Myaso 62
62
Kukulaela mukunyunga kwa Njambi
Mwaso wa Ndaviti
1Kukwesi kweka kwakutewela
kuvanga kuli Njambi lika,
kwamena kwange kutunda kuli ikeye.
2Ikeye lika muka-kunjinyunga nakunjamena,
ikeye cimpaka cange,
co naumo wai akanjifungulula.
3Visimbu vingaijo yeni voshe
mukalwa na munu wakuzeya?
Uje napu ngwe civumbe cakusiwuka,
nambe ngwe cimpaka cije cishaka kusiwuka?
4Yeni mushaka lika kunjitundisa
mu mwela wange wa kasingimiko,
yeni muvwaelela mukwendeka makuli.
Mulinakwendeka majwi a cizemo,
oloni mu vimbunge vyeni muli cizindo.
5Kukwesi kweka kwakutewela
kuvanga kuli Njambi lika,
omwo cinyangavili cange citunda kuli ikeye.
6Ikeye lika muka-kunjinyunga nakunjamena,
ikeye cimpaka cange,
naumo wai akanjifungulula.
7Kwovoka kwange na kasingimiko kange
vyakala muli Njambi,
ikeye limanya lyange lyakukola,
muli Njambi mukemwo munjivanda.
8Eni vasamba vange
kulaeleni kuli Njambi simbu yoshe!
Mulekeni vukalu vweni vwoshe,
omwo ikeye muka-kutunyunga.
9Vanu voshe vanapu ngwe muku,
naumo wai napu wa seo.
Kuvapeselesa voshe kuvesi na vulemu,
vanapu vavehu ngwe muku.
10Kesi mukulaele mu vyuma vya vupapoki,
kesi mukulaele akuwana vyuma
mu ngila ya vwizi embwe,
nameme kukulaela mu vufuko vwavungi.
11Visimbu vyavingi njinazivi
Njambi endeka ngwendi,
“Nzili yakundama kuli yange,
12co njakala na cizemo cije
kucesi kutenguluka.”
Shukulu Kalunga, yove vavenya ukafwete munu na munu
ngwe ku vipangi vyendi.
The Bible in Mbunda ©The Bible Society of Zambia, 2006