Myaso 75
75
Njambi ikeye lyaako
Mwaso wa Asafe
1Tukukandelela yove Njambi, tukukandelela!
Twambulula vukama vwove
na vilinga vyove#75:1 VUKAMA VWOVE NA VILINGA VYOVE: Nambe, lizina lyove lilikuyehi, co valinakulyambulula. vyakukomokesa viwunalingi!
2Njambi nendeka ngwendi,
“Njinemika simbu ya kusompa,
co njikasompa mu vushunga.
3Nambe asi na vyoshe vije vyakalao vijaja,
oloni yange njikakolesa luvula lwa asi mbe.
4Njendekele na vaka-kulyalesa ngwange,
‘Kesi mulyalese,’
co na vaka-vuvi ngwange,
‘Kesi mulishashe.’
5Njavalekele ngwange kesi valimwese vukama,
co kesi vendeke nakulishasha.”
6Kuhyana kucikatundu mu ngangela
nambe mu kangombe ka yambi,
nambe ku kunto, nambe mu mbwela,
7Njambi lika ikeye lyaako,
ahisa munu umo nakusambesa mukwavo.
8Mu livoko lya Shukulu Kalunga
muli nganja inashulu na vinyu vya vukalu vwendi,
akavitila asi,
co vaka-vuvi voshe vakavinwa nakuvimanesa.
9Oloni yange njikambulula vuvwa vwove
ku myaka yoshe,
njikakwimbila mwaso wakukushangazala,
yove Njambi ya Yakomba.
10Ikeye akanyongesa nzili ya vaka-vuvi,
oloni akana nzili kuli vaka-vushunga.
The Bible in Mbunda ©The Bible Society of Zambia, 2006