Myaso 63
63
Kushungwiya Njambi
Mwaso wa Ndaviti, omo wakele mu mambo ya Yundeya (1 Sam 23:14)
1Yove Njambi,
yove unapu u Njambi yange, njikulemesa,
mbunge yange ishakezeka yove,
yange njikushakezeka ngwe
munjikashakezeka mema mu mambo.
2Njamwene nzili yove na vumpau vwove,
mu Njuvo yove yakujela.
3Cizemo cove cije kucesi kutenguluka
capwa cacivwa kuli yange
kutuvakana mwonyo,
ngecivene, njikakushangazala.
4Njikakushangazala simbu yoshe yakuyoya kwange,
njikajundula mavoko ange nakulombela kuli yove.
5Mbunge yange ikavwaelela,
co njikaimba myaso yakuvwaelela yakukushangazala.
6Omo njilala a vulili vwange njikakuyongola,
vutsiki vwoshe njikanuka lika yove,
7omwo wapwa u mukwasi wange.
Co njiimba nakujolela,
mu munzinze wa mambava ove.
8Njikakateya kuli yove,
co livoko lyove linjinyunga mwamuvwa.
9Vaje voshe vashaka kunjitsiya,
vakaya mu vukalo vwa vatsi.
10Vakavatsiila mu nzita na mikwale,
co mivila yavo vakailya ku vimbanje.
11Mwene akavwaelela muli Njambi,
voshe vaje vanakulaela
mu lizina lya Njambi vakajolela,
oloni vaka-makuli vakoloka kuluu.
The Bible in Mbunda ©The Bible Society of Zambia, 2006