Myaso 58
58
Lilombelo lyakulomba kuli Njambi ahise vaka-vuvi
Mwaso wa Ndaviti
1Kuma yeni vaka-kushwana
mukasompo mwa vushunga ndi?
Kuma yeni mukasompo vanu voshe
cifwa cimo ndi?
2Embwe, mukayongola lika a vuvi
vuje vumukalingi,
nakulinga milonga yakama ano asi.
3Vaka-vuvi vapwa vaka-kuviisa
simbu yoshe yakuyoya kwavo,
vendeka makuli tunde a litangwa
lya kusemuka kwavo.
4Majwi avo ali na vushungu
ngwe vushungu vwa manyoka,
vanapu vanu vaje kuvatolilila kukuvanangula,
5vaje kuvesi kuziva lijwi lya muka-kukokweya manyoka,
nambe kuziva kwimba kwa muka-manseno wakunyanyama.
6Yove Njambi,
vitozi vange vali na vukalu ngwe vindumba.
Pukula mayo avo nakupokola vimbange vyavo.
7Vanyonge ngwe muwakomu mema,
vavatsene ngwe muvakalyatangela mwila wa mu ngila,
8vapwe ngwe sela ije isosonyoka kupwa mema-mema,
vapwe ngwe mbututu wakupulumwisa uje kamono litangwa.
9Mu vukalu vwendi Njambi akavapekumwina kulyala,
oku vayoya, nakuvawisa simbu kanda vacizivuke,
ngwe mwila wakukamba.
10Vaka-vushunga vakavwaelela
omo vakamona vaka-vuvi vavahisa.
Mendi avo akajwela mu maninga a vaka-vuvi.
11Co vanu vakendeka ngwavo,
“Vaka-vushunga vanatambula cikandelela cavo,
mwa vushunga kwali Njambi
muka-kusompa vaka-kaye!”
The Bible in Mbunda ©The Bible Society of Zambia, 2006