Myaso 49
49
Vukolokomba vwakukulaela vufuko
Mwaso wa cikota ca Kola
1Ziveni evi yeni vanu voshe!
Yeni vanu voshe va mu kaye,
2Tolilileni yeni vanu vakama na ava vavandondo,
vaka-kufuka na tuutu.
3Viyongola vyange vakavizivisisa,
co njikendeka majwi a mana.
4Njikatolilila ku visimo,
co njikanungulula muvinanungulukila
omo njikaimba kalyalya.
5Kunjesi na lyova a simbu ya vushonde,
omo vitozi vaka-vuvi vananjizengeleka,
6vaka-vuvi vaje vanakulaela vufuko vwavo,
vali na kulyalesa a vufuko vwavo vwavungi.
7Munu kasa kulikula ikeye vavenya,
ikeye kasa kufweta Njambi ndando ya mwonyo wendi,
8omwo ndando ya mwonyo wa munu yapwa yakama manene.
Vije vyafweta kuvyasa kupwisamo,
9ngeci ayoye myaka yoshe ano asi,
co kakatsi embwe.
10Munu woshe namono ngeci
nameme vanu vakunyanyama vatsa,
amolika na vikolokomba na vilema.
Voshe valinakuseza vufuko vwavo ku vatekulwila vavo.
11Vimbumbo vyavo#49:11 VIMBUMBO VYAVO: Mu ciHevelu ngwavo, visinganyeka vyavo vya mukati. vikevyo membo avo a ku myaka yoshe,
kuje kukekwo kuvakatumbama simbu yoshe,
nameme laja vakele na lifuti lyavo.
12Vukama vwa munu kuvwasa kumuvindika kutsa,
ikeye akatsa vene ngwe muvakatsi tusitu.
13Kengeni vije vikalingiwa kuli vaje valikulaela vakevo vavenya,
luvinda lwa vaje vakulaela vufuko vwavo,
14vakevo vanavasompela kutsa ngwe vimanga,
co kutsa kukekwo kukapwa kanyungi kavo.
Vaka-vushunga vakashwana akamwa yavo,
omo mivila yavo ilinakusosonyoka mu vukalo vwa vatsi
kulyala na membo avo!
15Oloni Njambi akanjamena,
akanjamena ku nzili ya kutsa.
16Kesi uzive lyova omo munu nafuku,
omo vufuko vwendi vwatumu manene,
17ikeye kasa kuvwambata omo atsa,
vufuko vwendi kuvukai amo nendi mu mbumbo.
18Nameme munu napwisamo nakuvwaelela
mukuyoya kwa cifwa eci,
nakumushangazala omwo alinakuya kulutwe,
19ikeye akaliwana na vakukulwila vendi voshe ku vatsi,
kuje kuli lisusulungu lya ku myaka yoshe.
20Vukama vwa munu kuvwasa kumuvindika kutsa,
ikeye akatsa vene ngwe muvakatsi tusitu.
The Bible in Mbunda ©The Bible Society of Zambia, 2006