Myaso 57
57
Lilombelo lyakukwasa
Mwaso wa Ndaviti, omo watewele kuli Saulu mu linzenzengoma (1 Sam 22:1, 24:3)
1Njizivileko mema ku mbunge yove Njambi,
omwo njiija kuli yove ngeci unjinyunge,
ngwe mwakanyungu kazila vana vendi mu mambava,
njitewela kuli yove,
noo lihunzi lya mankimba akama linahu.
2Njitambeka kuli Njambi wa Akamwa ya Akamwa,
uje muka-kunjana vyuma vyoshe vinjajena.
3Akanjikumbulula nakunjamena oku ali mwilu,
ikeye akafungulula vaka-kunjiyandesa.
Njambi akanjimwesa cizemo cendi
cije kucesi kutenguluka na kulongwa.
4Njili mukati ka vitozi vakufwa ngwe vindumba.
Mayo avo anafu ngwe makunga na mikili,
kwendeka kwavo kuvavalesa ku mbunge
ngwe mikwale yakuvambuka.
5Mwesa vukama vwove mwilu ya melu yove Njambi,
na vumpau vwove ano asi oshe!
6Vitozi vange vananjitela linimbwa ngeci njitseo,
tuyando tunatumu manene.
Vanjiindilile mbulu mu ngila yange,
oloni vawilililemo vakevo vavenya.
7Mbunge yange inakolesa mbe yove Njambi,
njikaimba nakukushangazala!
8Njikenduka a mungulungengu,
nakushangazala Shukulu Kalunga,
na kalyalya kange na cisanzi cange!
9Njikukandelela yove Shukulu Kalunga
akati ka miyati,
njikakushangazala akati ka vanu.
10Cizemo cove cije kucesi kutenguluka cinete ku melu,
na kulongwa kwove kunete ku mashelwa.
11Mwesa vukama vwove mwilu ya melu yove Njambi,
na vumpau vwove ano asi oshe!
The Bible in Mbunda ©The Bible Society of Zambia, 2006