Myaso 64
64
Lilombelo lyakunyunga
Mwaso wa Ndaviti
1Tolilila ku lilombelo lyange yove Njambi,
omwo njili mu tuyando.
Njili na lyova lya vitozi vange, njamene!
2Njinyunge ku matumbe a vaka-vuvi,
na ku vimunga vya vaka-kulinga vuvi.
3Vindaka vyavo vinapu ngwe vimoko vya mbeli,
majwi avo amavi anapu ngwe mikili ya vushungu.
4Vashandola vwasi majwi a makuli
a shwamwa,
co vanyongesa vanu vavavwa
na majwi a lyova akuvavangeya.
5Valikundwila umo na mukwavo ku matumbe amavi,
vasimutwiya vyakutsiya vanu mu vushweke
co vendeka ngwavo, “Wai asa kutumona.”
6Vatumba matumbe amavi,
co vendeka ngwavo,
“Tunatumbu vutumbe vwavuvwa vwakutsiilamo vanu.”
Mbunge na mana a munu vyapwa vyakulova!
7Oloni Njambi akavasha mikili,
co vakavetwa.
8Vakavanyongesa na majwi a mu tunwa twavo,
co voshe vakavamona vakalipika ku mitwe yavo.
9Voshe vakaziva lyova,
co vakendeka ngwavo,
“Kengeni vyanalingi Njambi,
co vinyungeni mu vimbunge vyeni.”
10Vanu voshe vaka-vushunga vakajolela
omwo vije vyanalingi Shukulu Kalunga,
co muli ikeye vakawana kwoloka,
vanu voshe vakushungama mu vimbunge vakamushangazala.
The Bible in Mbunda ©The Bible Society of Zambia, 2006