Myaso 59
59
Lilombelo lyakunyunga
Mwaso wa Ndaviti, omo Saulu watumine vanu mukuvandamena ku njuvo ya Ndaviti ngeci vamutsiye (1 Sam 19:11)
1Njamene ku vitozi vange yove Njambi yange,
njinyunge kuli vaje vanjilwisa!
2Njamene ku vanu vaka-vuvi,
njamene kuli vaje vashaka kunjitsiya!
3Kenga, vanu vaka-muuka vananjivandamena,
vananjitengulukila ngeci vanjitsiye.
Kesi ngwe njinalingi vuvi
nambe cuma cimo ca kupenga-penga.
4Yove Shukulu Kalunga,
kukwesi mulonga unjinavavulumuna,
vananjivandela nakunjivandamena ngeci vanjitsiye.
5Ija unjikwase yove Shukulu Kalunga
Njambi Muka-nzili yoshe.
Yove Njambi wa Isalele!
Hisa vaka-kujeneka kukukulaela,
kesi uzivile ngozi vaka-kulinga vuvi na vitangwizi.
6Vitozi vange vakeluka a simbu ya cingwezi,
valinga muyoyo ngwe muvakolula tutali
omo vaya nakwendangana mu nganda.
7Tolilila kushaula kwavo nakujujwisa kwavo!
Majwi a mu tunwa twavo
anapu ngwe vimoko vya mukwale,
vayongola ngeci naumo wai avaziva.
8Oloni yove Shukulu Kalunga ukavajola,
ukashendumuna vaka-kujeneka kukukulaela!
9Yove nzili yange,
njikenga kuli yove,
omwo yove Njambi wapwa cimpaka cange.
10Njambi yange mu cizemo cendi
cije kucesi kutenguluka akaija kuli yange,
Njambi yange akanjitavesa
kumona vitozi vange omo vavafungulula.
11Kesi uvatsiye yove Njambi,
nambe vanu vange kesi vevale kuhyana kwove.
Yove Shukulu Kalunga cimpaka cetu!
Vashandole na nzili yove nakuvafungulula.
12Vendeka vyavivi mu tunwa twavo,
na majwi avo oshe anapu a vuvi,
mu kulyalesa kwavo mukemwo vakavakwatela!
Omwo valisinga nakwendeka makuli,
13vanyongese na vukalu vwove,
vanyongese voshe njwa.
Asinoni vanu voshe vakazivuke ngeci
Njambi ikeye muka-kushwana mu Isalele,
kushwana kwendi kunete na ku shongo ya kaye koshe!
14Vitozi vange vakeluka a simbu ya cingwezi,
valinga muyoyo ngwe muvakolula tutali
omo vaya nakwendangana mu nganda.
15Vashakezeka vyakulya,
co vonena nga kuvakutile.
16A mutondo njikaimba a nzili yove,
njikaimba nakutambeka a cizemo cove
cije kucesi kutenguluka.
Omwo yove wapwa cimpaka cange,
cimpaka cange a litangwa lya tuyando.
17Yove muka-kunjamena,
njikaimba nakukushangazala,
yove Njambi wapwa cimpaka cange,
Njambi uje anjimwesa cizemo
cije kucesi kutenguluka.
The Bible in Mbunda ©The Bible Society of Zambia, 2006