Myaso 56
56
Lilombelo lyakukulaela kuli Njambi
Mwaso wa Ndaviti, omo vaFilisitiya vamukwatele ku Ngate (1 Sam 21:13-15)
1Njizivileko mema ku mbunge yove Njambi,
omwo vanu valinakunjilwisa,
simbu yoshe vitozi vange valinakunjiyandesa.
2Vitozi valinakunjilwisa litangwa lyoshe lyamutunu.
Vavangi valinakunjilwisa mu kulyalesa.
3Yove Shukulu Kalunga Muka-nzili yoshe,
nameme njili na lyova,
oloni anga njikakukulaela kuli yove.
4Njinakulaela kuli Njambi,
co kunjizivi lyova,
njimushangazala omwo a vije vyanakulaesa.
Munu asa kunjilinga vikajo?
5Vitozi vange vashaka kunjivulumuna
litangwa lyoshe lyamutunu,
visimbu vyoshe vanjitumbila vutumbe vwakunjivulumuna!
6Valikungulwila ku mitambela ya mu vushweke,
nakukengelela a vyuma vyoshe vinjilinga,
co vayongola kunjitsiya.
7Vahise omwo a vuvi vwavo yove Njambi,
fungulula vanu na vukalu vwove!
8Yove wazivuka muvali nakunjiyandesela,
yove uzivuka vusiwa vwange.
Kuma kuvaisonekele mu livulu ndi?
9Litangwa lije njikatambeka kuli yove,
vitozi vange vakeluka munima,
omwo njazivuka ngeci Njambi ali amo nange!
10Njishangazala vikulaeso vya Njambi,
njishangazala lijwi lya Shukulu Kalunga.
11Njinakulaela kuli Njambi,
co kunjikazivi lyova.
Munu asa kunjilinga vikajo?
12Njikakwana vije vinjakukulaesele yove Njambi,
njikakwana n̄ombelo yange ya cikandelela,
13omwo unanjovola ku kutsa,
co unanjamena kukunjifungulula.
Ngecivene, njenda ku mesho a Njambi,
mu ceke cije cilinakutwa ali vaka-kuyoya.
The Bible in Mbunda ©The Bible Society of Zambia, 2006