vimyene vakama.
The Bible in Mbunda ©The Bible Society of Zambia, 2006