Myaso 55
55
Lilombelo lya munu uje uvanende vungungu kuli musamba wendi
Mwaso wa Ndaviti
1Ziva lilombelo lyange yove Njambi,
kesi uvyane kulomba kwange!
2Njitolilile nakunjikumbulula,
omwo njinazeye na cishota-mbunge.
3Njilinakuziva lyova muvali nakunjishungwiya vitozi vange,
vananjihyana omwo vaka-vuvi valinakunjiyandesa.
Vanena tuyando ali yange,
vanjiluvalela nakunjizinda.
4Mbunge yange inashulu na lyova,
co njinajujuka manene na lyova lya kutsa.
5Njilinakujaja omwo lyova,
co vukalu vwakama vunanjiwana.
6Njalyendekesele ngwange,
“Nga njakele na mambava ngwe katela,
nga njapululwila kulyala
ngeci njikawaneko kuhwima!
7Nga njapululwila kulyala,
nakukatungila njuvo yange mu mambo.
8Nga njazambwilile mu cimpaka,
kutewa lihunzi lya mankimba akama.”
9Zimangana viyongola vya vitozi vange
yove Shukulu Kalunga,
tanganesa matumbe avo,
omwo njinamono vunyengwe
na vinzita mu nganda.
10Mutanya na vutsiki
vazenguluka vivumbe vyayo,
co mukati kayo munashulu tuyando na n̄avava.
11Kwoshe-ikwoshe kuli kunyonga,
mu vitapalo munashulu tuyando na makuli.
12Nga uje wanjishendumwine wapwile citozi,
nga kunjombileko mbunge embwe,
nga wapwile muka-kunjizinda
uje walyalesele mukulwa nange,
nga njavandele ngeci kesi anjimone.
13Oloni yove wapwa u mukwetu,
musamba wange wa a mbunge!
14Twakele nakusimutwiya
majwi amavwa amolika,
co twakele nakulemesa amo
na mbunga mu Njuvo ya Shukulu Kalunga.
15Vitozi vange vatse vwasi
omo kanda simbu yavo ya kutsa yete,
vanapande kuya mu vukalo vwa vatsi oku vaciyoya!
Nzili ya vuvi ikeyo ilinakuvapangesa.
16Oloni njitambeka kuli Shukulu Kalunga Njambi
ngeci anjikwase, co akanjamena.
17Kulinyenga kwange nakukemanga kwange,
vilinakweta kuli ikeye mutondo,
na mutanya, na vutsiki,
co ikeye aziva lijwi lyange.
18Ikeye akanjiilwisa mwamuvwa
ku nzita ije injilwa na vitozi vavangi manene.
19Njambi, uje washwanene tunde ku san̄ulu,
akanjiziva nakuvafungulula,
omwo vanavyana kutenguluka,
co lalo kuvesi nakumukomoka.
20Mukwetu wakulivanga walwisile vasamba vendi,
co wapokwele cikumiiyo cendi.
21Majwi endi apwile amavwa
kutuvakana mavele akukonda,
oloni mu mbunge yendi mwakele cizindo,
majwi endi apwile amavwa kutuvakana mazi,
oloni apwile akuvambuka ngwe vimoko vya mukwale.
22Kundika tuyando twove kuli Shukulu Kalunga,
co ikeye akakukwasa,
ikeye kakatava muka-vushunga
ngeci vamufungulule embwe.
23Oloni yove Njambi,
ukombila kuti mapwepwe na vaka-makuli
mu mbulu yakulova manene,
kuvakayoyo kweta akati
ka matangwa avo akuyoya embwe.
Oloni yange njikakulaela kuli yove.
The Bible in Mbunda ©The Bible Society of Zambia, 2006