Myaso 74
74
Lilombelo lyakupatula muyati
Mwaso wa Asafe
1Omwo vikajo unatusezela yove Njambi?
Kuma ukaluvala na vanu vove ku myaka yoshe ndi?
2Anuka vanu vove vaje vawalyangwilile
tunde ku san̄ulu,
vaje vawatundisile mu vunzinda
kupwa muyati wove.
Anuka Munkinda wa Siyone limbo lyove!
3Ija umone Njuvo yove muyinavujuka,
vitozi vetu vananyongesa
vyuma vyoshe vya mu Njuvo yove.
4Vitozi vove vanatambeka
nakuvwaelela mu Njuvo yove,
vanashimbika vipandelo
kupwa vimweso vyakuhyana.
5Vafwile ngwe vanu vaka-kukanja
vinjaviti ku lyumbu lya miti.
6Vatavozwele mavaya oshe
akushonga mwamuvwa,
na vinjaviti vyavo na vundoma.
7Vanajwalesa Njuvo yove nakuyenyeka.
8Valyendekesele ngwavo,
“Tukavanyongesa voshe njwa.”
Vanenyeka mitambela yoshe yakujela ya mu lifuti.
9Vizivukiso vyetu vyoshe vyakujela vinahu,
co lalo kukwesi vaka-kwimanena vanasalako,
naumo wai lalo azivuka simbu ije cuma eci cikahwa.
10Yove Njambi visimbu vingaijo,
vitozi vetu vakakujola?
Kuma vakatwalao kushaula lizina lyove
ku myaka yoshe ndi?
11Omwo vikajo unavyana kutukwasa?
Vikajo unelwisila mavoko ove kunima?
12Oloni yove Njambi,
tunde ku san̄ulu unapu u mwene yetu,
unatwamena visimbu vyavingi.
13Wangunwine mema a kalunga na nzili yove,
co watavozwele mitwe ya vikashama
vya mu mema a kalunga,
14yove watsenene mutwe wa cikashama Levyatane,#74:14 LEVYATANE: Nzili ya Njambi a cikashama ou inemanena nzili yendi a vyuma vyoshe vije watangele nakwimanena lalo nzili yendi akufungulula Ingito.
co waanene situ yendi kupwa vyakulya
vya tusitu va mu mambo.
15Yove watuwisile mema a tuvwelu-vwelu
na vana va vindonga,
co womisile mema mu vindonga vyakama.
16Yove watangele litangwa na vutsiki,
co waakele litangwa na ngonde mu myela yavyo,
17yove waakele vinginga vya asi,
co waakele ndombo na cisika.
18Shukulu Kalunga,
anuka muvali nakukujola vitozi,
anuka muvali nakushaula,
nakuyeluwisa lizina lyove.
19Kesi useze vanu vove vaje kuvesi na seo
ku vitozi vavo vaka-muuka,
kesi wivale vanu vove vaje vali mu tuyando!
20Anuka cikumiiyo cije walikumiiye netu,
omwo ku mitambela yoshe ya ano asi kuli lwozi.
21Kesi utave vaje vali mu tuyando vazive shwamwa,
oloni tuutu na vaka-kujeneka vakushangazale.
22Katuka nakulyamena yove Njambi!
Anuka ngeci simbu yoshe vaka-vuvi valinakukujola!
23Kesi wivale muyoyo,
uje uvalinakulinga vitozi vove,
uje uvalinakulinga simbu yoshe.
The Bible in Mbunda ©The Bible Society of Zambia, 2006