Myaso 50
50
Kulemesa kwa vushunga
Mwaso wa Asafe
1Shukulu Kalunga Njambi Muka-nzili yoshe alinakwendeka,
ikeye nasana kaye koshe,
kutunda mu ngangela na mu kangombe ka yambi.
2Njambi alinakutwila ceke cendi mu Siyone,
nganda ije yaivwa manene.
3Njambi yetu aija, oloni kaija noloka kuluu embwe,
tuhya twakunyongesa tuli kulutwe lwendi,
na lihunzi lyakama linamuzengeleka.
4Ikeye akasana lilu na asi kupwa vakaleo ngwe vanu
ngeci vamone mwasompa vanu vendi.
5Alinakwendeka ngwendi,
“Njikungulwileni vanu vange vaka-kukulaela,
vaje valikumiiye cikumiiyo nange
akukombelela n̄ombelo.”
6Melu asholola vushunga vwa Njambi,
omwo Njambi vavenya wapwa lyaako!
7“Tolilileni yeni vanu vange, co njikendeka,
yove Isalele njikakwambulwila vukaleo.
Yange Njambi njapwa nji Njambi yeni vene.
8Kunjimiluvalesa omwo ya vin̄ombelo vyeni vya kwenyeka,
vije mukanena kuli yange simbu yoshe.
9Kunjitambula vingombe vyeni va nkomba
nambe majamba eni a vimembe.
10Omwo tusitu voshe vapwa vange,
na vingombe vaje vali a malundu 1,000 vapwa vange.
11“Njizivuka tuzila voshe va ku minkinda
na tusitu voshe va mu vyana vapwa vange.
12“Nga njakele na njala ngwe kunjamilombele vyakulya,
omwo kaye na vyuma vyoshe vilimo vyapwa vyange.
13Kuma njikali situ ya vingombe va nkomba,
nambe kunwa maninga a vimembe ndi?
14Kombeleleni kuli Njambi vin̄ombelo vyeni vya cikandelela,
co aneni vije vimunalisingi kuli Muka-nzili yoshe.
15Tambekeni kuli yange a litangwa lya tuyando,
co njikamyamena,
co mukanjishangazala.”
16Oloni Njambi alinakwendeka kuli muka-vuvi ngwendi,
“Omwo vikajo wambulwila vizilika vyange?
Nambe kutumbula cikumiiyo cange na kanwa kove?
17Omwo uzinda vilongesa vyange nakuvyana mashiko ange.
18Yove ulikwata vusamba na mwizi woshe uje iwumona,
co unalipandakana na vaka-vupangala.
19“Ukapangesa kanwa kove kwendeka vya vuvi,
co ndaka yove yendeka vya makuli.
20Yove uvangeya lika vandolome vove,
nakuvatondela mulonga.
21Vyuma vije vyoshe viwunalingi,
yange njolokele kuluu,
yove wayongwele ngeci yange njafwa ngwe yove.
Oloni njikakwendekela
nakukunungulwilavyo citona-mesho.
22“Yeni vaka-kwivala Njambi tolilileni vyuma evi,
kutewa njikaminyongesa,
kukwesi weka lalo wakumyamena wai.
23Munu woshe akombelela n̄ombelo ya cikandelela anjisingimika.
Co uje ashungamesa ngila yendi,
njikamumwesa kwamena kwange.”
The Bible in Mbunda ©The Bible Society of Zambia, 2006