Myaso 65
65
Kushangazala nakukandelela
Mwaso wa Ndaviti
1Mwamuvwa kuli yetu kukushangazalela mu Siyone yove Njambi,
nakunyunga vikulaeso vyetu kuli yove,
2omwo yove ukakumbulula malombelo,
vanu voshe vakaija kuli yove.
3Milonga ya vuvi vwetu inatuhyana,
oloni yove watusambeseleyo.
4Navezika munu uje iwunaangula,
nakumushwenyesa kuli yove,
ngeci akale mu lipela lyove.
Tunakuta na vyuma vyavivwa vya ku Njuvo yove,
vivezikiso vya mu Njuvo yove yakujela!
5Yove ukatukumbulula nakutuhyanesa,
unalingi vyuma vyakukomokesa mukutwamena.
Vanu voshe vali ano asi,
nameme vali kulyala ku mema a kalunga
vanakulaela kuli yove.
6Yove wemikile minkinda mu mitambela yayo
na nzili yove,
mukusholola nzili yove yakukomokesa.
7Yove ukolwesa kukuma kwa mema a kalunga,
na muyoyo wa mankimba,
ukwolwesa lalo muyoyo wa vanu.
8Vanu voshe vaje vali kulyala,
vanazivi lyova a vikomokeso vyove.
Vilinga vyove vinena kujolela nakuvwaelela
kuli voshe vaje vali a kaye.
9Ukanyungu lifuti akulitumina nyonzi,
co wakamo vwilo.
Ukashulisa vana va vindonga na mema,
nakumenesa vimbuto asi.
Omu mukemwo muukalingi.
10Ukatumu nyonzi yaingi ya vusuku-mbundu
nakumenesa vimbuto.
11Vushunga vwove vunena kuteja kwakuvwa!
Kwoshe kuje kuuli kwakala vyuma vyavingi!
12Ku mutambela kwakulila vimanga
kunashulu na matanga,
kumukulo wa malundu kunashulu nakujolela.
13Mu vimbongo munashulu vimanga,
na mu vyana munashulu tiliku,
vyoshe vitambeka nakwimba
nakujolela ngwe vanu!
The Bible in Mbunda ©The Bible Society of Zambia, 2006