Myaso 60
60
Lilombelo lyakupatula
Mwaso wa Ndaviti, omo walwile na Alame-nahalaime na Aleme-zova, co Yowave welukile nakutsiya vaEndome 12,000 mu Cimbongo ca Mwongwa (2 Sam 8:13; 1 Miz 18:12)
1Unatumbila kuti yove Njambi,
ngeci vanatufungulula,
unaluvala netu,
oloni ololo tukwase.
2Yove waningangesele lifuti,
unalitavula myanzi.
Shoka myanzi yalyo,
omwo lininganga manene!
3Unayandesesa manene vanu vove,
unatunwisa vwala vwakutupelyangesa.
4Unanangula vaje vakukomoka,
ngeci vatewe kesi vavanyongese.
5Twamene na nzili yove,
co kumbulula malombelo etu,
ngeci vaje vanu vawazema vavamene.
6Ku mwela wendi wakujela
Njambi nendeka ngwendi,
“Njikaangununa Shekeme,
njikapangezela Cana ca Sukote
kuli vanu vange omwo yange njili na nzili.
7Ngilyande yapwa yange,
na Manase lalo yapwa yange,
Efalime yapwa ngwe tepa yange ya nzita,
Yunda ikeyo yapwa mulamu wange wa vumwene.
8Mowavi yapwa ngwe mbashiya yange yakujwelela,
njikasha vin̄aku vyange a Endome.
Kuma vaFilisitiya vayongola ngeci
vakalisamba nakuvwaelela ali yange ndi?”
9Iyajo akanjikovelesa mu nganda ije ili mu cimpaka, yove Njambi?
Iyajo akanjitwamenena ku Endome?
10Mwa vushunga vene kuma unatuvyana ndi?
Kuma kuwasa kwenda amo na mashwalale vetu ndi?
11Tukwase kulwisa vitozi vetu,
kukwasa kwa vanu kunapu kwangoco.
12Omwo tuli amo na Njambi tukahyana,
ikeye akafungulula vitozi vetu.
The Bible in Mbunda ©The Bible Society of Zambia, 2006