Myaso 66
66
Mwaso wakushangazala nakukandelela
Mwaso
1Shangazaleni Njambi yeni vanu voshe va asi,
na mutambi wakujolela!
2Imbeni mwanuke vukama vwa lizina lyendi,
mushangazaleni nakumulemesa!
3Endekeni kuli Njambi ngweni,
“Unalingi vyuma vyakukomokesa,
nzili yove inapu yakama manene
ngeci vitozi vove valiita kuli yove.
4Vanu voshe va ano asi vakakulemesa,
vakaimba myaso yakukushangazala,
vakaimba nakushangazala lizina lyove.”
5Ijeni mumone vyanapanga Njambi,
vilinga vyendi vyakukomokesa
vyanalingi akati ka vanu.
6Watepesele mema a kalunga,
co vakukulwila vetu vajavukile ndonga na mendi.
Co twajolelele omwo a vije vyalingile.
7Ikeye ashwana na nzili yendi ku myaka yoshe,
co mesho endi alinakukenga a miyati yoshe.
Kesi mumutengulukile nakumulwisa.
8Shangazaleni Njambi yetu yeni vanu voshe,
kushangazala kweni vacizive.
9Ikeye akanyungu myonyo yetu,
kesi kutava ngeci tupelyangele.
10Unatwilula yove Njambi,
co unatweseka ngwe muvakeseka siliva mu tuhya.
11Unatava ngeci tutse mu mweto,
co unatutwiki vitele vyakulema a myongo yetu.
12Unatava ngeci vitozi vetu vatulyatangele,
tuneti mu tuhya na mu livazi,
oloni ololo unatwetesa ku mutambela wauvwa.
13Njikanena vin̄ombelo vya kwenyeka ku Njuvo yove,
co njikakombelela vije vinjakukulaesele.
14Njikakwana vije vinjakukulaesele,
omo njakele mu tuyando.
15Njikakombelela vin̄ombelo vya kwenyeka
vya vimanga a mutula,
njikakombelela lalo vingombe va nkomba na vimembe,
co vwisi vukaya kwilu.
16Yeni voshe vaka-kusingimika Njambi,
ijeni, co tolilileni,
ijeni njakumileke vije vyananjilingila.
17Njatambekele kuli ikeye ngeci anjikwase,
co njamushangazalele na myaso.
18Nga njashwekele vuvi vwange,
nga Shukulu Kalunga kanjitolilile.
19Oloni mwa vushunga Njambi wanjizivile,
co watolililile ku lilombelo lyange.
20Njikashangazala Njambi,
omwo kavyanene lilombelo lyange,
nambe kutundisa cizemo cendi
cije kucesi kutenguluka kuli yange.
The Bible in Mbunda ©The Bible Society of Zambia, 2006